ហ្វីលីពីន​ចាប់ខ្លួន​ថៅកែ​ចិន​ពាក់ព័ន្ធ​​ការ​ឆបោក​តាម​អនឡាញ​​ដ៏ទូលំទូលាយ​

បុរសជនជាតិចិនម្នាក់ដែលត្រូវបានចោទប្រកាន់ពីបទបើកដំណើរការក្រុមហ៊ុនបណ្តាញអនឡាញបោកប្រាស់ដ៏ទូលំទូលាយនៅទូទាំងប្រទេសហ្វីលីពីនត្រូវបានប៉ូលិសវាយឆ្មក់បានចាប់ខ្លួន។ នេះបើយោងតាមការចេញផ្សាយរបស់សារព័ត៌មាន​CNAនៅថ្ងៃទី១២ខែតុលានេះ។

អាជ្ញាធរក្រុងម៉ានីល បានឲ្យដឹងថា លោក Lin Xunhan ត្រូវបានឃុំខ្លួននៅទីក្រុង Binan ភាគខាងត្បូងនៃទីក្រុងម៉ានីល ចំពេលមានការបង្ក្រាបរបស់រដ្ឋាភិបាលលើអាជីវកម្មអនឡាញដែលត្រូវបានចោទប្រកាន់ពីបទបោកប្រាស់អតិថិជន និងទាក់ទងនឹងឧក្រិដ្ឋកម្មផ្សេងទៀតរួមមានការចាប់ជំរិត ពេស្យាចារ ការជួញដូរមនុស្ស ការធ្វើទារុណកម្ម និងឃាតកម្ម។

គណៈកម្មការប្រឆាំងឧក្រិដ្ឋកម្ម​ដែល​​ជា​ការ​រៀបចំ​របស់​ប្រធានាធិបតី បាននិយាយនៅក្នុងសេចក្តីថ្លែងការណ៍មួយថា បុរសអាយុ៣៣ឆ្នាំរូបនេះ មានដើមកំណើតនៅក្នុងខេត្ត Fujian របស់ប្រទេសចិន ដែល​ជា​បុគ្គលបង្កការព្រួយបារម្ភយ៉ាង​ខ្លាំងនៅក្នុងទិដ្ឋភាពនៃឧក្រិដ្ឋកម្មនៅក្នុងប្រទេសហ្វីលីពីន។

ចាប់តាំងពីឆ្នាំ២០១៦មក លោក Lin បានបង្កើតក្រុម​បណ្តាញបោកប្រាស់ជាប្រព័ន្ធ ដែលជារឿយៗជួលអាជីវកម្មស្របច្បាប់​ដើម្បីបិទបាំងសកម្មភាពខុសច្បាប់របស់ខ្លួន ហើយបើទោះបីប្រតិបត្តិការទាំងនេះមួយចំនួនត្រូវបានវាយឆ្មក់ និងបិទទ្វារ មនុស្សជាច្រើននៅតែបន្តចូលរួម ដែលធ្វើឲ្យមានភាពស្មុគស្មាញដល់កិច្ចខិតខំប្រឹងប្រែងអនុវត្តច្បាប់ក្នុងការរុះរើសហគ្រាសឧក្រិដ្ឋកម្មដ៏ធំទូលាយរបស់លោក។

របាយការណ៍​នោះ​ បានឱ្យ​ដឹង​ថា ជន​សង្ស័យជនជាតិចិនម្នាក់ទៀត និងកូនចៅជនជាតិហ្វីលីពីនចំនួនប្រាំបួននាក់ក៏ត្រូវបាន​ចាប់​ខ្លួន នៅក្នុងការឆ្មក់ចូលផ្ទះមួយ​កន្លែង​និងបានដកហូតកាំភ្លើងខ្លីចំនួនបីដើម​​ពី​ប្រតិបត្តិការ​នោះ​។

កាលពីខែកក្កដា ប្រធានាធិបតីហ្វីលីពីន លោក Ferdinand Marcos Jr បានហាមប្រាមគ្រប់ទម្រង់នៃប្រតិបត្តិករហ្គេមនៅក្រៅប្រទេស រួមទាំងអ្នកកាន់អាជ្ញាប័ណ្ណហ្គេមអ៊ីនធឺណិតផងដែរ។ ជាមួយគ្នានេះពលករបរទេសរាប់ពាន់នាក់នៅក្រុមហ៊ុនក្រៅច្បាប់ត្រូវបានផ្តល់ពេលពីរខែដើម្បីចាកចេញពីប្រទេសហ្វីលីពីន៕

អត្ថបទ៖ ប៊ុន សុភាព