ដឹងទេ កិច្ចសម្ភាសន៍អ្នកកាសែត អាមេរិក ជាមួយលោក ពូទីន កាលថ្ងៃមុន មានអ្នកទស្សនាប៉ុន្មានលាននាក់?

កិច្ចសម្ភាសន៍រវាងអ្នកកាសែតអាមេរិក Tucker Carlson ជាមួយនឹងលោកប្រធានាធិបតីរុស្ស៊ី Vladimir Putin កាលពីថ្ងៃទី៨ ខែកុម្ភៈកន្លងទៅ បានបង្វែរចក្ខុប្រទេសលើពិភពលោកឲ្យផ្ដោតការយកចិត្តទុកដាក់ខ្លាំងមែនទែន ខណៈក្នុងកិច្ចសម្ភាសន៍នោះទៀតសោត ក៏មានអ្នកតាមដានទស្សនាមិនតិចនោះដែរ ។

យោងតាមការចុះផ្សាយដោយសារព័ត៌មានរុស្ស៊ី RT បានឲ្យដឹងថា គិតត្រឹមពេលនេះ កិច្ចសម្ភាសន៍រវាងអ្នកកាសែតអាមេរិកមកពីស្ថាប័ន Fox News ជាមួយលោក ពូទីន មានអ្នកទស្សនានៅលើឆាលែន YouTube ជាង ១៤ លាននាក់ ខណៈនៅលើបណ្ដាញសង្គម X មានអ្នកតាមដានទស្សនារហូតដល់ ១៩៤ លាននាក់ឯណោះ ។

ចំណែកប្រធានបទសម្រាប់កិច្ចសម្ភាសន៍ដែលចាក់ផ្សាយលើគេហទំព័រ tuckercarlson.com និងមានរយៈពេលជាង ២ ម៉ោងនៅលើទឹកដីនៃទីក្រុងមូស្គូនេះផងដែរ រួមមានទាំងភ្លើងសង្គ្រាមរវាងរុស្ស៊ី និងអ៊ុយក្រែ, ការបំផ្លិចបំផ្លាញបំពង់បង្ហូរប្រេង Nord Stream, ទំនាក់ទំនងរុស្ស៊ី-ណាតូ, បញ្ញាសិប្បនិម្មិត (AI) និងបញ្ហាជាច្រើនផ្សេងទៀតផងដែរ ។

ទន្ទឹមនោះ នេះក៏ជាលើកទីមួយផងដែរសម្រាប់លោកប្រធានាធិបតី ពូទីន ដែលផ្ដល់កិច្ចសម្ភាសន៍ជាមួយអ្នកកាសែតអាមេរិក ចាប់តាំងពីផ្ទុះភ្លើងសង្គ្រាមជាមួយកងកម្លាំងរដ្ឋាភិបាលទីក្រុងកៀវជិត ២ ឆ្នាំមកនេះ ស្របពេលដែលប្រទេសរុស្ស៊ីខិតជិតការបោះឆ្នោតប្រធានាធិបតីនាខែមីនានេះផងដែរ ។

គិតត្រឹមពេលនេះ ភ្លើងសង្គ្រាមរវាងរុស្ស៊ី និងអ៊ុយក្រែនបានចាយពេលជិត ២ ឆ្នាំហើយ បន្ទាប់ពីកងកម្លាំងរដ្ឋាភិបាលទីក្រុងមូស្គូលើកទ័ពចូលទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ២០២២ ខណៈបច្ចុប្បន្នលោកប្រធានាធិបតី Zelensky នៅតែបន្តដើរសុំជំនួយ ក៏ដូចជាសព្វាវុធ និងកែនទាហានជាបន្តបន្ទាប់ពីសម្ព័ន្ធមិត្តសំខាន់ៗដូចជា អឺរ៉ុប និងអាមេរិកជាដើម ។

ទោះបីជាមិនមានព័ត៌មានច្បាស់លាស់អំពីចំនួនអ្នកស្លាប់ និងរបួសក៏ដោយ ប៉ុន្តែតាមការប៉ាន់ប្រមាណរបស់អង្គការសហប្រជាជាតិបានឲ្យដឹងថា ជនស៊ីវិលអ៊ុយក្រែនជាង ១០,០០០ នាក់ត្រូវបានសម្លាប់ ខណៈយោងតាមរបាយការណ៍របស់កាសែត New York Times វិញបានអះអាងថា រហូតមកដល់ពេលនេះទាំងទាហានអ៊ុយក្រែន និងរុស្ស៊ីសរុបចូលគ្នាគឺមានជាង ៥ លាននាក់បានស្លាប់បាត់បង់ជីវិត ៕

ដោយ ៖ សុខ ជីវ័ន្ត

ចុចអាន ៖ រុស្ស៊ី បិទបញ្ជីចុះឈ្មោះបោះឆ្នោតប្រធានាធិបតី បេក្ខភាពមានលោក ពូទីន និងអ្នកនយោបាយ ៣ រូបទៀត