បាក់អណ្ដូងរ៉ែមាសនៅ វ៉េណេស៊ុយអេឡា ស្លាប់កម្មករ ១៤ នាក់

យ៉ាងហោចណាស់កម្មករ ២៣ នាក់បានស្លាប់នៅភាគកណ្តាលប្រទេសវ៉េណេស៊ុយអេឡា បន្ទាប់ពីហេតុការណ៍បាក់អណ្តូងរ៉ែមាសដែលដំណើរការដោយខុសច្បាប់ ស្របពេលដែលមនុស្សរាប់សិបនាក់កំពុងធ្វើការ ។ នេះបើយោងតាមការចេញផ្សាយរបស់សារព័ត៌មាន AP នៅថ្ងៃទី២២ ខែកុម្ភៈនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីក្នុងតំបន់បានប្រាប់ទីភ្នាក់ងារសារព័ត៌មាន AFP កាលពីថ្ងៃពុធថា សាកសពប្រហែល ២៣ នាក់ត្រូវបានក្រុមអ្នកជួយសង្គ្រោះយកចេញពីអណ្តូងរ៉ែបើកចំហដែលគេស្គាល់ថា Bulla Loca នៅក្នុងតំបន់ព្រៃនៃរដ្ឋ Bolivar ខណៈមនុស្សប្រហែល ២០០ នាក់បានធ្វើការនៅក្នុងអណ្តូងរ៉ែ ពេលដែលមានការបាក់ស្រុតនេះ។

រដ្ឋលេខាធិការសន្តិសុខពលរដ្ឋនៃរដ្ឋ Bolivar បាននិយាយថា អ្នករងរបួសកំពុងត្រូវបានបញ្ជូនទៅកាន់មន្ទីរពេទ្យក្នុងទីក្រុង Ciudad ដែលស្ថិតនៅចម្ងាយ ៧៥០ គីឡូម៉ែត្រភាគអាគ្នេយ៍នៃរដ្ឋធានី Caracas ខណៈមកដល់ពេលនេះក្រុមជួយសង្គ្រោះក៏កំពុងត្រូវបានហោះហើរចេញពីទីក្រុង Caracas ដើម្បីជួយក្នុងការស្វែងរកបន្ថែមទៀតផងដែរ ។

 គួរបញ្ជាក់ថា តំបន់ Bolivar សម្បូរទៅដោយរ៉ែមាស ពេជ្រ ដែក និងរ៉ែថ្មខៀវជាដើម ។ ក្រៅ​ពី​រ៉ែ​ ក៏​មាន​ឧស្សាហ​កម្ម​ចម្រាញ់​ចេញ​ដោយ​ខុស​ច្បាប់​ផង​ដែរ ។ អ្នកស្រុកនិយាយថា បើទោះបីជា លក្ខខណ្ឌការងារមិនមានសុវត្ថិភាពក៏ដោយ តែពួកគេនៅតែបង្ខំចិត្តធ្វើការ ដោយសារតែជីវភាពខ្វះខាតខ្លាំង ។ កាលពីខែធ្នូឆ្នាំមុន ក៏មានមនុស្សយ៉ាងហោចណាស់ ១២ នាក់បានស្លាប់ផងដែរក្នុងតំបន់ដូចគ្នានេះ នៅពេលដែលអណ្តូងរ៉ែមួយនៅក្នុងសហគមន៍ជនជាតិដើមភាគតិច Ikabaru បានបាក់ស្រុត ៕

អត្ថបទ ៖ ប៊ុន សុភាព