តៃវ៉ាន់ ធ្លាប់មានប្រវត្តិបែកបាក់ ខណៈជិតដល់ថ្ងៃប្រធានាធិបតីថ្មីឡើងកាន់តំណែង

តៃវ៉ាន់កំពុង​ត្រៀមរៀបចំ​សម្រាប់​ការ​ស្បថចូល​កាន់​តំណែង​ប្រធានាធិបតី​ទី​ ៨ ​របស់​ខ្លួន​នៅ​សប្តាហ៍​ក្រោយ​ ប៉ុន្តែរឿងរ៉ាវនេះដែរក៏មានអ្នកតស៊ូមតិមួយចំនួន​លើកឡើងពី​កេរដំណែល​របស់​ប្រធានាធិបតី​ដំបូង​របស់​កោះ​នេះគឺ​លោក Chiang Kai-shek ដែលបានដឹកនាំក្រោម​ប្រវត្ដិ​សាស្រ្ដ​បែកបាក់ដ៏ជូរចត់ ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១៧ ខែឧសភា​ ។

បើក្រឡេកមកមើលពីប្រវត្តិសាស្រ្តកោះនេះ សម្រាប់អ្នកខ្លះគិតថា លោក Chiang Kai-shek ដែលជាប្រធានាធិបតីទី ១ របស់កោះនេះ គឺជាវីរបុរសជួយរំដោះប្រទេស ប៉ុន្តែសម្រាប់អ្នកផ្សេងទៀត គាត់គឺជាមេដឹកនាំផ្តាច់ការដ៏ឃោរឃៅក្នុងសម័យ White Terror ដែលអូសបន្លាយពេលរហូតដល់ឆ្នាំ ១៩៩២ ។

អស់ជាច្រើនទសវត្សរ៍មកហើយ រឿងជម្លោះទាំងនេះបានបែងចែកសង្គមរបស់តៃវ៉ាន់ ខណៈឥឡូវនេះកម្លាំងទ័ពក៏កំពុងបង្កើនការព្រួយបារម្ភថាតើវាអាចប៉ះពាល់ដល់សមត្ថភាពរបស់តៃវ៉ាន់ក្នុងការបង្កើនការការពារបង្រួបបង្រួមប្រឆាំងនឹងចិនដែរឬទេ ខណៈដែលចិននៅតែអះអាងទាមទារកោះនេះ ។

លោកChiang Kai-shek

គួររំឭកថា នៅថ្ងៃទី២៨ ខែកុម្ភៈ ឆ្នាំ១៩៤៧ កងទ័ព Kuomintang (KMT) ដឹកនាំដោយលោក Chiang Kai-shek​ បានបង្ក្រាបការបះបោររបស់ជនជាតិដើមតៃវ៉ាន់ ដោយបានសម្លាប់មនុស្សរហូតដល់ ២៨,០០០ នាក់ដែលគេហៅថាជាហេតុការណ៍ថ្ងៃទី២៨ ខែកុម្ភៈ និងបន្តរហូតដល់យុគសម័យច្បាប់អាជ្ញាសឹករយៈពេល ៤ ទស្សវត្សដែលបានធ្វើឲ្យមនុស្សរាប់ពាន់នាក់ទៀតបានបាត់បង់ជីវិត ។

ប្រវត្តិដ៏សោកសៅនេះបានធ្វើឲ្យមានការគិតគូររកយុត្តិធម៌ជាផ្លូវការក្នុងឆ្នាំ ២០១៨ នៅពេលដែលរដ្ឋាភិបាលតៃវ៉ាន់បានបង្កើតគណៈកម្មការយុត្តិធម៌អន្តរកាលរបស់ខ្លួនដោយយកគំរូតាមគំនិតផ្តួចផ្តើមការពិត និងការផ្សះផ្សានៅអាហ្វ្រិក អាមេរិកឡាទីន និងអាមេរិកខាងជើង ដើម្បីដោះស្រាយការរំលោភសិទ្ធិមនុស្សជាប្រវត្តិសាស្ត្រ និងអំពើឃោរឃៅផ្សេងៗទៀត ។

ទោះជាយ៉ាងណាក៏ដោយ នៅពេលដែលគណៈកម្មការនេះបានបិទបញ្ចប់ក្នុងខែឧសភា ឆ្នាំ ២០២២ អ្នកតស៊ូមតិ និងអ្នកសង្កេតការណ៍បាននិយាយថា មានតែការពិតតិចតួចប៉ុណ្ណោះត្រូវបានរកឃើញ ហើយស្ទើរតែមិនមានការផ្សះផ្សាណាមួយឡើយ ។

គួរបញ្ជាក់ថា ប្រធានាធិបតីថ្មីតៃវ៉ាន់លោក Lai Ching-te ដែលបានឈ្នះការបោះឆ្នោតកាលពីថ្ងៃទី១៣ ខែមករាកន្លងទៅ នឹងស្បថចូលកាន់តំណែង បន្ទាប់ពីលោកស្រី Tsai Ing-wen ដែលផុតអាណត្តិនៅថ្ងៃទី២០ ខែឧសភាខាងមុខនេះ ខណៈការជាប់ឆ្នោតរបស់លោកក៏បង្កឲ្យមានភាពតានតឹងរវាងងចិន និងតៃវ៉ាន់បន្ថែមទៀតផងដែរ ៕

អត្ថបទ៖ ប៊ុន សុភាព