ព័ត៌មានអន្ដរជាតិ

មេបក្សប្រឆាំង អ៊ីស្រាអែល ព្រមានមិនសំចៃមាត់ទៅលោកនាយករដ្ឋមន្ត្រី Netanyahu

បានផុស

២ years មុន

នៅ

ថ្ងៃសុក្រ ១៥ ធ្នូ ២០២៣

ដោយ

មេដឹកនាំបក្សប្រឆាំងអ៊ីស្រាអែលលោក Yair Lapid កាលពីថ្ងៃព្រហស្បតិ៍បានព្រមានមិនសំចៃមាត់ និងចោទប្រកាន់លោកនាយករដ្ឋមន្ត្រី Benjamin Netanyahu អំពីការភូតកុហកឥតល្ហែ និងតែងតែគេចវេសមិនទទួលខុសត្រូវទៅលើទាហានអ៊ីស្រាអែលដែលកំពុងត្រូវបានសម្លាប់នៅក្នុងតំបន់ហ្គាហ្សាស្ទ្រីប ។

លោក Lapid បាននិយាយនៅលើវេទិកាប្រព័ន្ធផ្សព្វផ្សាយសង្គម X ថា “ពេញមួយជីវិតនេះ លោក Netanyahu កំពុងធ្វើខុសលើបញ្ហាជាច្រើនដូចជា ការការញុះញង់ និយាយភូតកុហក និងបង្កើតការស្អប់ខ្ពើម ជាពិសេសលោកក៏កំពុងតែដឹកនាំប្រទេសដើរលើផ្លូវសង្គ្រាមដ៏ជូរចត់ ហើយទាហានត្រូវបានសម្លាប់ជារៀងរាល់ថ្ងៃ” ។

លោក Lapid បាននិយាយទៀតថា “ក្រោមការដឹកនាំរបស់លោក Netanyahu ទាហានអ៊ីស្រាអែលមិនត្រឹមតែកំពុងត្រូវបានសម្លាប់នៅតំបន់ហ្គាហ្សាប៉ុណ្ណោះទេ ទាហានរបស់យើងក៏បាត់បង់ជីវិតជាហូរហែផងដែរ ក្រោយពេលដែលនាយករដ្ឋមន្ត្រីរូបនេះបង្កើតជម្លោះសាជាថ្មីជាមួយអាមេរិក ជាមួយខ្ញុំ និងជាមួយគណៈរដ្ឋមន្ត្រីសង្គ្រាមដូចជា លោក Benny Gantz និង Gadi Eisenkot ជាដើម” ។

ការព្រមានមិនសំចៃមាត់ពីសំណាក់មេបក្សប្រឆាំងរូបនេះកើតមានឡើង បន្ទាប់ពីលោក Netanyahu ជំទាស់នឹងកិច្ចខិតខំប្រឹងប្រែងរបស់សហរដ្ឋអាមេរិកក្នុងការអនុញ្ញាតឲ្យអាជ្ញាធរប៉ាឡេស្ទីនគ្រប់គ្រងតំបន់ហ្គាហ្សាស្ទ្រីប ក្រោយបញ្ចប់សង្គ្រាមអ៊ីស្រាអែល ក៏ដូចជាមានទាហានស្លាប់បាត់បង់ជីវិតជាហូរហែផងដែរ ។

ភាពតានតឹងនៅមជ្ឈិមបូព៌ាបានផ្ទុះឡើងសាជាថ្មី បន្ទាប់ពីក្រុមប្រដាប់អាវុធប៉ាឡេស្ទីនហាម៉ាសបានបើកការវាយប្រហារដោយបាញ់គ្រាប់រ៉ុកកែតយ៉ាងសន្ធាប់ និងគួរឲ្យភ្ញាក់ផ្អើលចេញពីតំបន់ហ្គាហ្សាស្ទ្រីបមកលើទឹកដីនៃប្រទេសអ៊ីស្រាអែលកាលពីថ្ងៃទី៧ ខែតុលា ដោយបានសម្លាប់មនុស្សប្រមាណ ១,២០០ នាក់ ខណៈសង្គ្រាមក៏កាន់តែពុះកញ្ជ្រោលខ្លាំងឡើងៗផងដែរ ពោលចាប់តាំងពីថ្ងៃទី១ ខែធ្នូ ក្រោយពេលដែលការផ្អាកបាញ់មនុស្សធម៌អស់សុពលភាព ។

រហូតមកដល់ពេលនេះ សង្គ្រាមរវាងអ៊ីស្រាអែល និងក្រុមប្រដាប់អាវុធហាម៉ាសបានបន្តអូសបន្លាយពេលជាង ២ ខែមកហើយ ដោយក្នុងនោះទាហានអ៊ីស្រាអែលជាង ១១០ នាក់បានបាត់បង់ជីវិត ខណៈនៅតំបន់ហ្គាហ្សាវិញមានជនស៊ីវិលជាង ១៨,៧០០ នាក់ត្រូវបានសម្លាប់ និង ៥០,៨០០ នាក់រងរបួស ក្រោយការវាយប្រហារមិនប្រណីដៃពីសំណាក់កងកម្លាំងរបស់លោក Netanyahu ៕