កូរ៉េខាងត្បូង លុបចោលជើងហោះហើរ និងជម្លៀសមនុស្សជាង ១ម៉ឺននាក់ ដោយសារព្យុះ Khanun

ជើងហោះហើរ និងរថភ្លើងល្បឿនលឿនរាប់រយជើង ត្រូវបានលុបចោល ហើយអាជីវកម្មនានាត្រូវបិទក្នុងទីក្រុងកំពង់ផែ ប៊ូសាន នៃប្រទេសកូរ៉េខាងត្បូង បន្ទាប់ពីព្យុះត្រូពិក Khanun វាយប្រហារនៅថ្ងៃព្រហស្បតិ៍ទី១០ខែសីហា ដោយនាំមកនូវភ្លៀងធ្លាក់និងខ្យល់បក់ខ្លាំង។

ទីភ្នាក់ងារឧតុនិយមកូរ៉េខាងត្បូង បានឲ្យដឹងថា ព្យុះនេះដែលវាយលុកប្រទេសជប៉ុន មុនពេលធ្វើដំណើរឆ្ពោះទៅកាន់ឧបទ្វីបកូរ៉េ គឺបានបោកបក់នៅម៉ោងប្រហែល ៩:២០នាទីព្រឹក ហើយគ្រោងនឹងបោះពួយទៅភាគខាងជើង ដោយនាំមកនូវភ្លៀងធ្លាក់ខ្លាំងទូទាំងប្រទេស។

មនុស្សជាង ១០០០០នាក់ក៏ត្រូវបានជម្លៀសផងដែរ ខណៈលោកនាយករដ្ឋមន្ត្រី Han Duck-soo ជំរុញឲ្យរដ្ឋាភិបាលក្នុងតំបន់ ពិនិត្យមើលថាតើតំបន់ណាដែលជម្លៀសមនុស្សរួច និងតំបន់ណាមិនទាន់ជម្លៀស ដើម្បីធានាសុវត្ថិភាព។

ការព្រមានអំពីព្យុះ ក៏ត្រូវបានចេញទូទាំងប្រទេសផងដែរ ដោយភ្លៀងធ្លាក់ក្នុងកម្រិតរហូតដល់ ៥០០មិល្លីម៉ែត្រ ត្រូវបានព្យាករនៅតំបន់ឆ្នេរភាគឦសាន និងពី១០០ទៅ២០០មិល្លីម៉ែត្រនៅទីក្រុងសេអ៊ូល និងតំបន់ជុំវិញរហូតដល់ព្រឹកថ្ងៃសុក្រ។

លើសពីនេះ ព្យុះបានជំរុញឲ្យមានការជម្លៀសក្រុមកាយរឹទ្ធិរាប់ម៉ឺននាក់ចេញពីជំរំ Jamboree នៅភាគខាងត្បូងប្រទេស កាលពីដើមសប្តាហ៍នេះទៀតផង។

យោងតាមក្រសួងមហាផ្ទៃ, រដ្ឋាភិបាលកូរ៉េខាងត្បូង បានស្នើឲ្យសាធារណជន ចៀសវាងការចេញទៅខាងក្រៅបើមិនចាំបាច់ ចាំដល់ព្យុះឆ្លងកាត់ផុតសិន។

គួរបញ្ជាក់ជាថ្មី មនុស្សជាង៤០នាក់ បានបាត់បង់ជីវិតដោយសារទឹកជំនន់ និងការរអិលបាក់ដីនៅប្រទេសកូរ៉េខាងត្បូង អំឡុងពេលភ្លៀងមូសុងក្នុងឆ្នាំនេះ៕

ប្រែសម្រួល៖ Vann Vann

ប្រភព៖ CNA

ចុចអាន៖ ព្យុះ Khanun សម្លាប់មនុស្សនៅជប៉ុន រួចបន្តទៅវាយប្រហារ កោះតៃវ៉ាន់