អាមេរិក ចាប់ដៃ ជប៉ុន ផលិតមីស៊ីលស្ទាក់ចាប់អាវុធល្បឿនលឿនជាងសំឡេង តម្លៃ ៣ពាន់លានដុល្លារ

សារព័ត៌មាន Kyodo News បានដកស្រង់ប្រភពពីមន្ត្រីមន្ទីរបញ្ចកោណដែលនិយាយថា សហរដ្ឋអាមេរិក-ជប៉ុន នឹងជះប្រាក់ជាង៣ពាន់លានដុល្លារ ដើម្បីអភិវឌ្ឍមីស៊ីលប្រភេទថ្មីរួមគ្នា ជាមួយសមត្ថភាពស្ទាក់ចាប់អាវុធល្បឿនលឿនជាងសំឡេង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោង Glide Phase Interceptor (GPI) ត្រូវគេរំពឹងថា នឹងសម្រេចបានក្នុងឆ្នាំ២០៣០ហើយប្រទេសជប៉ុន នឹងរួមចំណែកប្រាក់ចំនួន១ពាន់លានដុល្លារដល់គម្រោងមួយ ដែលគេដឹងថា ប្រធានាធិបតីអាមេរិក Joe Biden និងនាយករដ្ឋមន្ត្រីជប៉ុន Fumio Kishida បានឯកភាពគ្នាតាំងតែពីខែសីហា ឆ្នាំ២០២៣មកម្ល៉េះ។

មីស៊ីលថ្មីនេះ នឹងត្រូវបានផលិតឡើងដើម្បីបាញ់ទម្លាក់អាវុធមានល្បឿនលឿនជាងសំឡេងដែល កំពុងស្ថិតក្នុងដំណាក់កាលហោះហើរអំណោយផលសម្រាប់ការបាញ់ មុនពេលចូលទៅក្នុងបរិយាកាស។

តាមការបញ្ជាក់ពីមន្ទីរបញ្ចកោណ “ការពង្រឹងសមត្ថភាពប្រឆាំងអាវុធល្បឿនលឿនជាងសំឡេង គឺជាតម្រូវការដ៏ចាំបាច់ សម្រាប់ប្រទេសទាំងពីរ ក្នុងការដោះស្រាយបញ្ហាប្រឈមនានានៅតំបន់ឥណ្ឌូប៉ាស៊ីហ្វិក”។

គម្រោង GPI នេះទៀតសោត គឺកើតឡើងស្របពេលសហរដ្ឋអាមេរិក កំពុងដើរតាមពីក្រោយរុស្ស៊ីនិងចិន ក្នុងការអភិវឌ្ឍអាវុធល្បឿនលឿនជាងសំឡេង ជាពិសេសមីស៊ីលដែលធ្វើដំណើរលឿនជាងប្រាំដងនៃល្បឿនសំឡេង។

សូមបញ្ជាក់ថា នេះគឺ​ជា​លើក​ទី​២​ហើយ ​ដែល​ជប៉ុន​និង​អាមេរិក​សម្រេចរួមគ្នា​បង្កើត​មីស៊ីល​ស្ទាក់ចាប់ ក្រោយការផលិត Standard Missile-3 Block 2A។

មីស៊ីលប្រភេទនេះ មានតម្លៃ២៥លានដុល្លារ ជាមួយល្បឿនលឿនជាងសំឡេង១៣ដង ហើយត្រូវបានដាក់ឲ្យធ្វើប្រតិបត្តិការក្នុងឆ្នាំ២០១៤ មកទល់បច្ចុប្បន្ន៕

អត្ថបទ៖ សុខ សុវណ្ណ

ចុចអាន៖ លោកខាងលិចភ័យខ្លួន ពេលដឹង ចិន អភិវឌ្ឍមីស៊ីលល្បឿនលឿនជាងសំឡេង ជោគជ័យ