Connect with us

ព័ត៌មានអន្ដរជាតិ

ហេតុអ្វី រញ្ជួយដីខ្លាំងប៉ុណ្ណឹងហើយ អគារខ្ពស់បំផុតរបស់តៃវ៉ាន់ នៅតែអាចស៊ូទ្រាំមិនបាក់រលំបាន?

បានផុស

នៅ

គ្រោះរញ្ជួយដីកម្រិតធ្ងន់បានវាយប្រហារកោះតៃវ៉ាន់ កាលពីថ្ងៃពុធទី៣ខែមេសា ដោយបណ្តាលឲ្យមានមនុស្សស្លាប់និងរបួស ហើយថែមទាំងផ្តួលរំលំអគារមួយចំនួនទៀតផង។

(រូបថត៖ Getty)
សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ុន្តែអ្វីដែលគេគ្រប់គ្នាចាប់អារម្មណ៍និងមានចម្ងល់ខ្លាំងបំផុតនោះគឺថា អគារកម្ពស់ខ្ពស់បំផុតរបស់កោះតៃវ៉ាន់ Taipei 101 នៅតែឈរយ៉ាងរឹងមាំទប់ទល់ជាមួយកម្លាំងរញ្ជួយ ដោយគ្មានខូចខាតអ្វីសោះ។ តើនេះបណ្តាលមកពីមូលហេតុអ្វីទៅ?

ចម្លើយគឺថា អគារខ្ពស់កប់ពពកកម្ពស់១០១ជាន់របស់តៃវ៉ាន់មួយនេះ មានភ្ជាប់ជាមួយឧបករណ៍ពិសេស ដើម្បីការពារពីរញ្ជួយដីនិងខ្យល់បក់ខ្លាំង៖ នោះគឺប៉ោលដែកទម្ងន់៦០០តោន ដែលព្យួរនៅកម្ពស់ជាង៣០០ម៉ែត្រពីលើដី។

(រូបថត៖ GoodyO)

ប៉ោលដែកពណ៌មាសមួយនេះ គឺព្យួរនៅជាន់ទី៩២របស់អគារ ហើយពេលដែលអគារផ្អៀងទៅម្ខាង ប៉ោលដែកនេះនឹងយោលទៅទិសដៅម្ខាងផ្សេង ដើម្បីទប់លំនឹងរបស់អគារ។ ឧទាហរណ៍ថា បើខ្យល់បោកបក់ឬរញ្ជួយដីធ្វើឲ្យអគារទ្រេតទៅខាងឆ្វេង ដុំប៉ោលនោះ នឹងយោលមកខាងស្តាំ ដើម្បីរក្សាលំនឹងអគារឲ្យមានតុល្យភាព។

អគារខ្ពស់នេះ ត្រូវបានរចនាឡើងដោយក្រុមហ៊ុនក្នុងស្រុកឈ្មោះ C.Y. Lee & Partners ហើយដោយសារតែស្ថានភាពភូមិសាស្រ្តរបស់តៃវ៉ាន់ ស្ថិតនៅលើខ្សែបន្ទាត់ភ្នំភ្លើង Ring Of Fire ទើបក្រុមហ៊ុនគិតគូរ គូសប្លង់អគារឲ្យមានភាពបត់បែនគ្រប់គ្រាន់ ដើម្បីទប់ទល់នឹងការរញ្ជួយដី និងខ្យល់ព្យុះទីហ្វុង។

(រូបថត៖ Alvinku)

អគារ Taipei 101 បានពន្យល់នៅលើគេហទំព័ររបស់ខ្លួនថា ជាមួយអង្កត់ផ្ចិត៥.៤ម៉ែត្រ ដុំនេះត្រូវបានធ្វើឡើងដោយបន្ទះដែករឹងចំនួន៤១ស្រទាប់ ដែលផ្សារភ្ជាប់គ្នាដើម្បីបង្កើតជារង្វង់មូល។

