លើកដំបូង! ក្រុមហេសបូឡា បាញ់មីស៊ីលដល់ទីក្រុងពាណិជ្ជកម្ម Tel Aviv របស់ អ៊ីស្រាអែល

តាមការចុះផ្សាយរបស់ CNN នៅថ្ងៃពុធទី២៥ខែកញ្ញា, នេះជាលើកដំបូងហើយ ដែលក្រុមហេសបូឡា បាញ់មីស៊ីលទៅដល់ទីក្រុងពាណិជ្ជកម្ម Tel Aviv នៃប្រទេសអ៊ីស្រាអែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធរឿងនេះ អ្នកនាំពាក្យកងទ័ពអ៊ីស្រាអែលនិយាយថា «មិនដែលមានមីស៊ីលរបស់ក្រុមហេសបូឡា ហោះដល់ទីក្រុង Tel Aviv ដូចនេះទេ ប៉ុន្តែមីស៊ីលនោះត្រូវស្ទាក់ចាប់បាន»។

ទោះបីជាយ៉ាងណាក៏ដោយ ភ្លាមៗមិនទាន់មានសេចក្តីរាយការណ៍អំពីទំហំនៃការខូចខាតឬជនរងគ្រោះឡើយ។

ក្រុមហេសបូឡា បញ្ជាក់ថា ខ្លួនបានបាញ់មីស៊ីល Qadr 1 តម្រង់ទៅកាន់ទីស្នាក់ការកណ្តាលរបស់ភ្នាក់ងារសម្ងាត់អ៊ីស្រាអែល Mossad ដែលខ្លួនចោទថាជាអ្នកនៅពីក្រោយការវាយប្រហារសំដៅលើសមាជិករបស់ខ្លួន រួមទាំងការបំផ្ទុះឧបករណ៍ទាក់ទងសម្លាប់មនុស្សរាប់រយនាក់កាលពីសប្តាហ៍មុនផងដែរ។

អំឡុងការវាយប្រហារនោះ ស៊ីរ៉ែនប្រកាសអាសន្នក៏បានបន្លឺឡើងក្នុងទីក្រុងមានប្រជាជនជាង ​៤លាននាក់មួយនេះផងដែរ ហើយអ្នកនាំពាក្យកងទ័ពអ៊ីស្រាអែលអះអាងថា នោះគឺជាមីស៊ីលរយៈចម្ងាយឆ្ងាយធុនធ្ងន់។

ការបាញ់មីស៊ីលនេះកើតឡើង បន្ទាប់ពីក្រសួងសុខាភិបាលលីបង់ ចេញរបាយការណ៍ថា មនុស្សស្លាប់ក្នុងការវាយប្រហារដ៏សាហាវរបស់អ៊ីស្រាអែលរយៈពេល២ថ្ងៃ បានកើនដល់ ៥៦៩នាក់ ខណៈ ១ ៨៣៥នាក់ត្រូវរបួស។

ទន្ទឹមនោះ ពលរដ្ឋលីបង់រាប់ម៉ឺននាក់ ក៏ត្រូវជម្លៀសចេញពីផ្ទះសម្បែង នៅភាគខាងត្បូងឆ្ពោះទៅភាគខាងជើងប្រទេស ហើយសាលារៀនជាច្រើននៅក្នុងប្រទេស ក៏ត្រូវបង្ខំចិត្តបិទទ្វារផងដែរ៕

អត្ថបទ៖ សុខ សុវណ្ណ

ចុចអាន៖ Erdogan ស្តីឲ្យ UN ខ្លាំងៗ និងប្រដូច Netanyahu ទៅ Hitler