ហ្វីលីពីន នឹង​សង់​ព្រលាន​​​នៅ​សមុទ្រ​ចិន​ខាង​​ត្បូង ចំពេល​មាន​ភាព​តានតឹង​ជាមួយ​ក្រុង​ប៉េកាំង

ប្រទេសហ្វីលីពីន កំពុងរៀបចំ​គម្រោងអភិវឌ្ឍន៍​ព្រលានយន្តហោះនៅលើកោះមួយដែលខ្លួនកាន់កាប់នៅក្នុងសមុទ្រចិនខាងត្បូង ដើម្បីជា​ការ​បង្ហាញ​ពីការទាមទាររបស់ខ្លួន​នូវ​អធិបតេយ្យ​ភាព​ចំពោះដែនទឹក ដែលកំពុងមានជម្លោះជាមួយរដ្ឋាភិបាលក្រុងប៉េកាំង។

គម្រោងព្រលានយន្តហោះ​ថ្មី​របស់​ហ្វីលីពីន មាន​ទីតាំង​នៅ​លើ​កោះ Pag-asa ឬហៅ​តាម​​អន្តរជាតិ​ថា កោះ Thitu ​ស្ថិត​នៅ​តំបន់​ប្រជុំកោះ Spratly ដែល​​​ចិន​តែងតែ​ទាមទារ​យក​ទៅ​​គ្រប់គ្រង។ ការិយាល័យទំនាក់ទំនងរបស់ប្រធានាធិបតី​ហ្វីលីពីន បាននិយាយនៅក្នុងសេចក្តីថ្លែងការណ៍មួយកាលពីថ្ងៃទី១៨ ខែ​កក្កដា ថា ការទិញដីសម្រាប់គម្រោងអភិវឌ្ឍន៍ព្រលានយន្តហោះកោះ Pag-asa កំពុងស្ថិតនៅ​ក្នុង​ដំណើរការ។

នៅពេល​បញ្ចប់​គម្រោង ហ្វីលីពីន​រំពឹងថា វា​នឹងផ្តល់នូវមធ្យោបាយដ៏មានប្រសិទ្ធភាពនៃការធ្វើដំណើរទៅវិញទៅ​មក​នៅលើកោះដាច់ស្រយាលមួយនេះ ដែលជាកន្លែងមានជនស៊ីវិល និងក្រុមយោធាហ្វីលីពីនរស់នៅ។

គម្រោង​​នេះ បាន​បង្ហាញពីដំណោះស្រាយ​របស់ហ្វីលីពីន ក្នុងការរក្សាវត្តមានរបស់ខ្លួននៅលើដែនសមុទ្រចិនខាង​ត្បូង ខណៈមហាយក្សចិនក៏បានបង្កើនការទាមទាររបស់ខ្លួន ក្រោយបានលុបចោលនូវសេចក្តីសម្រេចអព្យាក្រឹតឆ្នាំ២០១៦។ រដ្ឋាភិបាលក្រុងម៉ានីល​ ក៏​បាន​និង​កំពុង​បញ្ជូន​កប៉ាល់នានាចូល​ទៅ​ក្នុង​ដែនទឹក​ជម្លោះ ហើយធ្លាប់បង្ក​ឲ្យមានការ​ប៉ះទង្គិច​ប៉ុន្មានលើក​រួច​មកហើយជាមួយ​ក្រុង​ប៉េកាំង។

គួរ​បញ្ជាក់​ថា គម្រោង​ផ្លូវយន្តហោះ​យោធានៅលើកោះ Balabac ក្នុងខេត្ត Palawan ក្បែរសមុទ្រចិនខាងត្បូង ក៏ជិតបបញ្ចប់រួចរាល់​ផង​ដែរ។ កោះ Balabac គឺជាទីតាំងថ្មីមួយក្នុងចំណោមទីតាំងថ្មីចំនួន​៤ ដែលអនុញ្ញាតឲ្យយោធាអាមេរិកអាចចេញចូលទៅបាន ក្រោមកិច្ចព្រមព្រៀងការពារជាតិដែលត្រូវបានអនុម័តកាលពីឆ្នាំ២០២៣។

ប្រធានាធិបតី​ហ្វីលីពីន លោក Ferdinand Marcos Jr. ធ្លាប់បាននិយាយថា “យើងកំពុងស្ថិតក្នុងដំណាក់កាលចុងក្រោយនៅក្នុងគម្រោងផ្លូវយន្តហោះយោធារបស់កោះ Balabac ជាពិសេសចាប់តាំងពីខេត្ត Palawan នឹងដើរតួនាទីយ៉ាងសំខាន់សម្រាប់សន្តិសុខជាតិ”។

គម្រោងហេដ្ឋារចនាសម្ព័ន្ធទាំង​នេះ គឺស្ថិតក្នុងចំណោមគម្រោងអាទិភាពក្រោមការគ្រប់គ្រងរបស់លោក Marcos ហើយជាផ្នែកមួយនៃកិច្ចខិតខំប្រឹងប្រែង ដើម្បីបើកតំបន់ភាគខាងត្បូងនៃរដ្ឋធានីម៉ានីលទៅកាន់ការវិនិយោគថ្មីៗ សម្រួលការដឹកជញ្ជូន និងពង្រឹងវិស័យទេសចរណ៍៕

ដោយ៖ ឈាង