ព័ត៌មានអន្ដរជាតិ

ចិន នឹងមិនចូលរួមសន្និសីទសន្តិភាពអ៊ុយក្រែននៅប្រទេសស្វីសទេ បើគ្មានវត្តមានរុស្ស៊ី

បានផុស

២ years មុន

នៅ

ថ្ងៃសៅរ៍ ១ មិថុនា ២០២៤

ដោយ

Chheang

ក្រសួងការបរទេសចិន បានប្រាប់ឲ្យដឹងកាលពីថ្ងៃទី៣១ ខែឧសភាកន្លងទៅថា រដ្ឋាភិបាលក្រុងប៉េកាំង នឹងមិនទៅចូលរួមក្នុងសន្និសីទសន្តិភាពអ៊ុយក្រែន ដែលនឹងប្រព្រឹត្តទៅនៅក្នុងប្រទេសស្វីស នាពាក់កណ្ដាលខែមិថុនាខាងមុខឡើយ។ ចិន ថា សន្និសីទសន្ដិភាពគួរតែមានវត្តមានពីភាគីជម្លោះទាំងសងខាង ពោលគឺអ៊ុយក្រែន និងរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាលស្វីស កំពុងស្វែងរកការចូលរួមពីគ្រប់មជ្ឈដ្ឋានពាសពេញពិភពលោក សម្រាប់កិច្ចប្រជុំ ដែលមានគោលបំណងធំគឺបង្កើតឲ្យបានដំណើរការសន្តិភាពនៅក្នុងប្រទេសអ៊ុយក្រែន ដែលកំពុងពើបប្រទះនឹងបញ្ហាសង្គ្រាមជាមួយរុស្ស៊ី។ យ៉ាងណាមិញ កិច្ចប្រជុំមួយនេះពុំមានការអញ្ជើញឲ្យរុស្ស៊ីទៅចូលរួមនោះឡើយ។

លោកស្រី Mao Ning អ្នកនាំពាក្យក្រសួងការបរទេសចិន បានប្រាប់ឲ្យដឹងថា ក្រុងប៉េកាំងតែងទទូចឲ្យមានសន្និសីទសន្ដិភាពអន្តរជាតិ ដោយមានការចូលរួមពីភាគីពាក់ព័ន្ធទាំងអ៊ុយក្រែន និងរុស្ស៊ី ក្រោមការពិភាក្សាដោយយុត្តិធម៌ និងស្មើភាព។ លោកស្រីថា អវត្តមានរបស់រុស្ស៊ី គឺខុសពីការរំពឹងទុករបស់ចិន ដែលជាហេតុនាំឲ្យចិនពិបាកទៅចូលរួមក្នុងកិច្ចប្រជុំមួយនេះណាស់។

ពាក់ព័ន្ធនឹងបញ្ហានេះ លោក Sergey Lavrov រដ្ឋមន្ត្រីក្រសួងការបរទេសរុស្ស៊ី បានប្រកាសថា ជំនួសឲ្យស្វីស ប្រទេសចិនគួរតែរៀបចំសន្និសីទសន្តិភាពមួយ ដែលអញ្ជើញទាំងរុស្ស៊ី និងអ៊ុយក្រែនទៅចូលរួម។

លោក វ៉្លាឌឺមៀ ពូទីន មេដឹកនាំរុស្ស៊ី និងលោក ស៊ី ជីនពីង មេដឹកនាំចិន (រូបភាព៖ Reuters)

សូមបញ្ជាក់ថា លោក វ៉្លាឌឺមៀ ពូទីន ធ្លាប់បាននិយាយនៅក្នុងដំណើរទស្សនកិច្ចក្នុងប្រទេសចិនកាលពីពាក់កណ្ដាលខែឧសភាកន្លងទៅថា អ៊ុយក្រែនទំនងជាអាចនឹងប្រើប្រាស់កិច្ចពិភាក្សាប្រទេសស្វីស ដើម្បីព្យាយាមកៀរគរការគាំទ្រពីបណ្ដាប្រទេសជាច្រើនទៀត សម្រាប់គាំទ្រការទាមទាររបស់អ៊ុយក្រែនឲ្យរុស្ស៊ីដកទ័ពចេញទាំងស្រុងពីសមរភូមិ។ លោក ពូទីន ថា មានតែចិនទេ ដែលអាចរៀបចំគម្រោងដោះស្រាយសន្តិភាពសម្រាប់ជម្លោះនេះបាន ដោយសារចិនមានការយល់ដឹងច្បាស់ពីអ្វីដែលស្ថិតនៅពីក្រោយវិបត្តិដែលកំពុងកើតឡើងនេះ៕

ដោយ៖ ឈាង