មីស៊ីលរុស្ស៊ី ធ្លាក់ក្បែរសន្និសីទកាសែតរវាងលោក Zelensky និងនាយករដ្ឋមន្ត្រី​ក្រិក ក្នុងទីក្រុង Odesa

តាមការចុះផ្សាយរបស់ Reuters កាលពីថ្ងៃពុធទី៦ខែមីនា, ការ​ផ្ទុះ​ដ៏​សាហាវ ​បានរញ្ជួយ​ទីក្រុង​កំពង់ផែ Odesa ភាគ​ខាង​ត្បូង​ប្រទេស​អ៊ុយក្រែន ខណៈពេលលោក​ប្រធានាធិបតី Volodymyr Zelensky កំពុង​ធ្វើសន្និសីទកាសែត​ជាមួយ​នាយករដ្ឋមន្ត្រី​ក្រិកលោក Kyriakos Mitsotakis ហើយនោះត្រូវបានគេដឹងថា ជាមីស៊ីលរបស់រុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងសន្និសីទ នាយករដ្ឋមន្ត្រីក្រិកនិយាយថា “យើងបានឮសំឡេងស៊ីរ៉ែន និងការផ្ទុះកើតឡើងនៅជិតយើង។ យើងរត់ទៅពួនមិនទាន់ឡើយ។ នេះគឺជាបទពិសោធន៍ដ៏ជូរចត់មួយ វាខុសពីការអានព័ត៌មានសង្រ្គាមនៅក្នុងកាសែត ហើយស្តាប់ដោយត្រចៀក ពេលឃើញផ្ទាល់ភ្នែកទើបដឹង”។

ពាក់ព័ន្ធហេតុការណ៍នេះ កងទ័ពជើងទឹកអ៊ុយក្រែនបញ្ជាក់ថា មនុស្ស៥នាក់ត្រូវបានសម្លាប់ ហើយបើតាមការផ្សាយរបស់ BBC, ​គណៈប្រតិភូ​ទាំង​ពីរ មិនមានអ្នក​រង​របួស​ទេ។

ទោះបីជាយ៉ាងណាក៏ដោយ រុស្ស៊ីនិយាយថា ខ្លួនបានកំណត់គោលដៅលើទីតាំងផលិតយន្តហោះគ្មានមនុស្សបើកក្នុងដែនសមុទ្រ នៅកំពង់ផែពាណិជ្ជកម្មរបស់ទីក្រុងនេះ អំឡុងការវាយប្រហារកាលពីថ្ងៃពុធ ប៉ុន្តែលោក Zelensky ចោទទីក្រុងមូស្គូថា “រុស្ស៊ីមិនខ្វល់ពីអ្នកណាទាំងអស់ ពួកគេពិតជាឆ្កួត”។

ស្របពេលជាមួយគ្នានោះដែរ ប្រធានគណៈកម្មការអឺរ៉ុប លោកស្រី Ursula von der Leyen បានបង្ហោះលើប្រព័ន្ធផ្សព្វផ្សាយសង្គមថា លោកស្រីសូមថ្កោលទោសចំពោះ “ការវាយប្រហារដ៏ឃោរឃៅនៅ Odesa ក្នុងអំឡុងពេលដំណើរទស្សនកិច្ចរបស់ថ្នាក់ដឹកនាំ”។

សូមបញ្ជាក់ថា ការវាយប្រហារនេះកើតឡើងបន្ទាប់ពីមនុស្ស១២នាក់ រួមទាំងកុមារ៥នាក់ផងដែរ ត្រូវបានសម្លាប់ក្នុងការវាយប្រហារដោយយន្តហោះគ្មានមនុស្សបើករបស់រុស្ស៊ី នៅទីក្រុង Odesa កាលពីថ្ងៃសៅរ៍សប្តាហ៍មុន។

នៅថ្ងៃទី២៤ខែកុម្ភៈឆ្នាំ២០២២ រុស្ស៊ី បានបើកប្រតិបត្តិការយោធាពិសេសក្នុងប្រទេសអ៊ុយក្រែន ក្នុងគោលបំណងរំដោះតំបន់ Donbass ព្រោះថាបើយោងតាមភាគីរុស្ស៊ី, នៅទីនោះប្រជាជននៃសាធារណរដ្ឋ Donetsk និង Lugansk បានរស់នៅក្រោមគ្រាប់ផ្លោងរបស់កងកម្លាំងទីក្រុងកៀវ សឹងរាល់ថ្ងៃ។ មិនត្រឹមប៉ុណ្ណឹង ទីក្រុងមូស្គូថែមទាំងអះអាងដែរថា ខ្លួនចង់លុបបំបាត់មនោគមវិជ្ជាណាស៊ី ក៏ដូចជាភាពគ្មានយោធារបស់អ៊ុយក្រែន ទៀតផង៕

អត្ថបទ៖ សុខ សុវណ្ណ

ចុចអាន៖ EU ប្រាប់ឲ្យអ៊ុយក្រែន ចាយលុយទិញអាវុធ កុំរំពឹងបានទទេៗ ពេក