ជំនួយការកំពូលរបស់លោក បៃដិន នឹងហោះទៅអង្គុយចរចាជាមួយ​ប្រធានាធិបតី ប៉ាឡេស្ទីន

លោក Jake Sullivan ទីប្រឹក្សាសន្តិសុខជាតិរបស់ប្រធានាធិបតីអាមេរិក Joe Biden នៅថ្ងៃសុក្រនេះនឹងហោះទៅប៉ាឡេស្ទីនដើម្បីអង្គុយចរចាជាមួយលោកប្រធានាធិបតី Mahmoud Abbas ពាក់ព័ន្ធនឹងស្ថានភាពដែលកំពុងដុតរោលខ្លាំងៗទៅនៅតំបន់ហ្គាហ្សាស្ទ្រីប ។

មន្ត្រីអាមេរិកមួយរូបដែលសុំមិនបញ្ចេញឈ្មោះបាននិយាយប្រាប់សារព័ត៌មានក្នុងស្រុកថា “លោក Jake Sullivan នឹងជួបជាមួយជាមួយលោក Mahmoud Abbas និងមន្ត្រីជាន់ខ្ពស់ប៉ាឡេស្ទីនផ្សេងទៀតនៅទីក្រុង Ramallah ភាគខាងលិចដើម្បីពិភាក្សាអំពីលក្ខខណ្ឌ និងការធានាមិនឲ្យមានព្រឹត្តិការណ៍ ៧ តុលា កើតឡើងម្ដងទៀត ក៏ដូចជាបង្ហាញកិច្ចគាំទ្រជាប្រវត្តិសាស្ត្ររបស់អាមេរិកចំពោះអាជ្ញាធរប៉ាឡេស្ទីន” ។

ទន្ទឹមនោះ ការពិភាក្សានេះក៏រំពឹងថា នឹងផ្តោតជាចម្បងលើបញ្ហាស្ថិរភាពនៅតំបន់ West Bank ក៏ដូចជាផែនការចរចានៅជំហានបន្ទាប់ក្នុងតំបន់ហ្គាហ្សាស្ទ្រីបដែលកំពុងត្រូវបានឡោមព័ទ្ធ បន្ទាប់ពីការបញ្ចប់សង្រ្គាមដ៏រ៉ាំរ៉ៃរបស់អ៊ីស្រាអែលនៅទីនោះ ។

ភាពតានតឹងនៅមជ្ឈិមបូព៌ាបានផ្ទុះឡើងសាជាថ្មី បន្ទាប់ពីក្រុមប្រដាប់អាវុធប៉ាឡេស្ទីនហាម៉ាសបានបើកការវាយប្រហារដោយបាញ់គ្រាប់រ៉ុកកែតយ៉ាងសន្ធាប់ និងគួរឲ្យភ្ញាក់ផ្អើលចេញពីតំបន់ហ្គាហ្សាស្ទ្រីបមកលើទឹកដីនៃប្រទេសអ៊ីស្រាអែលកាលពីថ្ងៃទី៧ ខែតុលា ដោយបានសម្លាប់មនុស្សប្រមាណ ១,២០០ នាក់ ខណៈសង្គ្រាមក៏កាន់តែពុះកញ្ជ្រោលខ្លាំងឡើងៗផងដែរ ពោលចាប់តាំងពីថ្ងៃទី១ ខែធ្នូ ក្រោយការផ្អាកបាញ់មនុស្សធម៌អស់សុពលភាព ។

រហូតមកដល់ពេលនេះ សង្គ្រាមរវាងអ៊ីស្រាអែល និងក្រុមប្រដាប់អាវុធហាម៉ាសបានបន្តអូសបន្លាយពេលជាង ២ ខែមកហើយ ដោយក្នុងនោះទាហានអ៊ីស្រាអែលជាង ១១០ នាក់បានបាត់បង់ជីវិត ខណៈនៅតំបន់ហ្គាហ្សាវិញមានជនស៊ីវិលជាង ១៨,៧០០ នាក់ត្រូវបានសម្លាប់ និង ៥០,៨០០ នាក់រងរបួស ក្រោយការវាយប្រហារមិនប្រណីដៃពីសំណាក់កងកម្លាំងរបស់លោក Netanyahu ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ មេបក្សប្រឆាំង អ៊ីស្រាអែល ព្រមានមិនសំចៃមាត់ទៅលោកនាយករដ្ឋមន្ត្រី Netanyahu