បំផ្ទុះគ្រាប់បែកអត្តឃាត ក្នុងពិធីជួបជុំនយោបាយនៅ ប៉ាគីស្ថាន សម្លាប់មនុស្ស៤៤នាក់ និងរបួសជាង ១០០នាក់

ការបំផ្ទុះដ៏ខ្លាំងមួយនៅឯសន្និបាតរបស់គណបក្ស JUI-F និកាយស៊ុននីក្នុងទីក្រុង Khar នៃប្រទេសប៉ាគីស្ថាន កាលពីថ្ងៃអាទិត្យទី៣០ខែកក្កដា បានសម្លាប់មនុស្សជាង៤០នាក់ និងបណ្តាលឲ្យមនុស្សជាច្រើននាក់ទៀតរងរបួស។

លោក Riaz Anwar រដ្ឋមន្រ្តីក្រសួងសុខាភិបាលនៃខេត្ត Khyber Pakhtunkhwa បានប្រាប់ AFP ថា មនុស្សចំនួន៤៤នាក់ ត្រូវបានបញ្ជាក់ថាស្លាប់ និងជាង១០០នាក់រងរបួស។

ស្របពេលជាមួយគ្នានោះ លោក Firoz Shah រដ្ឋមន្ត្រីក្រសួងព័ត៌មានបណ្តោះអាសន្នប្រចាំខេត្ត បានឲ្យដឹងថា ការជួបជុំនយោបាយនោះ មានមនុស្សប្រហែល៥០០នាក់ ហើយពេលនេះ កងកម្លាំងប្រដាប់អាវុធប៉ាគីស្ថាន ក៏ត្រូវបានបញ្ជូនទៅកាន់តំបន់នោះផងដែរ។

យោងតាមមន្ត្រីសង្គ្រោះបន្ទាន់, មេដឹកនាំគណបក្ស JUI-F ក្នុងស្រុកម្នាក់ បានស្លាប់ក្នុងការបំផ្ទុះនេះ។ ដោយជាគណបក្សអភិរក្សសាសនា, JUI-F គឺជាផ្នែកមួយនៃសម្ព័ន្ធរដ្ឋាភិបាលបច្ចុប្បន្ន នៅក្នុងប្រទេសប៉ាគីស្ថាន។

ស្របពេលជាមួយគ្នានោះ លោក Anwar ក៏បាននិយាយផងដែរថា ឧបទ្ទវហេតុនេះគឺជាការវាយប្រហារអត្តឃាត ដោយអ្នកបំផ្ទុះគ្រាប់បែក បានបំផ្ទុះខ្លួនឯង នៅជិតឆាក។

ទោះបីជាយ៉ាងណាក៏ដោយ គ្មាន​ក្រុម​ណា​ចេញ​មុខ​អះអាង​ទទួល​ខុស​ត្រូវ ​ចំពោះ​ការ​វាយ​ប្រហារ​នេះ​ទេ​។

ឧប្បត្តិហេតុនេះ កើតឡើងមុនការបោះឆ្នោតសភាប៉ាគីស្ថានដែលគ្រោងធ្វើនៅខែតុលា ឬវិច្ឆិកា។ សភារបស់ប្រទេស នឹងរំលាយនៅប៉ុន្មានសប្តាហ៍ខាងមុខ ហើយគណបក្សនយោបាយនានា កំពុងរៀបចំសម្រាប់ធ្វើយុទ្ធនាការឃោសនាបោះឆ្នោត៕

ប្រែសម្រួល៖ Vann Vann

ប្រភព៖ RT

ចុចអាន៖ មនុស្សស្លាប់ក្នុងការបំផ្ទុះគ្រាប់បែកនៅ ប៉ាគីស្ថាន កើនដល់៨៧នាក់ ខណៈជាង១០០នាក់ រងរបួស