ព័ត៌មានអន្ដរជាតិ

ហ្វីលីពីន ត្រៀមផលិតនាវាចម្បាំង និងនាវាជ្រមុជទឹកដោយខ្លួនឯង

បានផុស

៥ ម៉ោង មុន

នៅ

ថ្ងៃពុធ ១០ កក្កដា ២០២៤

ដោយ

ហ្វីលីពីន គ្រោងនឹងសាងសង់នាវាចម្បាំង និងនាវាជ្រមុជទឹកនៅឯរោងចក្រផលិតកប៉ាល់នៅក្នុងប្រទេសដោយខ្លួនឯង ជំនួសឲ្យការទិញពីអ្នកផ្គត់ផ្គង់នៅបរទេស។ ការធ្វើដូច្នេះ នឹងជួយឲ្យអនុភាពនៃឧស្សាហកម្មផលិតនាវាពាណិជ្ជកម្មរបស់ហ្វីលីពីនកាន់តែមានភាពលេចធ្លោ និងរឹងមាំបន្ថែមទៀត។

រោងចក្រផលិតកប៉ាល់របស់ហ្វីលីពីន (រូបភាព៖ HHIC Philippines)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមអាជ្ញាធរឧស្សាហកម្មដែនសមុទ្រហ្វីលីពីន (ម៉ារីណា) ចំនួនរោងចក្រផលិត និងជួសជុលកប៉ាល់របស់ក្រុងម៉ានីល ដែលបានកត់ត្រាក្នុងឆ្នាំ២០២២ មានចំនួន ១២៤កន្លែង កើនឡើងចំនួន ៨កន្លែង បើធៀបនឹងឆ្នាំ២០២១ ដែលមានត្រឹម ១១៦កន្លែងប៉ុណ្ណោះ។ រោងចក្រទាំងនោះរបស់ហ្វីលីពីន ផ្ដោតសំខាន់លើការផលិតកប៉ាល់ពាណិជ្ជកម្មសម្រាប់នាំចេញទៅក្រៅប្រទេស ដូចជា កប៉ាល់ដឹកទំនិញ កប៉ាល់ដឹកកុងតឺន័រ និងកប៉ាល់ដឹកប្រេង ជាដើម។

ប្រព័ន្ធផ្សព្វផ្សាយក្នុងស្រុក បានរាយការណ៍ថា ក្រសួងការពារជាតិហ្វីលីពីនកំពុងពិចារណាជម្រើសហិរញ្ញប្បទានចំនួន២ ចំពោះគំនិតផ្ដួតផ្ដើមផលិតនាវាចម្បាំងនៅក្នុងប្រទេស ដែលមានដូចជា កិច្ចព្រមព្រៀងរវាងរដ្ឋាភិបាលនិងរដ្ឋាភិបាល និងដំណើរការដេញថ្លៃដោយក្រុមហ៊ុនឯកជន។

សូមបញ្ជាក់ថា ហ្វីលីពីន គឺជាប្រទេសលំដាប់ថ្នាក់ទី៤ ដែលជាជើងចាស់មានបទពិសោធន៍ផលិតកប៉ាល់ធំបំផុតនៅលើពិភពលោក គិតចាប់តាំងពីឆ្នាំ២០១០មកម៉្លេះ តាមពីក្រោយប្រទេសកូរ៉េខាងត្បូង ចិន និងជប៉ុន។

កាលពីពេលថ្មីៗកន្លងទៅ ហ្វីលីពីន បានចុះហត្ថលេខាជាមួយក្រុមហ៊ុន Hyundai Heavy Industries សម្រាប់ការផលិតនាវាល្បាតថ្មីចំនួន៦គ្រឿង ក្នុងទំហំទឹកប្រាក់ជាង ៥១២លានដុល្លារ ដែលការផលិតនេះនឹងត្រូវបញ្ចប់ឲ្យរួចរាល់ត្រឹមឆ្នាំ២០២៨ខាងមុខ៕

ដោយ៖ ឈាង

Related Topics:ប្រទេសហ្វីលីពីន