តារាចម្រៀងជើងចាស់លោក ផៃ ផុងរ៉ាក់ ឈឺធ្ងន់ សម្រាកពេទ្យ១សប្ដាហ៍ មិនទាន់ធូរស្បើយ (មានវីដេអូ)

តារាចម្រៀងជើងចាស់ លោក ផៃ ផុងរ៉ាក់ ធ្លាក់ខ្លួនឈឺធ្ងន់ និងកំពុងសម្រាកព្យាបាលនៅមន្ទីរពេទ្យខេត្តសៀមរាបរយៈពេលជាង ១សប្ដាហ៍ មកហើយ ខណៈស្ថានភាពសុខភាពមិនទាន់មានសភាពធូរស្បើយនៅឡើយទេ។

យោងតាមការបញ្ជាក់ពីគណនីហ្វេសប៊ុកឈ្មោះ អ៊ូ បវរ ដែលជាអ្នកស្និតស្នាលនឹងលោក បានឱ្យដឹងថា ស្ថានភាពជំងឺរបស់លោកកំពុងត្រូវការការយកចិត្តទុកដាក់ និងជំនួយបន្ថែមពីសប្បុរសជន។ ក្នុងនោះ ក៏មានការអំពាវនាវឲ្យបងប្អូនសាធារណជន និងអ្នកគាំទ្រចូលរួមជួយឧបត្ថម្ភថវិកា ដើម្បីសម្រាលបន្ទុកលើចំណាយព្យាបាលផងដែរ។

ម្ចាស់គណនីខាងលើ អះអាងដែរថា រាល់ថវិកាជំនួយដែលទទួលបាន តាមរយៈ QR Code ដែលបានបង្ហោះ នឹងត្រូវយកទៅប្រគល់ជូនគ្រួសាររបស់លោកផ្ទាល់ ដោយធានាថាមិនមានការបាត់បង់ ឬប្រើប្រាស់ខុសគោលបំណងឡើយ។

គួរបញ្ជាក់ថា លោក ផៃ ផុងរ៉ាក់ គឺជាតារាចម្រៀងជើងចាស់ដែលមានកេរ្តិ៍ឈ្មោះល្បីល្បាញក្នុងសម័យឆ្នាំ ១៩៨០ និងត្រូវបានទស្សនិកជនស្គាល់យ៉ាងទូលំទូលាយ។ លោកជាសិល្បករដែលមានស្នាដៃបទចម្រៀងជាច្រើន បំពេរអារម្មណ៍មហាជន និងមានឥទ្ធិពលក្នុងវិស័យតន្ត្រីខ្មែរសុរិន្ទ ជាមួយនឹងជំនាន់តារាចម្រៀងដូចជា ណូយ វ៉ាន់ណេត និង នូ សុិប។

ដោយឡែក ចំពោះស្ថានភាពបច្ចុប្បន្នរបស់លោក បានធ្វើឲ្យអ្នកគាំទ្រដែលស្គាល់លោក បង្ហាញការព្រួយបារម្ភ និងជូនពរផងដែរ៕