លោក ស៊ី៖ ចិន និងរុស្ស៊ី គួរតែ ដឹកនាំកំណែទម្រង់អភិបាលកិច្ចសកល 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃចន្ទទី១០ខែកក្កដា ប្រធានាធិបតីចិនលោក ស៊ី ជីនពីង បានជួបសន្ទនាជាមួយសមាជិកព្រឹទ្ធសភាកំពូលរុស្ស៊ី លោកស្រី ​Valentina Matvienko នៅទីក្រុងប៉េកាំង ដោយពិភា​ក្សាអំពីការពង្រឹងទំនាក់ទំនងរវាងប្រជាជាតិទាំងពីរ ក៏ដូចជាគម្រោងពហុជាតិរួមគ្នាផងដែរ។

អំឡុងកិច្ចពិភាក្សានោះ លោក ស៊ី បានសង្កត់ធ្ងន់ថា ទីក្រុងមូស្គូនិងប៉េកាំង គួរតែដឹកនាំទិសដៅត្រឹមត្រូវនៃកំណែទម្រង់អភិបាលកិច្ចពិភពលោក។ លើសពីនេះ លោកក៏បានគូសបញ្ជាក់អំពី សារៈសំខាន់នៃការអភិវឌ្ឍទំនាក់ទំនងក្នុងក្រុមចម្រុះជាតិសាសន៍ ដូចជាអង្គការសហប្រតិបត្តិការសៀងហៃ (SCO) និង BRICS ផងដែរ។

លោក ស៊ី លើកឡើងទៀតថា “ចិន បានត្រៀមខ្លួនរួចជាស្រេច បន្តធ្វើការជាមួយរុស្ស៊ី ដើម្បីបង្កើតយុគសម័យថ្មី នៃភាពជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយ ដែលគាំទ្រគ្នាទៅវិញទៅមក, សមាហរណកម្មស៊ីជម្រៅ, ត្រួសត្រាយ និងច្នៃប្រឌិត ហើយផ្តល់ផលប្រយោជន៍ទៅវិញទៅមក ដើម្បីជួយធ្វើឲ្យប្រទេសទាំងពីរមានភាពរស់រវើកឡើងវិញ និងលើកកម្ពស់វិបុលភាព ស្ថិរភាព យុត្តិធម៌”។

គួរបញ្ជាក់ថា គណៈប្រតិភូរុស្ស៊ីដឹកនាំដោយលោកស្រី Matvienko គ្រោងនឹងបន្តនៅក្នុងប្រទេសចិន រហូតដល់ថ្ងៃពុធ ហើយគោលដៅសំខាន់នៃដំណើរទស្សនកិច្ចរបស់លោកស្រី គឺការពង្រឹងទំនាក់ទំនងរវាងសភាចិន និងរុស្ស៊ី ដោយសមាជិកព្រឹទ្ធសភា ក៏គ្រោងនឹងចូលរួមក្នុងគណៈកម្មការអន្តរសភាលើកទី៨ រវាងប្រទេសទាំងពីរផងដែរ ខណៈកិច្ចប្រជុំនេះ គឺជាជំនួបផ្ទាល់លើកដំបូង ដែលធ្វើឡើងចាប់តាំងពីការផ្ទុះឡើងនៃជំងឺកូវីដ-១៩ កាលពីដើមឆ្នាំ ២០២០៕

ប្រែសម្រួល៖ Vann Vann

ប្រភព៖ RT

ចុចអាន៖ លោក ស៊ី ជីនពីង ឲ្យយោធាបង្កើនសមត្ថភាពប្រយុទ្ធដើម្បីធានាជ័យជម្នះ ក្នុងជម្លោះ