ហាងឆេងផ្ទះថ្មីនៅ ចិន ធ្លាក់ចុះក្នុងល្បឿនលឿនបំផុតនារយៈពេល ១០ ខែមកនេះ

តម្លៃផ្ទះថ្មីរបស់ប្រទេសចិនបានធ្លាក់ចុះក្នុងល្បឿនយ៉ាងលឿនបំផុតក្នុងរយៈពេល ១០ ខែ គិតត្រឹមខែសីហា ដោយសារតែស្ថានភាពនៅក្នុងវិស័យអចលនទ្រព្យបន្តកាន់តែអាក្រក់ទៅៗ ទោះបីជាមានវិធានការគាំទ្រពីសំណាក់រដ្ឋាភិបាលនាពេលថ្មីៗនេះក៏ដោយ ។

បើយោងតាមការគណនារបស់សារព័ត៌មាន Reuters ដោយផ្អែកលើទិន្នន័យរបស់ការិយាល័យស្ថិតិជាតិចិនបានឲ្យដឹងថា ការធ្លាក់ចុះ ០.៣​ ភាគរយពីមួយខែទៅមួយខែបានកើតឡើង បន្ទាប់ពីការធ្លាក់ចុះ ០.២ ភាគរយនៅក្នុងខែកក្កដា ហើយតម្លៃបានបន្តធ្លាក់ចុះ ០.១ ភាគរយបន្ថែមទៀត បើធៀបនឹងឆ្នាំមុន ។

នាប៉ុន្មានសប្តាហ៍ថ្មីៗនេះ ប្រទេសចិនបានបញ្ចេញនូវវិធានការមួយចំនួនដើម្បីជំរុញការទិញផ្ទះ រួមទាំងការបន្ធូរបន្ថយច្បាប់កម្ចីប្រាក់ ក៏ដូចជាបន្ធូរបន្ថយការទប់ស្កាត់ការទិញផ្ទះនៅក្នុងទីក្រុងមួយចំនួនផងដែរ ។

តាមរយៈគោលនយោបាយនេះ បានផ្តល់ឲ្យទីក្រុងធំៗដូចជា ទីក្រុងប៉េកាំង បង្កើនការលក់ផ្ទះថ្មី ប៉ុន្តែអ្នកខ្លះបារម្ភថា ផ្ទះទាំងនោះ​អាចរស់បានក្នុងរយៈពេលខ្លី​ប៉ុណ្ណោះ ហើយអាចធ្វើឲ្យតម្រូវការនៅក្នុងទីក្រុងតូចៗកាន់តែលែងសូវមាន ៕

ប្រែសម្រួល៖ នាង រតនៈ

ប្រភព៖ Yahoo