បុរស ចិនតៃវ៉ាន់ ដែលថតវីដេអូបំពុលសង្គមនៅ កម្ពុជា ធ្លាប់ធ្វើសកម្មភាព​ស្រដៀងគ្នាក្នុងទឹកដីខ្លួនឯង

សមត្ថកិច្ចខេត្តព្រះសីហនុកាលពីថ្ងៃទី១៥ ខែកុម្ភៈកន្លងទៅបានបញ្ជូនបុរសជនជាតិចិនតៃវ៉ាន់ ២ នាក់មានឈ្មោះ Lu Tsu-Hsien និងឈ្មោះ Chen Neng-Chuan ដែលបានហោះមកកម្ពុជា ហើយថតវីដេអូសម្ដែងអំពើឧក្រិដ្ឋនៅតាមបណ្ដាតំបន់មួយចំនួននៅក្នុងខេត្តឆ្នេរសមុទ្រមួយនេះ ទៅកាន់តុលាការពីបទបង្កអំពើញុះញង់ធ្វើឲ្យប៉ះពាល់ដល់សន្តិសុខសង្គមធ្ងន់ធ្ងរ ។

ទន្ទឹមនោះ នេះមិនមែនជាលើកដំបូងនោះទេដែលបុរសជនជាតិចិនតៃវ៉ាន់ឈ្មោះ Chen Neng-Chuan ថតវីដេអូក្លែងធ្វើសកម្មភាពបង្កភាពវឹកវរបែបនេះ ពោលកាលពីឆ្នាំ ២០១២ ម្ចាស់អគារនៅតំបន់ Kinmen និង Changhua លើកោះតៃវ៉ាន់ ធ្លាប់បានដាក់ពាក្យប្តឹងអ្នកផលិតមាតិការរូបនេះផងដែរ ក្រោយដើរថតផ្ដេសផ្ដាស និងគ្មានច្បាប់ទម្លាប់នៅក្នុងតំបន់ ។

យោងតាមការចេញផ្សាយដោយសារព័ត៌មាន Taiwan News បានឲ្យដឹងថា កាលពីឆ្នាំនោះ បុរសឈ្មោះ Chen Neng-Chuan បានទម្លាយចូលទៅក្នុងបរិវេណមន្ទីរពេទ្យមួយកន្លែងនៅតំបន់ Kinmen ទាំងដែលគ្មានច្បាប់អនុញ្ញាត និងបានអះអាងថា រូបគេត្រូវបានខ្មោចលង ហើយបានកុហកទៀតថា មន្ទីរពេទ្យនោះជាកន្លែងឃាតកម្ម ។

ទោះយ៉ាងណា នៅពេលនោះ Chen Neng-Chuan ហាក់ដូចជាមិនទទួលទោសទណ្ឌ ឬរងពិន័យ ក៏ដូចជាជាប់ក្ដីក្ដាំណាមួយឡើយ ទើបរុញឲ្យអ្នកផលិតមាតាការរូបនេះបានចិត្ត និងបន្តសកម្មភាពដ៏ស្មោគគ្រោកជាហូរហែ រហូតឈានដល់បង្កភាពវឹកវរមកដល់ទឹកដីនៃខេត្តព្រះសីហនុ ។

ពាក់ព័ន្ធនឹងបញ្ហានេះដែរ ការិយាល័យស៊ើបអង្កេតឧក្រិដ្ឋកម្មរបស់តៃវ៉ាន់បាននិយាយថា ខ្លួនគោរពសិទ្ធិរបស់ប៉ូលិសកម្ពុជាក្នុងការស៊ើបអង្កេត ក៏ដូចជាសិទ្ធិសម្រេចណាមួយ ហើយមន្ត្រីទំនាក់ទំនងរបស់ខ្លួនដែលឈរជើងប្រចាំនៅកម្ពុជានឹងរក្សាទំនាក់ទំនងយ៉ាងជិតស្និទ្ធជាមួយការិយាល័យតំណាងរបស់តៃវ៉ាន់នៅកម្ពុជា រួមជាមួយនឹងប៉ូលិសកម្ពុជាផងដែរ ។

គួរបញ្ជាក់ថា នៅថ្ងៃទី១១ ខែកុម្ភៈ បុរសជនជាតិចិនតៃវ៉ាន់ទាំងពីរនាក់បាន​ធ្វើដំណើរ​មកដល់​រាជ​ធានីភ្នំពេញ ហើយដើររកអគារមួយចំនួនដើម្បីថតសម្ដែង ប៉ុន្តែ​ដោយសារតែពេលវេលានៅភ្នំពេញមិនអំណោយផល និងមិនមាន​ឱកាស ជនសង្ស័យទាំងពីរក៏បន្ត​ដំណើរទៅខេត្តព្រះសីហនុ ដោយឈប់ទិញសម្ភារស្បែកជើង មួក ស្រោមកាំភ្លើងនៅតំបន់ទឹកថ្លា ។

​នៅយប់ថ្ងៃទី១២ ខែកុម្ភៈ ជនសង្ស័យទាំងពីរនាក់បានចុះទៅអាគារ X នៅតំបន់អូរត្រេះ ខេត្ត​ព្រះសីហនុ ​ហើយធ្វើសកម្មភាព​ថតសម្ដែងថា ខ្លួនកំពុងត្រូវគេចាប់ជំរិត និងធ្វើទារុណកម្ម ។ លុះនៅថ្ងៃបន្ទាប់ បុរសរូបនេះក៏បានចេញដំណើរទៅទីតាំងនោះម្ដងទៀតដើម្បីធ្វើសកម្មភាពថត ដោយ​ប្រាប់ពីស្ថានភាពរបួសស្នាម និងការរត់គេចពីទីតាំងចាប់ជំរិត ។

ដោយសារតែសកម្មភាពបំពុលសង្គមខុសពីការពិតនេះហើយ ទើបកម្លាំងសមត្ថកិច្ចជំនាញបើកការស្រាវជ្រាវរហូតឈានដល់ការចាប់ខ្លួន និងដកហូតបាន​ស្រោមមុខខ្មោច​ កាំភ្លើងជ័រ​ សំលៀកបំពាក់ទាហានប៉ារ៉ា សម្ភារឧបករណ៍ផលិត Video Live និងសម្ភារបម្រើឲ្យការថតវីដេអូមួយចំនួទៀត ខណៈពេលនេះ តុលាការសាលាដំបូងខេត្តព្រះសីហនុបានសម្រេចផ្ដន្ទាទោសបុរសជនជាតិចិនតៃវ៉ាន់ ២ នាក់ឲ្យជាប់ពន្ធនាគាររយៈពេល ២ ឆ្នាំ និងពិន័យប្រាក់ម្នាក់ ៤ លានរៀល ៕

ដោយ ៖ សុខ ជីវ័ន្ត

ចុចអាន ៖ តុលាការផ្ទន្ទាទោសបុរសជនជាតិចិនតៃវ៉ាន់​ ២ នាក់ជាប់​ពន្ធនា​គារ ២ ឆ្នាំ ​និងពិន័យប្រាក់ម្នាក់ ៤ លានរៀល