ព័ត៌មានអន្ដរជាតិ

កូរ៉េខាងត្បូង ខកខានជើងហោះហើរចំនួន២០លើក ដោយសារប៉េងប៉ោងសំរាមកូរ៉េខាងជើង

បានផុស

២ years មុន

នៅ

ថ្ងៃព្រហស្បតិ៍ ២៦ កញ្ញា ២០២៤

ដោយ

Chheang

កូរ៉េខាងត្បូង បានបង្ខំចិត្តបិទជើងហោះហើរជាច្រើនដង នៅឯអាកាសយានដ្ឋានសំខាន់ចំនួនពីរនៅរដ្ឋធានីសេអ៊ូល ចាប់តាំងពីខែមិថុនា ដោយសារតែការរំខានពីប៉េងប៉ោងសំរាមរបស់កូរ៉េខាងជើង។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters កាលពីថ្ងៃទី២៥ខែកញ្ញា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាជិកសភាគណបក្សប្រជាធិបតេយ្យកូរ៉េខាងត្បូង លោក Yang Bu-nam បាននិយាយនៅក្នុងសេចក្តីថ្លែងការណ៍មួយថា ក្នុងរយៈពេល២០ថ្ងៃផ្សេងៗគ្នាចាប់តាំងពីថ្ងៃទី១ខែមិថុនា ជើងហោះទាំងអស់ ឬមួយចំនួននៅអាកាសយានដ្ឋាន Incheon និងអាកាសយានដ្ឋាន Gimpo ត្រូវបានបិទសម្រាប់ការចុះចត ឬការហោះហើរ នៅពេលដែលប៉េងប៉ោងសំរាមរបស់កូរ៉េខាងជើងត្រូវបានប្រទះឃើញនៅក្នុងតំបន់ជុំវិញអាកាសយានដ្ឋាន។

សរុបមក ការបិទជើងហោះហើរទាំងអស់ មានរយៈពេល ៤១៣នាទី។

កូរ៉េខាងជើង បានបាញ់បង្ហោះប៉េងប៉ោងជាង ៥៥០០ប៉េងប៉ោង ចងភ្ជាប់ថង់សំរាមចាប់តាំងពីចុងខែឧសភា ដោយនិយាយថា ខ្លួនកំពុងឆ្លើយតបទៅនឹងប៉េងប៉ោងដែលផ្ទុកខិត្តប័ណ្ណឃោសនាប្រឆាំងនឹងក្រុងព្យុងយ៉ាង ដែលបង្ហោះដោយក្រុមសកម្មជនកូរ៉េខាងត្បូង។

ប៉េងប៉ោងត្រូវបានបក់តាមខ្យល់ ហើយខ្លះបានធ្លាក់ចុះនៅក្នុងប្រទេសកូរ៉េខាងត្បូង រួមទាំងនៅជិតការិយាល័យប្រធានាធិបតី និងនៅលើផ្លូវហោះហើររបស់អាកាសយានដ្ឋាន។ ខណៈពេលដែលអាជ្ញាធរបានប្រមូលប៉េងប៉ោងភាគច្រើនដោយគ្មានឧបទ្ទវហេតុ ប៉េងប៉ោងខ្លះបានរំខានដល់ចរាចរណ៍ផ្លូវអាកាស និងខ្លះបង្កឲ្យកើតមានអគ្គិភ័យតិចតួច។

មន្ត្រីក្រុមហ៊ុនអាកាសចរណ៍ បាននិយាយថា យុទ្ធនាការបង្ហោះប៉េងប៉ោងកូរ៉េខាងជើងមានផលរំខានខ្លាំងដល់ប្រតិបត្តិការហោះហើរ ដោយក្នុងករណីខ្លះបណ្ដាលឲ្យមានការខ្ជះខ្ជាយបរិមាណប្រេងឥន្ធនៈរបស់យន្តហោះ ព្រោះតែការពន្យារពេលនៅលើអាកាស ឬការបង្វែរទិសដៅទៅអាកាសយានដ្ឋានផ្សេង៕

ដោយ៖ ឈាង