កូរ៉េខាងជើង មិនឆ្លើយតបទៅ អាមេរិក រឿងសុខទុក្ខទាហានដែលឆ្លងកាត់​តំបន់គ្មានយោធា

អ្នកនាំពាក្យក្រសួងការបរទេសអាមេរិកលោក Matthew Miller បាននិយាយកាលពីថ្ងៃពុធថា ប្រទេសកូរ៉េខាងជើងមិនទាន់ឆ្លើយតបមកកាន់សហរដ្ឋអាមេរិកវិញនៅឡើយទេ ទាក់ទងនឹងសុវត្ថិភាព ក៏ដូចជាកន្លែងឃុំខ្លួនរបស់ទាហានអាមេរិកដែលបានឆ្លងកាត់ព្រំដែនអន្តរកូរ៉េ ចូលមកកាន់ប្រទេសកូរ៉េខាងជើងក្នុងសប្តាហ៍នេះនោះទេ ។

មន្ទីរបញ្ចកោណបានបញ្ជាក់ពីអត្តសញ្ញាណរបស់ទាហានអាមេរិករូបនេះថា មានឈ្មោះ King Travis ជាកងទាហានថ្នាក់ទី ២ បានឆ្លងកាត់បន្ទាត់កំណត់ព្រំដែនយោធានៅតំបន់សន្តិសុខរួម (JSA) ក្នុងតំបន់គ្មានយោធាកាលពីថ្ងៃអង្គារ ទី១៨ ខែកក្កដា ។

លោក Miller បាននិយាយក្នុងសន្និសីទសារព័ត៌មានថា “មន្ទីរបញ្ចកោណបានទាក់ទងទៅសមភាគីនៅក្នុងជួរកងទ័ពប្រជាជនកូរ៉េរួចហើយ ប៉ុន្តែ​ការ​ទំនាក់​ទំនង​ទាំង​នោះ​មិន​ទាន់​មាន​ចម្លើយសម្រាប់យើង​នៅ​ឡើយ​ទេ ហើយយើងក៏មិនទាន់ដឹងដែរថាតើ លោក King មានចេតនា ឬក៏មិនមានចេតនា ​ដែលធ្វើដំណើរឆ្លងកាត់ចូលប្រទេសកូរ៉េខាងជើងនោះ” ។

លោក Miller បានសង្កត់ធ្ងន់ថា “សហរដ្ឋអាមេរិកមានបណ្តាញមួយចំនួនដែលអាចផ្ញើសារទាក់ទងទៅកាន់កូរ៉េខាងជើងង ប៉ុន្តែការពិភាក្សាទាំងនោះមានភាពរសើបខ្លាំងណាស់ ហើយយើងក៏មិនទាន់បានត្រៀមខ្លួនដើម្បីចូលយកព័ត៌មានលម្អិតទាំងអស់នៅពេលនេះផងដែរ” ។

ទន្ទឹមនោះ អ្នកនាំពាក្យក្រសួងការបរទេសរូបនេះបានបញ្ជាក់ទៀតថា សហរដ្ឋអាមេរិកកំពុងធ្វើការដើម្បីសិក្សាពីសុវត្ថិភាពរបស់លោក King ក៏ដូចជាធ្វើការស្នើសុំណាមួយដើម្បីឲ្យទាហានរបស់យើងវិលត្រឡប់មកកាន់សហរដ្ឋអាមេរិកផងដែរ ។

គួរបញ្ជាក់ថា លោក King Travis បានធ្វើ​ដំណើរជាលក្ខណៈជនស៊ីវិល​នៅភូមិ Panmunjom ក្នុងកម្មវិធីមួយដែលគេរៀបចំឡើងដើម្បីផ្តល់ឱកាសទៅមើលទាហានកូរ៉េខាងត្បូងឲ្យបានជិត នៅក្នុងតំបន់ដែលគ្រប់គ្រងដោយអង្គការសហប្រជាជាតិ ប៉ុន្តែទាហានអាមេរិករូបនេះត្រូវបានចាប់ឃុំឃាំងភ្លាមៗ បន្ទាប់ពីបានឆ្លងកាត់តំបន់គ្មានយោធាដែលពុះចែកកូរ៉េខាងជើង និងកូរ៉េខាងត្បូង ខណៈមូលហេតុពិតប្រាកដមិនទាន់ត្រូវបានបញ្ជាក់នៅឡើយទេ ៕

ប្រែសម្រួលដោយ ៖ ជីវ័ន្ត

ប្រភព ៖ Yonhap

ចុចអាន ៖ ស្គាល់អត្តសញ្ញាណទាហានអាមេរិក ដែលរត់ឆ្លងកាត់តំបន់គ្មានយោធា ចូល កូរ៉េខាងជើង