ចិន​នឹងដាក់ទណ្ឌកម្មក្រុមហ៊ុនអាមេរិកចំនួន៥ឆ្លើយតបការលក់អាវុធឲ្យតៃវ៉ាន់

ប្រទេស​ចិន​នឹង​ដាក់​ទណ្ឌកម្មក្រុម​ហ៊ុន​យោធា​អាមេរិក​ចំនួន​៥​ដើម្បី​ជា​ការ​ឆ្លើយតប​ទៅ​​នឹង​សហរដ្ឋ​អាមេរិក​ដែល​បាន​លក់​គ្រឿង​សព្វាវុធ​ចុង​ក្រោយ​បំផុត​ទៅ​កោះតៃវ៉ាន់។ នេះ​ជា​ការ​ឲ្យ​ដឹង​ពី​អ្នក​នាំ​ពាក្យ​ក្រសួង​ការបរទេស​ចិន​​នៅ​ថ្ងៃ​អាទិត្យ ទី​៧ ខែ​មករា ឆ្នាំ​២០២៤។

ការ​លក់​គ្រឿង​អាវុធ​​របស់​សហរដ្ឋ​អាមេរិក​​ទៅ​កោះ​តៃវ៉ាន់គឺ​ជា​ប្រភព​នៃ​ភាព​តាន​តឹង​​ញឹក​ញាប់​រវាង​រដ្ឋាភិបាល​ទី​ក្រុង​វ៉ាស៊ីនតោន និង​រដ្ឋាភិបាល​ទី​ក្រុង​ប៉េកាំង។ ចិន​បាន​ចាត់​ទុក​កោះតៃវ៉ាន់​​ដែល​គ្រប់​គ្រង​តាម​បែប​ប្រជាធិបតេយ្យ​ស្ថិត​នៅ​ក្នុង​ទឹក​ដី​របស់​ខ្លួន​​។

ទណ្ឌកម្ម​កើត​មាន​មុន​ពេល​ការ​បោះ​ឆ្នោត​ជ្រើស​រើស​សភា និងប្រធានាធិបតី​កោះតៃវ៉ាន់​នៅ​ថ្ងៃ​ទី​១៣ ខែ​មករា ឆ្នាំ​២០២៤ ដែល​ប្រទេស​ចិន​មាន​ជម្រើស​រវាង​សង្គ្រាម និង​សន្តិភាព។

ក្រសួង​ការបរទេស​សហរដ្ឋ​អាមេរិក​កាល​ពី​ខែ​មុន​បាន​យល់​ព្រម​លក់​គ្រឿង​ឧបករណ៍​​ដែល​មាន​តម្លៃ​៣០០​លាន​ដុល្លារ​​ដើម្បី​ជួយ​ការពារ​ប្រព័ន្ធ​ព័ត៌មានយុទ្ធសាស្ត្ររបស់​កោះតៃវ៉ាន់។

អ្នក​នាំ​ពាក្យ​ក្រសួង​ការបរទេស​ចិន​បាន​និយាយ​ក្នុង​សេចក្តី​ថ្លែង​ការណ៍​មួយ​អំពី​ការ​លក់​របស់​អាមេរិក​ទៅ​តៃវ៉ាន់​គឺ​ធ្វើ​ឲ្យ​ប៉ះ​ពាល់​អធិបតេយ្យភាព និង​ផល​ប្រយោជន៍​សន្តិសុខ​របស់​ប្រទេស​ចិន​យ៉ាង​ធ្ងន់​ធ្ងរ ធ្វើ​ឲ្យ​ប៉ះ​ពាល់​ដល់​សន្តិភាព និង​ស្ថិរភាព​​នៅ​ច្រក​សមុទ្រតៃវ៉ាន់​យ៉ាង​ធ្ងន់​ធ្ងរ។

ក្រុម​ហ៊ុន​យោធា​អាមេរិក​ទាំង​៥​ដែល​នឹង​ត្រូវ​ដាក់​ទណ្ឌកម្ម​រួម​មាន​ក្រុម​ហ៊ុន BAE Systems Land and Armaments, ក្រុម​ហ៊ុន Alliant Techsystems Operations, ក្រុម​ហ៊ុន AeroVironment, ក្រុម​ហ៊ុន Viasat និង​ក្រុម​ហ៊ុន។ Data Link Solutions។

អ្នក​នាំ​ពាក្យ​បន្ថែម​ថា ចិន​នឹង​បង្កក​ទ្រព្យ​សម្បត្តិ​របស់​ក្រុម​ហ៊ុន​ទាំង​៥​នេះ និង​ដាក់បំរាម​លើ​បុគ្គល ឬអង្គភាព​​នានា​នៅ​ក្នុងប្រទេស​ចិន​មិន​ឲ្យ​ពាក់​ព័ន្ធ​ជា​មួយ​ពួក​គេ៕

ប្រែ​សម្រួល៖ វីរបុត្រ
សប្រភព៖ Reuters