ព័ត៌មានអន្ដរជាតិ

ប្រតិកម្មអន្តរជាតិចំពោះការស្លាប់របស់លោក Sinwar មេក្លោងការវាយប្រហារថ្ងៃ៧តុលា

បានផុស

២ ខែ មុន

នៅ

ថ្ងៃសុក្រ ១៨ តុលា ២០២៤

ដោយ

Chheang

រដ្ឋមន្ត្រីការបរទេសអ៊ីស្រាអែល លោក Israel Katz បានឲ្យដឹងថា មេដឹកនាំក្រុមហាម៉ាស លោក Yahya Sinwar ដែលជាមេក្លោងនៃការវាយប្រហារថ្ងៃទី៧ខែតុលាឆ្នាំ២០២៣ ដែលបង្កឲ្យផ្ទុះមានសង្រ្គាមនៅតំបន់ហ្គាហ្សា ត្រូវបានសម្លាប់ហើយកាលពីថ្ងៃព្រហស្បតិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខាងក្រោមនេះគឺជាប្រតិកម្មអន្តរជាតិមួយចំនួនអំពីការស្លាប់របស់លោក Sinwar៖

ប្រធានាធិបតីអាមេរិក លោក JOE BIDEN

«ការស្លាប់របស់លោក Sinwar បានផ្តល់ឱកាសសម្រាប់ “ថ្ងៃអនាគត” នៅតំបន់ហ្គាហ្សាដោយគ្មានក្រុមសកម្មប្រយុទ្ធកាន់អំណាច។ លោក Yahya Sinwar គឺជាឧបសគ្គដ៏ធំធេងបំផុតក្នុងការសម្រេចបាននូវគោលដៅទាំងអស់នោះ។ ឧបសគ្គនោះលែងមានទៀតហើយ។ ប៉ុន្តែការងារជាច្រើននៅតែមាននៅចំពោះមុខយើង»។

នាយករដ្ឋមន្ត្រីកាណាដា លោក JUSTIN TRUDEAU

«Yahya Sinwar មេដឹកនាំដ៏ឃោរឃៅនៃអង្គការភេរវករហាម៉ាស ត្រូវបាន IDF កម្ចាត់ចោល។ ក្រោមការដឹកនាំរបស់លោក Sinwar ក្រុមហាម៉ាសបានអនុវត្តអំពើឃោរឃៅដ៏គួរឲ្យរន្ធត់កាលពីថ្ងៃទី៧ខែតុលា ព្យាយាមបំផ្លាញអ៊ីស្រាអែល និងចាប់ផ្តើមការវាយប្រហារភេវកម្មដ៏សាហាវយង់ឃ្នងលើជនស៊ីវិលនៅទូទាំងតំបន់។ ថ្ងៃនេះផ្តល់នូវវិធានការយុត្តិធម៌សម្រាប់ជនរងគ្រោះនិងក្រុមគ្រួសាររបស់ពួកគេ។ ការស្លាប់របស់ Sinwar បានបញ្ចប់នូវរជ្ជកាលនៃភេរវកម្ម»។

ប្រធានាធិបតីបារាំងលោក EMMANUEL MACRON

«Yahya Sinwar គឺជាមនុស្សសំខាន់ដែលទទួលខុសត្រូវចំពោះការវាយប្រហារភេរវកម្ម និងអំពើព្រៃផ្សៃកាលពីថ្ងៃទី៧ខែតុលា។ ថ្ងៃនេះ ខ្ញុំគិតដោយប្រើអារម្មណ៍ជាជនរងគ្រោះ រួមទាំងជនរួមជាតិរបស់យើងចំនួន ៤៨នាក់ និងមនុស្សជាទីស្រឡាញ់របស់ពួកគេផងដែរ។ ប្រទេសបារាំងទាមទារឲ្យមានការដោះលែងចំណាប់ខ្មាំងទាំងអស់ ដែលនៅតែត្រូវក្រុមហាម៉ាសឃុំខ្លួន»។

