ជនដៃដល់រ៉ាយរ៉ាប់ពីដើមហេតុថ្នាំងថ្នាក់ចិត្តខ្លះ មុនឈានដល់ការហក់ចាក់​កញ្ចឹង ក មេបក្សប្រឆាំង កូរ៉េខាងត្បូង

ជនដៃដល់ដែលហក់ចាក់កញ្ចឹង ក លោក Lee Jae-myung មេបក្សប្រឆាំងដ៏ធំរបស់កូរ៉េខាងត្បូង មានការថ្នាំងថ្នាក់ចិត្ត និងខឹងសម្បារចំពោះអ្នកនយោបាយរូបនេះ រួមជាមួយបញ្ហាស្ថានភាពនយោបាយ និងសេដ្ឋកិច្ចរបស់ប្រទេសផង ។ នេះគឺជាកំណត់ហេតុដែលសរសេរដោយជនដៃដល់ មុនពេលប្រព្រឹត្តបទល្មើស និងត្រូវបានចុះផ្សាយដោយទីភ្នាក់ងារ Yonhap ។

ទន្ទឹមនោះ កំណត់ហេតុរបស់ជនដៃដល់ដែលមាននាមត្រកូល Kim បានសរសេររ៉ាយរ៉ាប់ទៀតថា សេដ្ឋកិច្ចជាតិរបស់កូរ៉េខាងត្បូងនឹងត្រូវដួលរលំ មិនថាអ្នកណាឈ្នះការបោះឆ្នោតជ្រើសរើសប្រធានាធិបតីកាលពីខែមីនា ឆ្នាំ២០២២ នោះទេ បើទោះបីជា កំណត់ហេតុកម្រាស់ ៨ ទំព័រផ្សេងទៀតដែលប៉ូលិសរឹបអូសពីផ្ទះជនដៃដល់ មិនទាន់ត្រូវបានលាតត្រដាងឲ្យដឹងនៅឡើយក៏ដោយ ។

នៅក្នុងកំណត់ហេតុដែលបែកធ្លាយទៅដល់ដៃអ្នកសារព័ត៌មាន ជនដៃដល់វ័យ ៦៧ ឆ្នាំខាងលើសរសេរបញ្ជាក់បន្ថែមថា “កាលពីរដ្ឋាភិបាលអាណត្តិមុន ពោលក្រោមការដឹកនាំដោយលោក Moon Jae-in ដែលមកពីគណបក្សប្រជាធិបតេយ្យដូចគ្នានោះ សេដ្ឋកិច្ចត្រូវបានបំផ្លាញខ្ទេចខ្ទី ដោយសារតែការបរាជ័យនៃគោលនយោបាយអចលនទ្រព្យ និងការអាប់មុខផ្នែកការទូតជាមួយកូរ៉េខាងជើង ដូច្នេះទោះអ្នកណាឈ្នះការបោះឆ្នោតសកលក៏ដោយ ក៏សេដ្ឋកិច្ចជាតិនឹងវិនាសអន្តរាយដូចគ្នា” ។

ទោះយ៉ាងណា ភ្នាក់ងារប៉ូលិសទីក្រុង Busan បាននិយាយនៅក្នុងសន្និសីទសារព័ត៌មានមួយថា នេះគ្រាន់តែជាកំណត់ហេតុដែលផ្សាយចេញដោយអ្នកសារព័ត៌មានប៉ុណ្ណោះ ហើយវាមិនត្រូវគ្នាទាំងស្រុងជាមួយនឹងកំណត់ហេតុកម្រាស់ ៨ ទំព័រដែលប៉ូលិសរឹបអូសបាននោះទេ ប៉ុន្តែខ្លឹមសារមួយចំនួនធំគឺដូចគ្នាបេះបិត ។

ជនដៃដល់ដែលមាននាមត្រកូល Kim បានលើកឡើងតែពីពាក្យ “ប្រវត្តិសាស្រ្តប្រទេស” ជាច្រើនដងនៅក្នុងកំណត់ហេតុដែលសរសេរដោយផ្ទាល់ដៃ មុនឈានទៅដល់ការចេញធ្វើសកម្មភាព ជាពិសេសរូបគេថែមទាំងបានរិះគន់ និងតិះដៀលដល់អ្នកនយោបាយមួយចំនួនផងដែរ ខណៈប៉ូលិសមិនអាចបង្ហាញឈ្មោះអ្នកនយោបាយដែលត្រូវបានចារទុកនៅក្នុងកំណត់ត្រារបស់ជនដៃដល់បាននោះទេ ដោយសារការស៊ើបអង្កេតកំពុងបន្តនៅឡើយ ។

គួរបញ្ជាក់ថា លោក Lee Jae-myung មេដឹកនាំគណបក្សប្រជាធិបតេយ្យដែលបក្សប្រឆាំងដ៏ធំរបស់កូរ៉េខាងត្បូងត្រូវបានជនដៃដល់ដកកាំបិតហក់ទៅចាក់ចំកញ្ចឹង ក ខាងឆ្វេងបណ្ដាលឲ្យរបួសធ្ងន់ធ្ងរកាលពីវេលាម៉ោង ១០ និង ២៧ នាទីព្រឹកថ្ងៃទី២ ខែមករាកន្លងទៅ អំឡុងពេលដែលលោកចុះទៅទីក្រុងកំពង់ផែ Busan ភាគអាគ្នេយ៍ប្រទេស ខណៈជនដៃដល់ក៏ត្រូវបានប៉ូលិសចាប់ខ្លួនភ្លាមៗនៅនឹងកន្លែងផងដែរ ហើយតុលាការត្រៀមនឹងចោទប្រកាន់ជនដៃដល់ពីបទប៉ុនប៉ងមនុស្សឃាតគិតទុកជាមុន ៕

ប្រែសម្រួលដោយ ៖ ជីវ័ន្ត

ចុចអាន ៖ ស្លាប់កើនដល់ ១០០ នាក់ ក្នុងគ្រោះរញ្ជួយដីនៅ ជប៉ុន