លោក គីម ជុងអ៊ុន ប្រកាសឲ្យកងទ័ព ត្រៀមធ្វើសង្គ្រាម

ខណៈពេលស្ថានការណ៍នៅឧបទ្វីបកូរ៉េ មិនមានភាពធូរស្បើយសោះអស់រយៈពេលប៉ុន្មានឆ្នាំមកហើយនោះ ស្រាប់តែមេដឹកនាំកូរ៉េខាងជើង លោក គីម ជុងអ៊ុន ប្រកាសឲ្យកងទ័ពជើងទឹករបស់ខ្លួន ពង្រឹងកម្លាំងត្រៀមធ្វើសង្គ្រាម។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ KCNA នៅថ្ងៃសុក្រទី២ខែកុម្ភៈ, លោក គីម បានប្រកាសបែបនេះ ពេលចុះត្រួតពិនិត្យរោងចក្រផលិតនាវា Nampho នៅឯកំពង់ផែធំមួយ លើឆ្នេរភាគខាងលិច ដើម្បីពិនិត្យការសាងសង់នាវាចម្បាំងថ្មីៗ។

លោក គីម និយាយថា “ការពង្រឹងកម្លាំងទ័ពជើងទឹក បានក្លាយជាបញ្ហាសំខាន់បំផុត ក្នុងការការពារអធិបតេយ្យដែនសមុទ្រ ប្រកបដោយភាពជឿជាក់របស់ប្រទេស និងបង្កើនការត្រៀមលក្ខណៈសម្រាប់សង្រ្គាមនាពេលនេះ”។

ក្នុងអំឡុងពេលនោះ លោក គីម ក៏ស្តាប់របាយការណ៍សង្ខេបអំពីការសាងសង់នាវាចម្បាំង ស្របតាមផែនការមេរយៈពេលប្រាំឆ្នាំ ដើម្បីពង្រឹងកម្លាំងយោធា​ ដែលដាក់ចេញក្នុងសមាជបក្សកាលពីខែមករាឆ្នាំ២០២១ផងដែរ។

សេចក្តីប្រកាសរបស់លោក គីម កើតឡើងបន្ទាប់ពី កូរ៉េខាងជើងទើបធ្វើតេស្តមីស៊ីលយុទ្ធសាស្រ្តប្រភេទថ្មី បាញ់ចេញពីនាវាមុជទឹក ដែលមានការត្រួតពិនិត្យផ្ទាល់ពីរូបគាត់។

មីស៊ីលនោះមានឈ្មោះ Pulhwasal-3-31 ហើយក្នុងការធ្វើតេស្ត មីស៊ីលបានហោះលើសមុទ្រនៅភាគខាងកើតប្រទេស និងវាយប្រហារចំគោលដៅលើកោះមួយ។

សូមបញ្ជាក់ មីស៊ីលផ្លោងរបស់កូរ៉េខាងជើង ត្រូវបានហាមឃាត់ដាច់ខាត ក្រោមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។

ទោះបីជាយ៉ាងណាក៏ដោយ ក្នុងរយៈពេលប៉ុន្មានខែថ្មីៗនេះ កូរ៉េខាងជើងបានសាកល្បងអាវុធជាច្រើនប្រភេទ ដែលរួមមានប្រព័ន្ធមីស៊ីលផ្លោងដែលកំពុងស្ថិតក្រោមការអភិវឌ្ឍ និងយានគ្មានមនុស្សបើកនៅក្រោមទឹកផងដែរ។

កាលពីឆ្នាំមុន កូរ៉េខាងជើងថែមទាំងសម្ពោធ នាវាមុជទឹកវាយប្រហារនុយក្លេអ៊ែរលើកដំបូងរបស់ខ្លួនទៀតផង ដោយអ្នកវិភាគនិយាយថា នាវាមុជទឹកនោះហាក់ដូចជាច្នៃពីនាវាមុជទឹកដែលមានស្រាប់ ដើម្បីផ្ទុកមីស៊ីលផ្លោង៕

អត្ថបទ៖ សុខ សុវណ្ណ

ចុចអាន៖ កូរ៉េខាងជើង ធ្វើតេស្តមីស៊ីលប្រភេទថ្មី បាញ់ចេញពីនាវាមុជទឹក