រុស្ស៊ី រៀបចំម្ហូប ៧ មុខ និងស្រា ២ ប្រភេទជូនជាពិសេសសម្រាប់លោក គីម ជុងអ៊ុន

ប្រធានាធិបតីរុស្ស៊ីលោក វ្ល៉ាឌីមៀរ ពូទីន កាលពីថ្ងៃពុធពិតជាមិនឲ្យលោក គីម ជុងអ៊ុន ខកបំណងនោះទេសម្រាប់ការទទួលស្វាគមន៍មេដឹកនាំកូរ៉េខាងជើងរូបនេះមកកាន់ទឹកដីនៃប្រទេសរុស្ស៊ី ជាពិសេសការរៀបចំម្ហូបអាហារពេលល្ងាចយ៉ាងសម្រិតសម្រាំងទៅដល់គណៈប្រតិភូរបស់កូរ៉េខាងជើងតែម្ដង ។

ទន្ទឹមនោះ អាហារ​ពេល​ល្ងាច​នេះ​ក៏រៀបចំ​ឡើង​ បន្ទាប់​ពី​លោក គីម បាន​ជួបពិភាក្សា​ការងារជាមួយ​លោក ពូទីន អស់​រយៈពេល​ជាង ១ ម៉ោង​នៅ​ឯទីលានបាញ់បង្ហោះយានអវកាស Vostochny Cosmodrome ក្នុង​ខេត្ត Amur នៃចុងបូព៌ារបស់​រុស្ស៊ី ។

នេះគឺជាបញ្ជីមុខម្ហូបដែលរុស្ស៊ីរៀបចំយ៉ាងពិសេសទៅដល់គណៈប្រតិភូរបស់កូរ៉េខាងជើង រួមទាំងលោក គីម ជុងអ៊ុន ផងដែរ៖

• សាឡាត់សាច់ទាជាមួយផ្លែល្វាបារាំង និងផ្លែ Nectarine

• នំប៉ាវសាច់ក្តាម Kamchatka

• ត្រីមាសខ្មៅ Sturgeon ជាមួយផ្សិត និងដំឡូង

• សាច់គោអាំងជាមួយបន្លែ

• ស៊ុបត្រីនាគ

• ការ៉េមផ្លែសាជី

• ផ្លែ Lingonberry ជាមួយគ្រាប់ស្រល់ និងទឹកដោះគោខាប់

ចំណែកសម្រាប់ម៉ឺនុយស្រាដែលលោក ពូទីន រៀបចំដល់លោក គីម គឺមាន ២ ប្រភេទដូចជា ស្រា ស East Hill Blend, Usadba Divnomorskoe, Russia 2021 និងស្រាក្រហម Cabernet Sauvignon, Usadba Divnomorskoe, Russia 2020 ។

គួរបញ្ជាក់ថា នេះ​ជា​អាហារ​ពេល​ល្ងាចថ្នាក់​រដ្ឋ​លើក​ទី ២ ហើយ​ដែល​រុស្ស៊ី​បានរៀបចំជូន​សម្រាប់​លោក គីម ជុងអ៊ុន ខណៈរដ្ឋាភិបាលទីក្រុងមូស្គូក៏រៀបចំឡើងយ៉ាងពិសេសសម្រាប់មេដឹកនាំកូរ៉េខាងជើងរូបនេះរួចហើយផងដែរ អំឡុងពេលបុរសនុយក្លេអ៊ែរវ័យ ៣៩ ឆ្នាំអញ្ជើញទស្សនកិច្ចក្នុងទីក្រុង Vladivostok កាលពីឆ្នាំ ២០១៩ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ តើ ពូទីន នឹងឲ្យ កូរ៉េខាងជើង ដឹកអ្វីទៅប្រទេសវិញ ហើយ រុស្ស៊ី ទទួលបានអ្វី​ពី គីម ជុងអ៊ុន?