ចិន នឹងបូជាសពអតីតនាយករដ្ឋមន្ត្រីលោក Li Keqiang នៅថ្ងៃព្រហស្បតិ៍​នេះ

ទីភ្នាក់ងារព័ត៌មានស៊ីនហួរបានរាយការណ៍ថា ប្រទេសចិននឹងបូជាសពអតីតនាយករដ្ឋមន្ត្រីលោក Li Keqiang នៅថ្ងៃព្រហស្បតិ៍ ទី២ ខែវិច្ឆិកា ខណៈក៏មានការបង្ហូតទង់ជាតិពាក់កណ្ដាលដងនៅទូទាំងប្រទេសផងដែរដើម្បីកាន់ទុក្ខចំពោះមេដឹកនាំដ៏ឆ្នើមរូបនេះ ។

លោក Li ដែលបានកាន់តំណែងជានាយករដ្ឋមន្ត្រីចិនអស់រយៈពេល ១០ ឆ្នាំ មុនពេលចូលនិវត្តន៍កាលពីខែមីនា បានទទួលមរណភាពនៅទីក្រុងសៀ់ងហៃក្នុងវ័យ ៦៨ ឆ្នាំ ដោយសារជំងឺគាំងបេះដូងកាលពីថ្ងៃសុក្រ ទី២៧ ខែតុលា ហើយភ្លាមៗនោះ សាកសពរបស់លោកក៏ត្រូវបានបញ្ជូនទៅកាន់ទីក្រុងប៉េកាំងតាមជើងហោះហើរពិសេស ។

ទីភ្នាក់ងារស៊ីនហួបានរាយការណ៍ទៀតថា “លោក Li គឺជាសមាជិកគណបក្សកុម្មុយនីស្តចិនដ៏ឆ្នើមមួយរូប ជាទាហានដ៏ស្មោះត្រង់ម្នាក់ ជាពិសេសលោកក៏ជាអ្នកបដិវត្តន៍និយម រដ្ឋបុរស និងជាមេដឹកនាំរបស់បក្ស និងប្រទេសជាតិដ៏មានស្នាដៃផងដែរ” ។

ស្របពេលជាមួយគ្នានេះ នៅ​ថ្ងៃ​បូជាសពក៏មានការបង្ហូតទង់ជាតិពាក់កណ្ដាលដងផងដែរ ដើម្បីកាន់ទុក្ខលោក Li ខណៈការបង្ហូតទង់ជាតិទាំងនោះនឹងធ្វើឡើងនៅទីលាន Tiananmen, មហាសាលប្រជាជនចិន, ក្រសួងការបរទេស ព្រមទាំង​អគារ​រដ្ឋាភិបាល​ក្នុង​តំបន់នៅ​ទូទាំង​ប្រទេស ក៏ដូចជានៅតាមស្ថានទូត និងស្ថានកុងស៊ុលចិនជាដើម ។

គួរបញ្ជាក់ថា លោក លោក Li Keqiang គឺជាមេដឹកនាំមួយរូបដែលប្រជាជនចិនគ្រប់រូបគោរពស្រឡាញ់ ដោយសារតែការអនុវត្តគោលនយោបាយសេដ្ឋកិច្ច ហើយលោកក៏បានសាងកេរ្តិ៍ឈ្មោះ ជាអ្នកដឹកនាំដែលដាក់គោលនយោបាយផ្តោតលើការកាត់បន្ថយគម្លាតទ្រព្យសម្បត្តិ និងការផ្តល់លំនៅដ្ឋានក្នុងតម្លៃសមរម្យផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Xinhua

ចុចអាន ៖ ចិន ព្រមានថា ជំនួបរវាងលោក ស៊ី និង បៃដិន ប្រហែលមិនកើតឡើងឡើយ