រដ្ឋមន្ត្រីការបរទេសអាល្លឺម៉ង់ លោកស្រី ANNALENA BAERBOCK

«Sinwar គឺជាឃាតករ និងភេរវករដ៏ឃោរឃៅ ដែលចង់បំផ្លាញអ៊ីស្រាអែល និងប្រជាជនរបស់ខ្លួន។ ក្នុងនាមជាមេក្លោងនៃភេរវកម្មនៅថ្ងៃទី៧ខែតុលា គាត់បានសម្លាប់មនុស្សរាប់ពាន់នាក់ និងនាំមកនូវការឈឺចាប់ដែលមិនអាចកាត់ថ្លៃបានដល់តំបន់ទាំងមូល។ ហាម៉ាសត្រូវតែដោះលែងចំណាប់ខ្មាំងទាំងអស់ ហើយទម្លាក់អាវុធរបស់ខ្លួនចុះ ការឈឺចាប់របស់ប្រជាជននៅតំបន់ហ្គាហ្សាត្រូវតែបញ្ចប់»។

នាយករដ្ឋមន្រ្តីអ៊ីតាលី លោកស្រី GIORGIA MELONI

«ជាមួយនឹងការស្លាប់របស់ Yahya Sinwar គឺជាទីបញ្ចប់របស់ជនល្មើសសំខាន់នៃការសម្លាប់រង្គាលថ្ងៃទី៧ខែតុលាឆ្នាំ២០២៣។ ជំនឿរបស់ខ្ញុំគឺថា ដំណាក់កាលថ្មីមួយត្រូវតែចាប់ផ្តើមនៅពេលនេះ។ វាដល់ពេលដែលចំណាប់ខ្មាំងទាំងអស់ត្រូវបានដោះលែង ដើម្បីឲ្យបទឈប់បាញ់ភ្លាមៗត្រូវបានប្រកាស និងសម្រាប់ការកសាងឡើងវិញនៅតំបន់ហ្គាហ្សា។ យើងនឹងបន្តគាំទ្រយ៉ាងខ្លាំងក្លានូវរាល់កិច្ចខិតខំប្រឹងប្រែងក្នុងទិសដៅនេះ និងសម្រាប់ការបន្តដំណើរការនយោបាយដ៏ហ្មត់ចត់ និងគួរឲ្យជឿជាក់ ដែលនាំទៅរកដំណោះស្រាយរដ្ឋពីរ»។

លេខាធិការការពារជាតិចក្រភពអង់គ្លេស លោក JOHN HEALEY

«ខ្ញុំនឹងមិនកាន់ទុក្ខចំពោះការស្លាប់របស់មេដឹកនាំភេរវកម្មដូច លោក Sinwar ដែលជាអ្នកនៅពីក្រោយការវាយប្រហារភេរវកម្មកាលពីថ្ងៃទី៧ខែតុលានោះទេ ហើយខ្ញុំក៏មានការយល់ឃើញដូចរដ្ឋាភិបាលចក្រភពអង់គ្លេសដែរ គឺថា វាមិនមែមត្រឹមតែជាថ្ងៃដ៏ខ្មៅងងឹត និងជាថ្ងៃដែលមានមនុស្សស្លាប់ច្រើនបំផុតសម្រាប់ប្រជាជនជ្វីហ្វចាប់តាំងពីសង្គ្រាមលោកលើកទី២ប៉ុណ្ណោះទេ ប៉ុន្តែវាក៏ត្រូវបានបង្កឡើងចាប់តាំងពីជម្លោះជាង១ឆ្នាំ និងកម្រិតដែលមិនអាចអត់ទ្រាំបាននៃជនរងគ្រោះប៉ាឡេស្ទីនផងដែរ»។

