ព័ត៌មានអន្ដរជាតិ

លោក Netanyhau៖ សង្គ្រាមហ្គាហ្សានៅតែបន្ត ត្បិតការស្លាប់របស់ Sinwar

បានផុស

២ ខែ មុន

នៅ

ថ្ងៃសុក្រ ១៨ តុលា ២០២៤

ដោយ

Chheang

នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា សង្គ្រាមនៅតំបន់ហ្គាហ្សាមិនទាន់បញ្ចប់នោះទេ ថ្វីត្បិតកងកម្លាំង IDF របស់អ៊ីស្រាអែល បានសម្លាប់មេដឹកនាំក្រុមហាម៉ាស និងជាមេខ្លោងការវាយប្រហារថ្ងៃទី៧ខែតុលាឆ្នាំ២០២៣ លោក Yahya Sinwar ក៏ដោយ។ យ៉ាងណា លោក Netanyahu បានបញ្ជាក់ថា នេះគឺជា «ការចាប់ផ្ដើមនៃការបញ្ចប់» នៃសង្គ្រាមរយៈពេល១ឆ្នាំនៅលើទឹកដីប៉ាឡេស្ទីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Netanyahu ដែលបានប្តេជ្ញាថានឹងកម្ទេចក្រុមហាម៉ាសនៅពេលចាប់ផ្តើមសង្រ្គាម បានសាទរចំពោះការសម្លាប់លោក Sinwar ដោយនិយាយថា «ខណៈពេលដែលនេះមិនមែនជាការបញ្ចប់នៃសង្រ្គាមនៅហ្គាហ្សា តែវាគឺជាការចាប់ផ្តើមនៃទីបញ្ចប់»។ លោកបានហៅការស្លាប់របស់លោក Sinwar ថាជា «សញ្ញាសំខាន់ក្នុងការធ្លាក់ចុះនៃការគ្រប់គ្រងដ៏អាក្រក់របស់ហាម៉ាស»។

បើយោងតាមការចុះផ្សាយរបស់សារព័ត៌មាន The Times of Israel នៅថ្ងៃទី១៨ខែតុលា ក្រុម IDF បានប្រកាសថា ខ្លួនកំពុងតាមប្រមាញ់បងប្អូនប្រុសរបស់លោក Sinwar និងកម្ចាត់ចោលមេបញ្ជាការផ្សេងៗទៀតទាំងអស់របស់ក្រុមហាម៉ាស ដើម្បីបញ្ចប់សង្គ្រាម។

លោក Sinwar បានក្លាយជាមេដឹករបស់ក្រុមហាម៉ាស បន្ទាប់ពីការធ្វើឃាតលោក Ismail Haniyeh កាលពីខែកក្កដា នៅទីក្រុងតេហេរ៉ង់ ក្នុងប្រទេសអ៊ីរ៉ង់។ លោកត្រូវបានគេដឹងថាជាអ្នករៀបចំការវាយប្រហារដ៏គួរឲ្យភ្ញាក់ផ្អើលនៅថ្ងៃទី៧ខែតុលាឆ្នាំមុន ទៅលើភាគខាងត្បូងអ៊ីស្រាអែល ដែលបណ្ដាលឲ្យមនុស្ស ១ ២០០នាក់បានស្លាប់ និងមានការចាប់ចំណាប់ខ្មាំងប្រហែល ២៥០នាក់៕

ដោយ៖ ឈាង

ចុចអាន៖ ប្រតិកម្មអន្តរជាតិចំពោះការស្លាប់របស់លោក Sinwar មេក្លោងការវាយប្រហារថ្ងៃ៧តុលា