រដ្ឋបាល​លោក ត្រាំ បកស្រាយថា «សង្គ្រាមចប់ហើយ» ដើម្បីគេចពីការសុំច្បាប់សភា

រដ្ឋបាលរបស់លោកប្រធានាធិបតី ដូណាល់ ត្រាំ កំពុងតែប្រើប្រាស់យុទ្ធសាស្ត្របកស្រាយច្បាប់យ៉ាងចម្លែកមួយ ដោយអះអាងថា សង្គ្រាមជាមួយប្រទេសអ៊ីរ៉ង់ គឺបានបញ្ចប់​រួចទៅហើយ។ ការលើកឡើងបែបនេះ ត្រូវគេមើល​ឃើញ​ថា​​ជាល្បិចនយោបាយ ដើម្បី​ឲ្យ​សេតវិមានអាចគេចផុតពីកាតព្វកិច្ចផ្លូវច្បាប់ ដែលតម្រូវឲ្យ​លោក ត្រាំ ត្រូវសុំការអនុញ្ញាតជាផ្លូវការពីសភាអាមេរិក បើចង់បន្តប្រតិបត្តិការយោធាហួសពីរយៈពេល ៦០ថ្ងៃ។

ចុះផ្សាយ​ថ្ងៃទី​១ ខែ​ឧសភា ឆ្នាំ​២០២៦ ទីភ្នាក់ងារ​ព័ត៌មាន AP បាន​ឲ្យ​ដឹង​ថា យោងតាមសម្តីរបស់រដ្ឋមន្ត្រីការពារជាតិ លោក Pete Hegseth និងមន្ត្រីជាន់ខ្ពស់ដទៃទៀត ភាគីអាមេរិកយល់ឃើញថា ចាប់តាំងពីមានការឈប់បាញ់គ្នាកាលពីដើមខែមេសាមក គឺមិនមានការបាញ់តបតគ្នារវាងកងទ័ពអាមេរិក និងអ៊ីរ៉ង់ទៀតឡើយ។ ដូច្នេះហើយ ពួកគេសន្មតថា ស្ថានភាពសឹក ដែលបានចាប់ផ្តើមកាលពីចុងខែកុម្ភៈ បានរលត់ទៅវិញហើយ ដែលនាំឲ្យ​នាឡិកាកំណត់ពេលរបស់សភាត្រូវ «ឈប់ដើរ» ដោយស្វ័យប្រវត្តិ។ ទោះជាយ៉ាងនេះក្តី នៅក្នុងសភាពពិតជាក់ស្តែង កងទ័ពជើងទឹកអាមេរិកនៅតែបន្តឡោមព័ទ្ធកំពង់ផែអ៊ីរ៉ង់យ៉ាងតឹងរ៉ឹង ហើយអ៊ីរ៉ង់ក៏នៅតែបន្តបិទខ្ទប់ច្រកសមុទ្រហ័រមូសដដែល។

ការបកស្រាយនេះ បានធ្វើឲ្យ​ខាងសមាជិកបក្សប្រជាធិបតេយ្យ និងអ្នកជំនាញផ្នែកច្បាប់សង្គ្រាមហួសចិត្តយ៉ាងខ្លាំង។ អ្នកជំនាញបានលើកឡើងថា នៅក្នុងច្បាប់អំណាចសង្គ្រាមឆ្នាំ១៩៧៣ គ្មានកន្លែងណាមួយចែងថា នាឡិកាកំណត់ពេលអាច «ផ្អាក» បានតាមចិត្តបែបនេះឡើយ។ សូម្បីតែសមាជិកបក្សសាធារណរដ្ឋខ្លះ ក៏ចាប់ផ្តើមងាកមកជំទាស់នឹងលោក ត្រាំ ដែរ ដោយពួកគេយល់ថា ឱសានវាទ ៦០ថ្ងៃ គឺជាកាតព្វកិច្ចច្បាប់ ដែលមិនអាចប្រកែកបាន ហើយរាល់សកម្មភាពយោធាទៅថ្ងៃមុខ ត្រូវតែមានគោលដៅ និងយុទ្ធសាស្ត្រច្បាស់លាស់ ដែលឆ្លងកាត់ការយល់ព្រមពីសភា។

ដើម្បីដោះស្រាយចំណុចទាល់ច្រកនេះ ក្រុមអ្នកផ្តល់ប្រឹក្សារបស់លោក ត្រាំ បានស្នើឲ្យ​បង្កើត «ប្រតិបត្តិការថ្មី» មួយទៀតដែលគេឲ្យ​ឈ្មោះថា «Epic Passage» ដើម្បីជំនួសប្រតិបត្តិការចាស់។ យុទ្ធសាស្ត្រនេះ គឺចង់ប្តូរឈ្មោះសង្គ្រាមឲ្យ​ទៅជា «សកម្មភាពការពារខ្លួន» ដើម្បីបើកផ្លូវនាវាចរណ៍វិញ ដែលវានឹងជួយឲ្យលោក ត្រាំ អាចបន្តប្រើកម្លាំងបាយបាន ដោយមិនចាំបាច់ឆ្លងកាត់ការពិភាក្សានៅក្នុងសភា។ ជម្លោះផ្លូវច្បាប់នេះ បានក្លាយជាសមរភូមិថ្មីមួយទៀតនៅទីក្រុងវ៉ាស៊ីនតោន ខណៈដែលពិភពលោកកំពុងតាមដានមើលថា តើលោក ត្រាំ នឹងអាចប្រើល្បិចនេះ ដើម្បីបន្តសង្គ្រាមបានយូរប៉ុណ្ណាទៀត៕

ប្រែសម្រួល៖ ឈាង