ប្រទេសក្រីក្របំផុតមួយចំនួនមិនទាន់ទទួលបានការចាក់វ៉ាក់សាំងសូម្បីមួយដូស

សម្ព័ន្ធវ៉ាក់សាំងប្រជាជន (PVA) បាននិយាយពីថ្ងៃអង្គារថា ប្រទេសអ្នកមានកំពុងចាក់វ៉ាក់សាំងមនុស្សម្នាក់រៀងរាល់វិនាទី ខណៈដែលប្រទេសក្រីក្របំផុតមិនទាន់ទទួលបានការចាក់វ៉ាក់សាំងសូម្បីតែមួយដូស ។

ក្រុមនេះបាននិយាយថា ប្រទេសអ្នកមានដូចគ្នាផ្សេងទៀតកំពុងរារាំងកិច្ចប្រឹងប្រែងរបស់ប្រទេសកំពុងអភិវឌ្ឍន៍ឲ្យលះបង់សិទ្ធិបញ្ញាលើវ៉ាក់សាំងការពារជំងឺកូវីដ ១៩ ខណៈគណៈកម្មាធិការទិដ្ឋភាពកម្មសិទិ្ធបញ្ញាពាក់ព័ន្ធនឹងពាណិជ្ជកម្ម (TRIPS) របស់អង្គការពាណិជ្ជកម្មពិភពលោក (WTO) បានជួបប្រជុំគ្នានៅថ្ងៃពុធនេះដើម្បីពិភាក្សាអំពីការលះបង់សិទ្ធិរបស់ TRIPS ។

លោក Muhammad Yunus ជាសាស្ត្រាចារ្យ និងមេដឹកនាំម្នាក់នៃសម្ព័ន្ធវ៉ាក់សាំងប្រជាជនបាននិយាយថា “យើងគួរធ្វើវាឥឡូវនេះ ។ វាអយុត្តិធម៌ណាស់ ប្រទេសអ្នកមានដែលមានវ៉ាក់សាំងគ្រប់គ្រាន់ដើម្បីការពារពលរដ្ឋរបស់ពួកគេកំពុងរារាំងការលះបង់សិទ្ធិបញ្ញារបស់ TRIPS ដែលអាចជួយប្រទេសក្រីក្រឲ្យទទួលវ៉ាក់សាំងដែលពួកគេត្រូវការ” ។

សម្ព័ន្ធវ៉ាក់សាំងប្រជាជនដែលជាក្រុមអង្គការមួយរួមមានអង្គការ Oxfam International អង្គការ Frontline AIDS អង្គការ UNAIDS និងអង្គការដទៃទៀតបាននិយាយថា នេះគឺជាឧទាហរណ៍មួយទៀតនៃបណ្តាប្រទេសអ្នកមានដែលផ្តល់អាទិភាពដល់ផលប្រយោជន៍នៃភាពផ្តាច់មុខផ្នែកឱសថធំៗលើជីវិតរបស់ប្រជាជន ។

ក្រុមនេះបាននិយាយថា ការលះបង់សិទ្ធិរបស់ TRIPS នឹងដកការរារាំងផ្លូវច្បាប់ និងអនុញ្ញាតឲ្យក្រុមហ៊ុនផលិតនានានៅទូទាំងពិភពលោកចាប់ផ្តើមផលិតវ៉ាក់សាំងគ្រប់កម្រិតក្នុងរយៈពេលប៉ុន្មានខែទៀត ៕

ប្រែសម្រួលដោយ ៖ ជីវ័ន្ត

ប្រភព ៖ CNN

ចុចអាន ៖ ដំណឹងល្អ! ទិន្នន័យអង់គ្លេសបង្ហាញថា ការចាក់វ៉ាក់សាំងលើកទីមួយ កាត់បន្ថយការឆ្លងកូវីដបាន២ភាគ៣

ចុចអាន ៖ ក្រុមហ៊ុន Pfizer-BioNTech បង្ហាញលទ្ធភាពផលិតវ៉ាក់សាំងក្នុងឆ្នាំ ២០២២