ត្រាំ ប្រាប់ទៅ ហ្សេលេនស្គី ថា លោកមិនដូរចិត្តឡើយ លើបញ្ហាសង្គ្រាមរុស្ស៊ី-អ៊ុយក្រែន

ធ្លាប់តែប៉ះសម្តីគ្នាច្រើនលើកច្រើនសា ពេលនេះបេក្ខជនគណបក្សសាធារណរដ្ឋអាមេរិកលោក ដូណាល់ ត្រាំ បានជួបតទល់ជាមួយប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី ហើយ នៅអគារ Trump Tower ក្នុងទីក្រុងញូវយ៉ក កាលពីថ្ងៃសុក្រទី២៧ខែកញ្ញាឆ្នាំ២០២៤ ហើយក្នុងជំនួបនោះ អតីតប្រធានាធិបតីអាមេរិក បានបញ្ជាក់យ៉ាងច្បាស់ថា គាត់មិនដូរចិត្តឡើយទាក់ទិនបញ្ហាសង្គ្រាមរុស្ស៊ី-អ៊ុយក្រែន។

លោក ត្រាំ ត្រូវគេស្គាល់ច្បាស់ថាជា បុគ្គលមិនពេញចិត្តអ៊ុយក្រែនទាល់តែសោះ ហើយថែមទាំងប្រឆាំងការផ្តល់ជំនួយរបស់អាមេរិក ទៅឲ្យទីក្រុងកៀវផងដែរ។ ជាក់ស្តែង នៅឯការជួបជុំអ្នកគាំទ្រក្នុងរដ្ឋ North Carolina កាលពីថ្ងៃព្រហស្បតិ៍ លោកបានចោទប្រធានាធិបតីអ៊ុយក្រែន ថានិយាយអាក្រក់ពីគាត់ ហើយជាបុរសម្នាក់ដែលមិនចង់មានកិច្ចព្រមព្រៀង។

យ៉ាងណា ថ្លែងប្រាប់អ្នកសារព័ត៌មានមុនជំនួបជាមួយប្រធានាធិបតីអ៊ុយក្រែន លោក ត្រាំ អះអាងថា គាត់មានទំនាក់ទំនងល្អខ្លាំងណាស់ទាំងជាមួយលោក ហ្សេលេនស្គី និងជាមួយប្រធានាធិបតីរុស្ស៊ី វ្ល៉ាឌីមៀរ ពូទីន ហើយសន្យាថានឹងដោះស្រាយជម្លោះអ៊ុយក្រែនឲ្យបានចប់យ៉ាងឆាប់រហ័សជាទីបំផុត ប្រសិនបើគាត់ឈ្នះការបោះឆ្នោតខែវិច្ឆិកា។ ប៉ុន្តែក្រោយមក ពេលជួយលោក ហ្សេលេនស្គី លោកត្រាំនិយាយថា “ខ្ញុំរៀនសូត្របានច្រើនណាស់ ប៉ុន្តែខ្ញុំគិតថា ខ្ញុំមិនផ្លាស់ប្តូរទស្សនៈនៃការបញ្ចប់សង្គ្រាមឡើយ ហើយយើងទាំងពីរចង់ឃើញកិច្ចព្រមព្រៀងដែលធ្វើឡើងដោយយុត្តិធម៌”។

នៅពេលសួរថាតើគាត់នឹងសម្រេចបានដំណោះស្រាយនេះដោយរបៀបណា លោក ត្រាំ ឆ្លើយតបថា «វាដូចជាលឿនពេកក្នុងការនិយាយរឿងនេះ។ ​ខ្ញុំ​មាន​គំនិត​ផ្ទាល់​ខ្លួន ហើយ​ខ្ញុំ​ប្រាកដ​ថា​ប្រធានាធិបតីអ៊ុយក្រែន ក៏​មាន​គំនិត​ផ្ទាល់​ខ្លួនដែរ​»។

សូមបញ្ជាក់ជាថ្មី លោក ត្រាំ បានអះអាងម្តងហើយម្តងទៀតថា សង្គ្រាមរុស្ស៊ី-អ៊ុយក្រែន នឹងមិនកើតឡើងឡើយប្រសិនបើគាត់កាន់តំណែងជាប្រធានាធិបតីនៅឆ្នាំ២០២២ ហើយគាត់លើកឡើងដដែលៗថា គាត់អាចបង្ខំលោក ហ្សេលេនស្គីនិងពូទីន ឲ្យចូលរួមក្នុងកិច្ចពិភាក្សារកដំណោះស្រាយការទូតក្នុងរយៈពេលត្រឹម២៤ម៉ោងប៉ុណ្ណោះ ក្រោយជាប់ឆ្នោត៕

អត្ថបទ៖ សុខ សុវណ្ណ

ចុចអាន៖ Zelenskyy៖ យោធា​អ៊ុយក្រែន​បាន​កាត់បន្ថយ​សក្ដានុពល​រុស្ស៊ី​ក្នុង​ការ​វាយលុក​ភាគ​ខាង​កើត