ប៉ាគីស្ថាន ស្នើសុំជំនួយ ១០ពាន់​លានដុល្លារពីអាមេរិក ដោះស្រាយវិបត្តិសេដ្ឋកិច្ច

រដ្ឋមន្ត្រីក្រសួងហិរញ្ញវត្ថុប៉ាគីស្ថាន លោក Muhammad Aurangzeb បានស្នើសុំរដ្ឋាភិបាលសហរដ្ឋអាមេរិកជាផ្លូវការ ក្នុងការផ្តល់កញ្ចប់ថវិកាគាំទ្រសេដ្ឋកិច្ចចំនួន ១០ពាន់​លានដុល្លារ ក្នុងកំឡុងពេលនៃដំណើរបំពេញទស្សនកិច្ចរបស់លោក នៅរដ្ឋធានីវ៉ាស៊ីនតោន កាល​ពីថ្ងៃអង្គារ ទី​២១ ខែ​កក្កដា ឆ្នាំ​២០២៦។

​បើតាម​ការចុះផ្សាយរបស់​ទីភ្នាក់ងារ​ព័ត៌មាន Anadolu សំណើ​នេះ ត្រូវបានធ្វើឡើងនៅក្នុងជំនួបពិភាក្សាការងារជាមួយរដ្ឋមន្ត្រីក្រសួងរតនាគារជាតិអាមេរិក លោក Scott Bessent ដើម្បីទាញយកមូលនិធិគាំទ្រស្ថិរភាពរូបិយប័ណ្ណអន្តរជាតិមកជួយស្រោចស្រង់សេដ្ឋកិច្ចរបស់ប៉ាគីស្ថាន។

ថ្វីដ្បិត​ភាគីអគ្គរដ្ឋទូតប៉ាគីស្ថាន និងក្រសួងរតនាគារអាមេរិក មិនទាន់បានទម្លាយព័ត៌មានលម្អិតផ្លូវការយ៉ាងណាក៏ដោយ ក៏ប្រភពការទូតបានឱ្យដឹងថា មានសញ្ញាវិជ្ជមានខ្ពស់ ដែលអាមេរិកអាចនឹងអនុម័តសំណើកម្ចីមួយនេះ។ ប្រសិនបើត្រូវបានអនុម័ត យន្តការហិរញ្ញវត្ថុនេះ នឹងជួយបង្កើនទុនបម្រុងរូបិយប័ណ្ណបរទេសរបស់ប៉ាគីស្ថាន កាត់បន្ថយសម្ពាធបំណុល និងជួយឱ្យប្រទេសនេះអាចចូលទៅកាន់ទីផ្សារទុនអន្តរជាតិឡើងវិញបានកាន់តែល្អប្រសើរ។

ព័ត៌មាន​កម្ចី​នេះ កើតឡើងចំពេលដែលរដ្ឋបាលរបស់លោកប្រធានាធិបតី ដូណាល់ ត្រាំ កំពុងបង្ហាញការចាប់អារម្មណ៍យ៉ាងខ្លាំង ក្នុងការបន្តទំនាក់ទំនងជិតស្និទ្ធជាមួយប៉ាគីស្ថាន ហើយធ្លាប់បានសន្យាច្រើនលើកច្រើនសារ ក្នុងការជួយជ្រោមជ្រែងសេដ្ឋកិច្ចរបស់​ប៉ាគីស្ថាន​ឱ្យមានស្ថិរភាពឡើងវិញ៕

ប្រែសម្រួល៖ ឈាង