ចំណែកបើយោងតាមក្រុមហ៊ុន A+H Tuned Mass Dampers ដែលជួយបង្កើតឧបករណ៍នេះ បានឲ្យដឹងថា ដុំប៉ោលដែកទម្ងន់៦០០តោននេះ អាចជួយកាត់បន្ថយចលនារបស់អគារបាន ៤០%។ 

(រូបថត៖ Getty)

ការសាងសង់អគារ Taipei 101 បានចាប់ផ្តើមក្នុងឆ្នាំ១៩៩៩ ហើយបញ្ចប់ទាំងស្រុង មុនថ្ងៃចូលឆ្នាំសកល២០០៤ រួចក៏បើកជាសាធារណៈ ហើយពេលនោះ វាជាអគារខ្ពស់បំផុតលើពិភពលោក។ គ្រប់ជាន់នៃអគារ ត្រូវបានដំឡើងជាមួយនឹងដែកទ្រទម្ងន់ ដែលរត់ពីស្នូលអគារទៅជួរឈរខាងក្រៅរបស់អគារ ដើម្បីបង្កើនភាពរឹងមាំ។

សូមបញ្ជាក់ថា គិតត្រឹមព្រឹកថ្ងៃព្រហស្បតិ៍ទី៤ខែមេសា តួលេខមនុស្សបាត់បង់ជីវិតក្នុងគ្រោះរញ្ជួយដីដ៏ធ្ងន់ធ្ងរបំផុតនារយៈពេល២៥ឆ្នាំរបស់កោះ តៃវ៉ាន់ បានកើនដល់៩នាក់ ខណៈ១០០០នាក់រងរបួស លើសពីនេះ ក៏មានអគារមួយចំនួនត្រូវបាក់រលំផងដែរ។

គ្រោះរញ្ជួយដីកម្រិត ៧.៤រ៉ិចទ័រនេះ មានចំណុចកណ្តាលក្បែរកោះ Hualien ជាមួយនឹងជម្រៅ៣៤.៨គីឡូម៉ែត្រ៕

អត្ថបទ៖ សុខ សុវណ្ណ

ចុចអាន៖ មនុស្សស្លាប់ដោយរញ្ជួយដីនៅតៃវ៉ាន់ កើនឡើងបន្ថែម ខណៈ ១០០០នាក់ រងរបួស

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានជាតិ២ នាទី មុន

មន្ត្រីការទូតមួយរូប ត្រូវបានតែងតាំងជានាយកខុទ្ទកាល័យសម្ដេចតេជោ ប្រធានព្រឹទ្ធសភា

កីឡា៣ នាទី មុន

មិនធម្មតា! ឥណ្ឌូណេស៊ី ដាក់គោលដៅដេញថ្លៃធ្វើជាម្ចាស់ផ្ទះកីឡាអូឡាំពិក២០៣៦

ព័ត៌មានអន្ដរជាតិ២២ នាទី មុន

រុស្ស៊ី គំរាមថា បារាំង នឹងជួបមហន្តរាយ បើហ៊ានបញ្ជូនទ័ពទៅ អ៊ុយក្រែន

សន្តិសុខសង្គម២៧ នាទី មុន

បុគ្គលឈ្មោះ ដែន សូនី និងស្ត្រីរងគ្រោះបានចូលខ្លួនបំភ្លឺរួចហើយ រង់ចាំតែបទបញ្ចាពីថ្នាក់ដឹកនាំថាតើត្រូវអប់រំ ឬចាត់វិធានការច្បាប់

ព័ត៌មានជាតិ២៩ នាទី មុន

ពលករខ្មែរវិលត្រឡប់ពីថៃ សប្បាយចិត្តដែលរាជរដ្ឋាភិបាលមិនយក​ថ្លៃសេវាទិដ្ឋាការចេញ-ចូល អំឡុងចូលឆ្នាំ

Sokha Hotels

ព័ត៌មានពេញនិយម