កូរ៉េខាងជើង ប្រតិកម្មជុំវិញការបាញ់មីស៊ីលបរាជ័យរបស់អាមេរិក

កូរ៉េខាងជើងបានថ្កោលទោសការសាកល្បងកាំជ្រួចមីស៊ីលឆ្លងទ្វីប (ICBM) ដែលបរាជ័យដោយយោធាអាមេរិក និងព្រមានពីការឆ្លើយតបរបស់ខ្លួនវិញ ចំពោះសកម្មភាពបង្កហេតុរបស់មន្ទីរបញ្ចកោណនៅលើឧបទ្វីបកូរ៉េ។

នៅក្នុងការអត្ថាធិប្បាយដែលធ្វើឡើងដោយទីភ្នាក់ងារព័ត៌មានរដ្ឋកណ្តាលកូរ៉េ (KCNA) នៅថ្ងៃសុក្រ ទី៣ ខែវិច្ឆិកា ក្រុងព្យុងយ៉ាងបានឆ្លើយតបទៅនឹងការបាញ់មីស៊ីលរបស់ទីក្រុងវ៉ាស៊ីនតោនកាលពីដើមសប្តាហ៍នេះ ដែលត្រូវបានបាញ់ទម្លាក់ដោយកងទ័ពអាកាសអាមេរិក នៅពាក់កណ្តាលជើងហោះហើរដោយសារតែភាពមិនប្រក្រតី ប៉ុន្តែអាមេរិកបែរជាមិនបានបញ្ជាក់ពីបញ្ហាជាក់លាក់។

សេចក្តីថ្លែងការណ៍បានចោទប្រកាន់សហរដ្ឋអាមេរិកថាកំពុងបង្ហាញសកម្មភាពបង្កហេតុ បណ្ដាលឱ្យមានភាពតានតឹងផ្នែកយោធានៅលើឧបទ្វីបកូរ៉េ ហើយចំពោះសកម្មភាពនេះ កូរ៉េខាងជើងបានត្រៀមខ្លួនរួចរាល់ដើម្បីឆ្លើយតបវិញ។

នៅក្នុងសេចក្តីថ្លែងការណ៍របស់ខ្លួននៅថ្ងៃសុក្រ កូរ៉េខាងជើងបាននិយាយថា “សមយុទ្ធពង្រឹងអាវុធនុយក្លេអ៊ែរ” របស់ទីក្រុងវ៉ាស៊ីនតោន គឺជា “ការប៉ុនប៉ងដ៏គ្រោះថ្នាក់មួយដើម្បីសម្រេចបានអនុត្តរភាពយោធា” ខណៈ “ការគំរាមកំហែងនុយក្លេអ៊ែរ” ដែលបង្កឡើងដោយសហរដ្ឋអាមេរិកកំពុងខិតជិតដល់ខ្សែគ្រោះថ្នាក់ថ្មីមួយ ហើយការអភិវឌ្ឍន៍ឃ្លាំងអាវុធបរមាណូរបស់ខ្លួនគឺជាការអនុវត្តសិទ្ធិការពារខ្លួនឯងប៉ុណ្ណោះ៕

ប្រែសម្រួល៖ សន្យា

ប្រភព៖ RT

ចុចអាន៖ ស្ត្រីទីមួយ តែងតាំងឱ្យដឹកនាំកងទ័ពជើងទឹកសហរដ្ឋអាមេរិក

ចុចអាន៖ កូរ៉េខាងត្បូង ថា កូរ៉េខាងជើង ផ្ដល់គ្រាប់កាំភ្លើងធំឲ្យ រុស្ស៊ី ដើម្បីប្រយុទ្ធនៅ អ៊ុយក្រែន ១០ ដងមកហើយ