កូរ៉េខាងជើង ធ្វើតេស្តមីស៊ីលប្រភេទថ្មី បាញ់ចេញពីនាវាមុជទឹក

តាមសេចក្តីរាយការណ៍របស់ KCNA, នៅថ្ងៃចន្ទទី២៩ខែមករា កូរ៉េខាងជើងបានធ្វើតេស្តមីស៊ីលយុទ្ធសាស្រ្តប្រភេទថ្មី បាញ់ចេញពីនាវាមុជទឹក ដែលមានការត្រួតពិនិត្យផ្ទាល់ពីសំណាក់មេដឹកនាំ គីម ជុងអ៊ុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មីស៊ីលនេះមានឈ្មោះ Pulhwasal-3-31 ដែលកាលពីសប្តាហ៍មុន ទីក្រុងព្យុងយ៉ាងប្រកាសថា កំពុងស្ថិតក្រោមការផលិតនៅឡើយ។ កូរ៉េខាងជើងក៏និយាយដែរថា មីស៊ីលនេះ នឹងពង្រឹងកម្លាំងនុយក្លេអ៊ែររបស់កងទ័ពជើងទឹកខ្លួន។

ចំណែក តាមការចុះផ្សាយរបស់កាសែតផ្លូវការ Rodong Sinmun, មីស៊ីលនេះហោះលើសមុទ្រនៅភាគខាងកើតប្រទេស ហើយវាយប្រហារចំគោលដៅលើកោះមួយ។

ស្របពេលជាមួយគ្នានោះ លោក គីម បានហៅការសាកល្បងនេះថាជា ជោគជ័យដ៏សំខាន់ក្នុងការអនុវត្តផែនការ ធ្វើទំនើបកម្មកងទ័ពដ៏មានឥទ្ធិពល។

សូមបញ្ជាក់ មីស៊ីលផ្លោងរបស់កូរ៉េខាងជើង ត្រូវបានហាមឃាត់ដាច់ខាត ក្រោមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។

ទោះបីជាយ៉ាងណាក៏ដោយ ក្នុងរយៈពេលប៉ុន្មានខែថ្មីៗនេះ កូរ៉េខាងជើងបានសាកល្បងអាវុធជាច្រើនប្រភេទ ដែលរួមមានប្រព័ន្ធមីស៊ីលផ្លោងដែលកំពុងស្ថិតក្រោមការអភិវឌ្ឍ និងយានគ្មានមនុស្សបើកនៅក្រោមទឹកផងដែរ។

កាលពីឆ្នាំមុន កូរ៉េខាងជើងថែមទាំងសម្ពោធ នាវាមុជទឹកវាយប្រហារនុយក្លេអ៊ែរលើកដំបូងរបស់ខ្លួនទៀតផង ដោយអ្នកវិភាគនិយាយថា នាវាមុជទឹកនោះហាក់ដូចជាច្នៃពីនាវាមុជទឹកដែលមានស្រាប់ ដើម្បីផ្ទុកមីស៊ីលផ្លោង៕

អត្ថបទ៖ សុខ សុវណ្ណ

ចុចអាន៖ តើសង្គ្រាមក្នុងឧបទ្វីបកូរ៉េ អាចនឹងកើតឡើងពិតមែនឬទេ?