ព័ត៌មានអន្ដរជាតិ

លីបង់ ប្រាប់ថា ស្លាប់ជិត៥០នាក់ទៀតហើយដោយសារការវាយប្រហាររបស់អ៊ីស្រាអែល

បានផុស

១២ នាទី មុន

នៅ

ថ្ងៃចន្ទ ៣០ កញ្ញា ២០២៤

ដោយ

មនុស្សជិត៥០នាក់ ត្រូវបានសម្លាប់ បន្ទាប់ពីយោធាអ៊ីស្រាអែលបានបើកការវាយប្រហារដោយទម្លាក់គ្រាប់បែកជាច្រើនទៅលើក្រុមសកម្មប្រយុទ្ធហេសបូឡា នៅក្នុងប្រទេសលីបង់។ នេះបើយោងតាមរបាយការណ៍របស់ក្រសួងសុខាភិបាលលីបង់ កាលពីថ្ងៃទី២៩ខែកញ្ញា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការទម្លាក់គ្រាប់បែកនេះ កើតឡើងបន្ទាប់ពីការវាយប្រហារតាមផ្លូវអាកាសទៅលើតំបន់ជាយក្រុងភាគខាងត្បូងនៃរដ្ឋធានីបេរូតកាលពីថ្ងៃសុក្រ ដោយបានសម្លាប់លោក Hassan Nasrallah ដែលជាមេដឹកនាំក្រុមហេសបូឡា។

ក្រសួងសុខាភិបាលលីបង់ បានប្រកាសថា ចំនួនអ្នកស្លាប់ជាបឋម មាន ២៤នាក់ និង ២៩នាក់បានរងរបួសក្នុងការវាយប្រហាររបស់អ៊ីស្រាអែលនៅជិតភាគខាងត្បូងក្រុង Sidon កាលពីថ្ងៃអាទិត្យ។ ក្រោយមក របាយការណ៍បង្ហាញថា ការវាយឆ្មក់តាមអាកាសរបស់អ៊ីស្រាអែល ទៅលើតំបន់ Baalbek-Hemel ភាគខាងកើតប្រទេសលីបង់ «បានសម្លាប់មនុស្ស ២១នាក់ និងរបួស ៤៧នាក់» ដែលជាចំនួនបណ្តោះអាសន្នមួយផ្សេងទៀត។ បន្ថែមពីនេះ មនុស្ស៤នាក់ទៀតត្រូវបានសម្លាប់នៅក្នុងការវាយឆ្មក់នៅក្នុងទីក្រុង Joub Jenin នៃតំបន់ Bekaa។

ក្រុមហេសបូឡា បានប្រាប់ថា ខ្លួនកំពុងធ្វើសកម្មភាពគាំទ្រក្រុមសកម្មប្រយុទ្ធហាម៉ាសនៅតំបន់ហ្គាហ្សា ដែលបានវាយប្រហារអ៊ីស្រាអែលកាលពីថ្ងៃទី៧ខែតុលាឆ្នាំ២០២៣ ហើយបង្កឲ្យមានសង្រ្គាមនៅក្នុងទឹកដីប៉ាឡេស្ទីន។

បន្ទាប់ពីអ៊ីស្រាអែលបានបង្វែរការផ្តោតអារម្មណ៍របស់ខ្លួនពីភាគខាងជើងពីតំបន់ហ្គាហ្សាទៅប្រទេសលីបង់ ហើយការបាញ់ឆ្លងព្រំដែនបានកើនឡើង ការវាយប្រហាររបស់អ៊ីស្រាអែលបានសម្លាប់មនុស្សរាប់រយនាក់កាលពីថ្ងៃចន្ទសប្ដាហ៍មុន ដែលជាថ្ងៃដ៏អាក្រក់បំផុតចាប់តាំងពីសង្គ្រាមស៊ីវិលឆ្នាំ១៩៧៥-១៩៩០របស់ប្រទេសលីបង់៕

ដោយ៖ ឈាង