បំណុលជាតិអាមេរិក កើនឡើងដល់កម្រិតខ្ពស់បំផុតជាប្រវត្តិសាស្រ្ត

គណៈកម្មាធិការថវិកានៃសភាអាមេរិក បានប្រកាសកាលពីថ្ងៃចន្ទទី២៩ខែកក្កដាឆ្នាំ២០២៤ថា បច្ចុប្បន្ននេះ បំណុលជាតិរបស់សហរដ្ឋអាមេរិក បានឈានដល់កម្រិតប្រវត្តិសាស្រ្តគឺកើនលើស ៣៥ទ្រីលានដុល្លារហើយ ខណៈប្រធានគណៈកម្មាធិការលោក Jodey Arrington បានចាត់ទុករឿងនេះ ថាជាព្រឹត្តិការណ៍គួរជាទីព្រួយបារម្ភ ហើយថែមទាំងជំរុញឲ្យមានទំនួលខុសត្រូវផ្នែកសារពើពន្ធ និងការចំណាយបន្ថែមទៀត ដើម្បីជួសជុលកំណើនបំណុលជាតិដែលកំពុងកើនឡើងយ៉ាងខ្លាំងនេះ ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីថ្លែងការណ៍មួយ លោក Arrington និយាយថា «ថ្ងៃនេះ យើងសោកស្ដាយចំពោះព្រឹត្តិការណ៍ដ៏គួរឲ្យសង្ស័យមួយទៀត ចំពោះការធ្លាក់ចុះសារពើពន្ធនៃប្រទេសដ៏មានឥទ្ធិពល និងវិបុលភាពបំផុតក្នុងប្រវត្តិសាស្ត្រ»។ យ៉ាងណាក្តី ក្នុងនោះលោកក៏បង្ហាញក្តីសង្ឃឹមដែរថា បើលោក Donald Trump ឈ្នះឆ្នោតខែវិច្ឆិកាមែន ច្បាស់ណាស់ គណបក្សសាធារណរដ្ឋ នឹងអាចបន្ធូរបន្ថយស្ថានការណ៍នេះបាន។

តាមការចុះផ្សាយរបស់ RT, បំណុលជាតិរបស់អាមេរិក មានការកើនឡើងយ៉ាងគំហុកក្នុងរយៈពេលប៉ុន្មានឆ្នាំចុងក្រោយនេះ ក្រោមការដឹកនាំរបស់លោកប្រធានាធិបតី Joe Biden និងអ្នកកាន់តំណែងមុនគឺលោក Donald Trump។

ពេលលោក Trump អស់តំណែង បំណុលបានកើនឡើងចំនួន ៨.៤ទ្រីលានដុល្លារ ពោលគឺឈានដល់ ២៧.៧ទ្រីលានដុល្លារ ខណៈក្នុងនោះ មានជាងពាក់កណ្តាលគឺជាការខ្ចីប្រាក់ទាក់ទងនឹងវិធានការទប់ស្កាត់ជំងឺកូវីដ១៩ ហើយនិន្នាការនេះ នៅតែបន្តក្រោមការដឹកនាំរបស់លោក Biden ដោយបំណុលបានឡើងដល់ ៣៥ទ្រីលានដុល្លារឯណោះ។

សូមបញ្ជាក់ថា បើតាមទិន្នន័យច្បាស់ៗពីក្រសួងរតនាគារ បំណុលជាតិសរុបរបស់អាមេរិក បានឈានដល់ ៣៥ ០០១ ២៧៨ ១៧៩ ២០៨.៦៧ ដុល្លារទៅហើយ៕

អត្ថបទ៖ សុខ សុវណ្ណ

ចុចអាន៖ បំណុល អាមេរិក កើនឡើងដល់ ៣៣ ពាន់ពាន់លានដុល្លារ