វិមានក្រឹមឡាំង ប្រាប់កាលបរិច្ឆេទដែលលោក ពូទីន គ្រោងបំពេញទស្សន​កិច្ចនៅ ចិន

ទីប្រឹក្សាគោលនយោបាយការបរទេសរបស់វិមានក្រឹមឡាំង លោក Yury Ushakov បានប្រាប់អ្នកយកព័ត៌មានកាលពីថ្ងៃអង្គារថា ប្រធានាធិបតីរុស្ស៊ីលោក វ្ល៉ាឌីមៀរ ពូទីន មានបំណងអញ្ជើញទៅបំពេញទស្សនកិច្ចនៅប្រទេសចិនក្នុងខែតុលា ស្របពេលជាមួយនឹងវេទិកា “ខ្សែក្រវាត់មួយ ផ្លូវមួយ” ផងដែរ ។

ពាក់ព័ន្ធនឹងបញ្ហានេះ អ្នកនាំពាក្យវិមានក្រឹមឡាំង លោក Dmitry Peskov ក៏បានលើកឡើងកាលពីពេលកន្លងមកផងដែរថា ក្នុងអំឡុងពេលដំណើរទស្សនកិច្ចនោះ លោក ពូទីន រំពឹងនឹងពិភាក្សាអំពីប្រធានបទជាច្រើន រាប់ចាប់ពីកិច្ចសហប្រតិបត្តិការសេដ្ឋកិច្ច រហូតដល់កិច្ចការអន្តរជាតិ ។

ទន្ទឹមនោះ លោក ស៊ី ជីនពីង ប្រធានាធិបតីចិនក៏បានអញ្ជើញមកទីក្រុងមូស្គូផងដែរកាលពីខែមីនា ហើយថែមទាំងបានចុះហត្ថលេខាលើកិច្ចព្រមព្រៀងសេដ្ឋកិច្ច និងកិច្ចព្រមព្រៀងផ្សេងទៀតជាមួយ “មិត្តជាទីស្រឡាញ់” គឺលោក ពូទីន ផងដែរ ។

ប្រទេសចិនបានក្លាយជាសម្ព័ន្ធមិត្តដ៏សំខាន់បំផុតរបស់រុស្ស៊ី ចាប់តាំងពីដើមឆ្នាំមុនមក នៅពេលដែលទំនាក់ទំនងដ៏តានតឹងរបស់បស្ចិមលោកជាមួយទីក្រុងមូស្គូកំពុងធ្លាក់ចុះកាន់តែខ្លាំង ខណៈដែលលោក ពូទីន កំពុងរៀបចំបញ្ជូនកងកម្លាំងប្រដាប់អាវុធវាយសម្រុកចូលទៅក្នុងប្រទេសអ៊ុយក្រែន ។

គួរបញ្ជាក់ថា ដំណើរទស្សនកិច្ចលើកចុងក្រោយបំផុតរបស់លោក ពូទីន ទៅកាន់ទីក្រុងប៉េកាំងបានកើតឡើង នៅមុនពេលដែលប្រតិបត្តិការសឹករបស់រុស្ស៊ីលើអ៊ុយក្រែនកាលពីថ្ងៃទី២៤ ខែកុម្ភៈ ឆ្នាំ២០២២ ហើយនៅក្នុងជំនួបនោះលោក ពូទីន រួមជាមួយលោក ស៊ី បានប្រកាសភាពជាដៃគូ “គ្មានដែនកំណត់” ជាពិសេសភាគីទាំងពីរបានពង្រីកបន្ថែមចូលទៅក្នុងផ្នែកសេដ្ឋកិច្ច ពាណិជ្ជកម្ម នយោបាយ និងយោធា ៕

ប្រែសម្រួលដោយ ៖ ជីវ័ន្ត

ប្រភព ៖ Reuters

ចុចអាន ៖ មូលហេតុចម្បងចំនួន ២ ដែលធ្វើឲ្យ អ៊ុយក្រែន បរាជ័យវាយបកលើ រុស្ស៊ី