អង្គការ​​ NASA គ្រោងចំណាយ​ ៦០ លានដុល្លារ សង់ផ្ទះលើ​ឋានព្រះចន្ទ

ទីភ្នាក់ងារអវកាស NASA គ្រោងចំណាយលុយប្រមាណ ៦០ លានដុល្លារឲ្យក្រុមហ៊ុនបច្ចេកវិទ្យាសំណង់មួយសាងសង់ផ្ទះ​នៅលើឋានព្រះចន្ទនៅឆ្នាំ ២០៤០ សម្រាប់អវកាស​យានិក និងសម្រាប់​ជនស៊ីវិលជួល​ស្នាក់នៅ ។

ផែនការសាងសង់នេះ គឺ​ខាងក្រុមហ៊ុននឹងដឹកម៉ាស៊ីនបោះពុម្ព 3D ពី​ផែនដីទៅលើឋានព្រះច័ន្ទ ដើម្បីឲ្យវាដំណើរការនៅទីនោះ ហើយប្រើប្រាស់បេតុងនៅ​ភពព្រះចន្ទ ដែលធ្វើពីថ្ម បំណែកសារធាតុរ៉ែ និងធូលី ដើម្បីក្រាលនៅបាតសំណង់ ។

ទន្ទឹមនឹងនេះ NASA ក៏កំពុងធ្វើការជាមួយសាកលវិទ្យាល័យ និងក្រុមហ៊ុនឯកជនមួយចំនួនទៀតផងដែរ ដើម្បីសាងសង់ទ្វារ ការ៉ូ និងគ្រឿងសង្ហារឹម សម្រាប់ផ្ទះ​នៅឋានព្រះចន្ទមួយនេះ ។

តាមរយៈគម្រោងការនេះដែរ ក៏បានរួមបញ្ជូល​នូ​វការសាងសង់​ផ្ទះ​ដូចគ្នានៅភពអង្គារ ខណៈគេរំពឹងថា នឹងអាចឲ្យអវកាសយានិក រស់នៅ​លើភពនេះបានជាប្រវត្តិសាស្ត្រមិនធ្លាប់មាននាពេលអនាគត ។

ប៉ុន្តែទោះជាយ៉ាងណា ចំពោះផែនការដែលកើតមានតាំងតែពីឆ្នាំ ២០២២ មកម្ល៉េះនេះ គឺស្ថិតនៅក្នុងដំណាក់កាលដំបូងបំផុតនៅឡើយ ដោយមានតែការបង្ហាញគម្រូផ្ទះតិចតូចប៉ុណ្ណោះ ។

ដោយឡែក ចំពោះការស្នាក់នៅ​សម្រាប់ជនស៊ីវិលវិញ NASA មិនបានបង្ហាញឲ្យដឹងឡើយថា នឹងគិតថ្លៃស្នាក់នៅចំនួនប៉ុន្មានចំពោះមនុស្សម្នាក់ៗ​នោះ ៕

ប្រែសម្រួល៖ នាង រតនៈ

ប្រភព៖ Daily Mail