ភ្ញាក់ផ្អើល! ស្ថាបនិក Telegram មានកូន ១០០នាក់ នៅ ១២ប្រទេស

ពិតជារឿងគួរឲ្យភ្ញាក់ផ្អើលបំផុត ដែលស្ថាបនិកកម្មវិធី Telegram លោក Pavel Durov បានសារភាពថា ខ្លួនមានកូនរហូតដល់ទៅ១០០នាក់ក្នុងប្រទេសចំនួន១២ឯណោះ តាមរយៈការបរិច្ចាគមេជីវិតឈ្មោល។

តាមការចុះផ្សាយរបស់ RT នៅថ្ងៃអង្គារទី៣០ខែកក្កដា សហគ្រិន IT ជនជាតិរុស្សីរូបនេះ បានលើកឡើងថា គាត់ចាប់ផ្តើមផ្តល់មេជីវិតឈ្មោលកាលពី១៥ឆ្នាំមុន នៅពេលមានមិត្តម្នាក់ មករកគាត់ហើយសុំមេជីវិតដែលដំបូងឡើយ មើលទៅដូចជារាងចម្លែកដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Durov បកស្រាយថា «មិត្តម្នាក់នោះ​និងភរិយារបស់គេ ​មិន​អាច​មាន​កូន​បានឡើយ​ដោយ​សារតែខាងប្រុសអារ ដូច្នេះហើយគាត់មករក​ខ្ញុំ សុំឲ្យ​បរិច្ចាគ​មេ​ជីវិត​ឈ្មោល​នៅ​គ្លីនិក​មួយ។ ខ្ញុំ​សើចមួយឆ្អែត ទើបដឹងថា នេះមិនមែនជារឿងលេងសើចទេ។ ក្រោយមកទៀត គ្រូពេទ្យក៏ប្រាប់ខ្ញុំថា មេជីវិតដែលមានគុណភាពខ្ពស់គឺកំពុងខ្វះខាតហើយថា វាជាកាតព្វកិច្ចរបស់ពលរដ្ឋដែលរួមចំណែកបរិច្ចាគមេជីវិតឈ្មោល ដើម្បីជួយគូស្វាមីភរិយាកាន់តែច្រើនឡើងៗ។ វាស្តាប់ទៅដូចជាចម្លែកបន្តិចមែន តែខ្ញុំក៏សម្រេចចិត្តចុះឈ្មោះ បរិច្ចាគមេជីវិតឈ្មោលតែម្តង។

មិនត្រឹមប៉ុណ្ណឹង អ្នកកំលោះរូបនេះថែមទាំងបញ្ជាក់ទៀតថា «ឥឡូវ ខ្ញុំមានបំណងបង្ហាញកូដ DNA ដើម្បីឲ្យកូនៗរបស់ខ្ញុំ ងាយស្រួលរកគ្នា ខណៈសកម្មភាពបរិច្ចាគកាលពីអតីតរបស់ខ្ញុំ បានជួយដល់គូស្វាមីភរិយាជាង១០០គូនៅក្នុង១២ប្រទេសឲ្យមានកូន រួចទៅហើយ»។

សូមបញ្ជាក់ថា កង្វះមេជីវិតឈ្មោលដែលមានសុខភាពល្អ បានក្លាយជាបញ្ហាធ្ងន់ធ្ងរកាន់តែខ្លាំងឡើងៗនៅទូទាំងពិភពលោក ហើយត្បិតបែបនេះក្តី ក៏លោក Durov ប្រកាសថា លោកមិនស្តាយក្រោយឡើយ ហើយខំប្រឹងធ្វើយ៉ាងណាដើម្បីជួយដោះស្រាយបញ្ហាទាំងនេះឲ្យបាន៕

អត្ថបទ៖ សុខ សុវណ្ណ

ចុចអាន៖ Telegram នឹងបន្ថែមមុខងារថ្មី អ្នកប្រើប្រាស់អាច Add Story ហើយពិសេស​ជាង Facebook ទៅទៀត