សមាជិកណាតូមួយប្រទេស ចោទអាមេរិកនិងអង់គ្លេស ថា ចង់ប្រែក្លាយសមុទ្រក្រហម ទៅជា “សមុទ្រឈាម”

Reuters ចុះផ្សាយនៅថ្ងៃសៅរ៍ទី១៣ខែមករាថា ស្របពេលការប្រយុទ្ធគ្នាពេញទំហឹង កំពុងផ្ទុះឡើងក្នុងប្រទេសយេម៉ែន ជាទីតាំងរបស់ក្រុមឧទ្ទាមហ៊ូធី, លោក Tayyip Erdogan ប្រធានាធិបតីតួកគី ដែលជាសមាជិកអង្គការណាតូ បានស្តីបន្ទោសខ្លាំងៗទៅលើសហរដ្ឋអាមេរិកនិងចក្រភពអង់គ្លេស ដោយចោទសម្ព័ន្ធមិត្តទាំងពីរថា ចង់ប្រែក្លាយសមុទ្រក្រហម ទៅជា “សមុទ្រឈាម”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយពិធីអធិស្ឋានមួយក្នុងទីក្រុងអ៊ីស្តង់ប៊ុល លោក Erdogan ប្រាប់ទៅអ្នកសារព័ត៌មានថា “អាមេរិកនិងអង់គ្លេស បានប្រើកម្លាំងហួសហេតុដូចអ៊ីស្រាអែល ធ្វើដាក់ប៉ាឡេស្ទីនដែរ។ ពេលនេះ ពួកគេចង់ប្រែក្លាយសមុទ្រក្រហមទៅជាសមុទ្រឈាម ព្រោះយេម៉ែន ក៏ប្រតិកម្មមកវិញដែរថា ខ្លួននឹងសងសឹកតាមគ្រប់មធ្យោបាយដែលអាចធ្វើបានទៅលើកងកម្លាំងអាមេរិកនិងអង់គ្លេស”។

ការចោទប្រកាន់របស់គាត់ កើតឡើងបន្ទាប់ពីកងកម្លាំងអាមេរិក និងអង់គ្លេស បាញ់មីស៊ីលជាង១៥០គ្រាប់លើគោលដៅក្រុមហ៊ូធីជិត៣០ទីតាំងក្នុងប្រទេសយេម៉ែន​ ខណៈចលនាសកម្មប្រយុទ្ធនៅយេម៉ែន អះអាងថា សមាជិករបស់ខ្លួនចំនួន៥នាក់ត្រូវបានសម្លាប់ និង៦នាក់រងរបួស។

តួកគីជាសមាជិកណាតូ ហើយក៏បានថ្កោលទោសមិនសំចៃមាត់ផងដែរ ចំពោះអ៊ីស្រាអែលពាក់ព័ន្ធសង្គ្រាមនៅតំបន់ហ្គាហ្សា ព្រមទាំងបន្តស្តីបន្ទោសប្រទេសលោកខាងលិច ចំពោះការគាំទ្រយុទ្ធនាការរបស់អ៊ីស្រាអែលទៀតផង។

សូមបញ្ជាក់ជាថ្មី នៅថ្ងៃសៅរ៍ទី១៣ខែមករា សហរដ្ឋអាមេរិកបានវាយឆ្មក់តែឯងលើទីតាំងរ៉ាដារបស់ក្រុមហ៊ូធីមួយទៀតក្នុងប្រទេសយេម៉ែន ប៉ុន្តែនោះជាការវាយប្រហារទ្រង់ទ្រាយតូចជាង ការវាយប្រហារដែលរួមដៃជាមួយចក្រភពអង់គ្លេស នៅមួយថ្ងៃមុននេះ។

ប្រធានាធិបតីអាមេរិកលោក ចូ បៃដិន និយាយថា ការវាយឆ្មក់នេះ គឺដើម្បីឆ្លើយតបទៅនឹង ការវាយប្រហាររបស់ក្រុមហ៊ូធី លើកប៉ាល់ដឹកទំនិញក្នុងសមុទ្រក្រហម ហើយថាទីក្រុងវ៉ាស៊ីនតោនកំពុងអនុវត្តសិទ្ធិការពារខ្លួន។

យោងតាមការប៉ាន់ប្រមាណដោយទីបញ្ជាការកណ្តាលអាមេរិក (CENTCOM), ក្រុមហ៊ូធីបានវាយប្រហារលើកប៉ាល់ជាង២០គ្រឿងមកហើយ នៅសមុទ្រក្រហម ចាប់តាំងពីពាក់កណ្តាលខែវិច្ឆិកាឆ្នាំ២០២៣មក៕

អត្ថបទ៖ សុខ សុវណ្ណ

ចុចអាន៖ លទ្ធផលនៃការប្រយុទ្ធគ្នានៅតំបន់សមុទ្រក្រហម ធ្វើឲ្យតម្លៃប្រេង ហក់ឡើងមួយរំពេច