លោក CHUCK SCHUMER មេដឹកនាំភាគច្រើនបក្សប្រជាធិបតេយ្យនៃព្រឹទ្ធសភាអាមេរិក

«Sinwar នៅក្នុងជំនឿនិងសកម្មភាពរបស់គាត់ បានបង្កឲ្យមានការឈឺចាប់យ៉ាងខ្លាំងដល់ប្រជាជនអ៊ីស្រាអែលនិងប៉ាឡេស្ទីន ហើយខ្ញុំសូមបួងសួងឲ្យការកម្ចាត់គាត់ចេញពីកន្លែងកើតហេតុ នឹងជម្រះផ្លូវមួយដើម្បីនាំយកចំណាប់ខ្មាំងទាំងអស់មកផ្ទះវិញជាបន្ទាន់ និងភ្លាមៗ រួមទាំងជនជាតិអាមេរិកទាំង៧នាក់ផងដែរ ហើយចរចារបញ្ចប់អរិភាពដែលនឹងធានាសន្តិសុខរបស់ប្រជាជនអ៊ីស្រាអែល និងផ្តល់ជំនួយមនុស្សធម៌ពេញលេញ និងផ្លូវថ្មីឆ្ពោះទៅមុខសម្រាប់ប្រជាជនហ្គាហ្សា»។

លោក MIKE JOHNSON មេដឹកនាំសាធារណរដ្ឋនៃតំណាងសភាសហរដ្ឋអាមេរិក

«ដោយមេដឹកនាំដែលស្រេកឃ្លានឈាមនៃក្រុមហាម៉ាស និងហេសបូឡា ឥឡូវនេះបានបាត់បង់ជីវិតទៅហើយ រដ្ឋបាលលោកបៃដិន-លោកស្រី ហារីស ឥឡូវនេះត្រូវតែធ្វើការរួមគ្នាជាមួយអ៊ីស្រាអែល ដើម្បីអនុវត្តយុទ្ធនាការសម្ពាធអតិបរមាប្រឆាំងនឹងក្បាលនៃសត្វពស់ ដោយនោះគឺជា អ៊ីរ៉ង់។ ទោះបីជាត្រូវរដ្ឋបាលលោក បៃដិន -លោកស្រី ហារីស ថ្កោលទោសចំពោះយុទ្ធសាស្ត្ររបស់គាត់ក៏ដោយ ក៏នាយករដ្ឋមន្ត្រី លោក Netanyahu បានបង្កើតជ័យជម្នះជាច្រើនដងសម្រាប់អ៊ីស្រាអែល ដែលថាយើងស្ថិតនៅលើចំណុចកំពូលនៃថ្ងៃថ្មីនៃសន្តិសុខ និងសេរីភាពនៅមជ្ឈិមបូព៌ា។ យើងមិនអាចទុកពេលវេលានេះឲ្យខ្ជះខ្ជាយបានទេ»។

លោក Danny DANON ឯកអគ្គរដ្ឋទូតអ៊ីស្រាអែលប្រចាំអង្គការសហប្រជាជាតិ

«កងកម្លាំង IDF របស់យើងបានកម្ចាត់ Yahya Sinwar មេដឹកនាំក្រុមហាម៉ាស និងជាមេក្លោងនៃការសម្លាប់រង្គាលថ្ងៃទី៧ខែតុលា។ ម្សិលមិញនៅឯក្រុមប្រឹក្សាសន្តិសុខអង្គការសហប្រជាជាតិ មនុស្សជាច្រើនបានសួរថាហេតុអ្វីបានជាយើងនៅតែស្ថិតនៅក្នុងហ្គាហ្សាមួយឆ្នាំបន្ទាប់ពីអំពើឃោរឃៅថ្ងៃទី៧ខែតុលា។ ថ្ងៃនេះពួកគេទទួលបានចម្លើយ។ គ្មានភេរវករណាម្នាក់អាចទប់ទល់នឹងអាវុធដ៏ខ្លាំងរបស់ IDF។ យើងនឹងមិនឈប់ទេ រហូតទាល់តែយើងយកចំណាប់ខ្មាំងទាំងអស់មកផ្ទះវិញ ហើយកម្ចាត់បិសាចហាម៉ាស»៕

ដោយ៖ ឈាង

ចុចអាន៖ អ៊ីស្រាអែល ទម្លាយវីដេអូនៃដង្ហើមចុងក្រោយរបស់មេក្រុមហាម៉ាស