ព័ត៌មានអន្ដរជាតិ

ពិភពលោកតាមដាន ខណៈប្រធានាធិបតីរុស្ស៊ី នឹងធ្វើដំណើរទៅ ចិន នៅខែក្រោយ

បានផុស

២ years មុន

នៅ

ថ្ងៃពុធ ២០ កញ្ញា ២០២៣

ដោយ

លោក Nikolai Patrushev លេខាក្រុមប្រឹក្សាសន្តិសុខរុស្ស៊ី បាននិយាយកាលពីថ្ងៃអង្គារទី១៩ខែកញ្ញាថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន នឹងទៅជួបជាមួយប្រធានាធិបតីចិនលោក ស៊ី ជីនពីង នៅទីក្រុងប៉េកាំង ប្រទេសចិន នាខែក្រោយនេះ ខណៈសេចក្តីប្រកាសអំពីដំណើរទស្សនកិច្ចនេះ បានធ្វើឲ្យពិភពលោក តាមដានយ៉ាងដិតដល់ជាទីបំផុត ។

លោក ពូទីន (ឆ្វេង) ចាប់ដៃជាមួយលោក ស៊ី (រូបថត៖ Getty Images)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួបកម្រិតខ្ពស់ នឹងធ្វើឡើងក្នុងអំឡុងពេលវេទិកាខ្សែក្រវាត់និងផ្លូវ សម្រាប់កិច្ចសហប្រតិបត្តិការអន្តរជាតិដែលបានកំណត់ទុកនៅខែតុលា។ កន្លងមក ចិនបានបញ្ជាក់ពីការចូលរួមរបស់ប្រទេសប្រមាណ៩០ សម្រាប់ព្រឹត្តិការណ៍នេះ រួមទាំងមេដឹកនាំបរទេសនានា ដូចជាប្រធានាធិបតីស៊ែប៊ី Aleksandar Vucic និងប្រធានាធិបតីអាហ្សង់ទីន Alberto Fernandez ជាដើម។

ក្នុងអំឡុងកិច្ចប្រជុំនៅទីក្រុងមូស្គូ ជាមួយមន្ត្រីការទូតកំពូលរបស់ចិន លោក Wang Yi កាលពីថ្ងៃអង្គារ, លោក Patrushev បានសង្កត់ធ្ងន់ថា ទំនាក់ទំនងរវាងរុស្ស៊ី និងចិន ត្រូវបានកសាងឡើងដោយឈរលើគោលការណ៍នៃការគោរពគ្នា មិនជ្រៀតជ្រែកកិច្ចការផ្ទៃក្នុងរបស់គ្នាទៅវិញទៅមក និងការគាំទ្រគ្នានៅលើឆាកពិភពលោក។

លោក Nikolai Patrushev (រូបថត៖ វិមានក្រឹមឡាំង)

លើសពីនេះ លោក Patrushev ក៏បានបញ្ជាក់អំពីការប្តេជ្ញាចិត្តរបស់ទីក្រុងមូស្គូ ក្នុងការគាំទ្រទីក្រុងប៉េកាំងលើបញ្ហាដូចជាតៃវ៉ាន់ ស៊ីនជាំង ទីបេ និងហុងកុងផងដែរ។ លោកគូសបញ្ជាក់ថា មហាអំណាចលោកខាងលិច កំពុងឆ្លៀតឱកាសយកប្រធានបទទាំងនេះ ដើម្បីបង្ខូចកេរ្តិ៍ឈ្មោះចិន។

គួរបញ្ជាក់ថា កិច្ចសហប្រតិបត្តិការផ្នែកនយោបាយ និងសេដ្ឋកិច្ចរវាងរុស្ស៊ី និងចិន មានការរីកចម្រើនគួរឲ្យកត់សម្គាល់ក្នុងរយៈពេលប៉ុន្មានឆ្នាំថ្មីៗនេះ ខណៈទីក្រុងមូស្គូ និងប្រទេសលោកខាងលិចកំពុងតានតឹងខ្លាំងជាមួយគ្នា ជាពិសេសទាក់ទងបញ្ហាជម្លោះអ៊ុយក្រែន។

ទីក្រុងប៉េកាំង មិនគាំទ្រការដាក់ទណ្ឌកម្មរបស់លោកខាងលិចប្រឆាំង រុស្ស៊ីឡើយ ហើយចំពេលមានទំនាក់ទំនងដ៏តានតឹងជាមួយលោកខាងលិច ទីក្រុងមូស្គូបានចាប់ផ្តើមផ្តោតការយកចិត្តទុកដាក់របស់ខ្លួនទៅកាន់តំបន់បូព៌ាវិញ៕

ប្រែសម្រួល៖ Vann Vann

ប្រភព៖ RT

ចុចអាន៖ លោក ស៊ី៖ ចិន និងរុស្ស៊ី គួរតែ ដឹកនាំកំណែទម្រង់អភិបាលកិច្ចសកល