លោក ត្រាំ ប្រកាសមិនឲ្យសមាជិកគ្រួសារ កាន់តួនាទីណាមួយឡើយ ក្នុងរដ្ឋាភិបាលអាណត្តិថ្មីនេះ

ក្នុងបទសម្ភាសជាមួយ Fox News ភ្លាមៗក្រោយឈ្នះឆ្នោតជាប្រធានាធិបតីទី៤៧របស់សហរដ្ឋអាមេរិក លោក ដូណាល់ ត្រាំ ប្រកាសថា លោកនឹងមិនឲ្យសមាជិកគ្រួសារ ចូលកាន់តួនាទីណាមួយឡើយក្នុងរដ្ឋាភិបាលអាណត្តិថ្មីនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បទសម្ភាសដែលផ្សាយបន្តដោយសារព័ត៌មាន RT នៅថ្ងៃព្រហស្បតិ៍ទី៧ខែវិច្ឆិកាឆ្នាំ២០២៤, លោកត្រាំអះអាងថា «គ្រប់គ្រាន់ហើយ​សម្រាប់​គ្រួសាររបស់ខ្ញុំ តើអ្នក​ដឹងទេ​ថា​ហេតុ​អ្វី? នោះគឺដោយសារក្រុម​គ្រួសារខ្ញុំឈឺចាប់ខ្លាំងណាស់ គ្រួសារ​របស់​ខ្ញុំ​បាន​ឆ្លង​កាត់​នរក»។

កាលពីអាណត្តិទីមួយ លោក ត្រាំ គឺជាប្រធានាធិបតីទី៤៥របស់សហរដ្ឋអាមេរិក ដោយកាន់តំណែងពីឆ្នាំ២០១៧ដល់ឆ្នាំ២០២១។ ក្នុងអណត្តិនោះ កូនស្រីលោកត្រាំ គឺ Ivanka និងកូនប្រសារ Jared Kushner កាន់តំណែងជាទីប្រឹក្សាដ៏សំខាន់របស់គាត់ ដែលនាំឲ្យពាក្យរិះគន់យ៉ាងខ្លាំង។

លុះមកដល់ឆ្នាំ២០២២ នៅពេលឪពុកឈរឈ្មោះប្រជែងតំណែងប្រធានាធិបតីម្តងទៀត អ្នកស្រី Ivanka ក៏ប្រកាសថា នាងនឹងលាឈប់ពីនយោបាយ ហើយងាកមកមើលថែកូនៗនិងគ្រួសារវិញ។

អ្នកស្រីសម្រេចចិត្តបែបនេះស្របពេលឪពុក ត្រូវប្រឈមមុខនឹងការចោទប្រកាន់ផ្នែកព្រហ្មទណ្ឌសហព័ន្ធជាច្រើន ទាក់ទងការកាន់កាប់ឯកសារសម្ងាត់ជាង១០០ឯកសារ ដែលគេរកឃើញពីអចលនទ្រព្យ Mar-a-Lago របស់គាត់នៅទីក្រុង Palm Beach នៃរដ្ឋ Florida។

ទាំង Ivanka និងបងប្អូនគឺ Eric និង Donald Jr. សុទ្ធតែត្រូវគេដាក់ឈ្មោះចូលនៅក្នុងបណ្តឹងរដ្ឋប្បវេណីរបស់អគ្គមេធាវីញូវយ៉ក ហើយប្រឈមហានិភ័យផ្នែកច្បាប់ជាផ្នែកពាក់ព័ន្ធមុខជំនួញនៃត្រកូល ត្រាំ។

សូមបញ្ជាក់ជាថ្មី លោក ដូណាល់ ត្រាំ នៃគណបក្សសាធារណរដ្ឋ បានផ្តួលលោកស្រី កាម៉ាឡា ហារីស មកពីគណបក្សប្រជាធិបតេយ្យ ឈ្នះឆ្នោតជាប្រធានាធិបតីទី៤៧របស់សហរដ្ឋអាមេរិក និងក្លាយជាប្រធានាធិបតីអាមេរិកទី២ក្នុងប្រវត្តិសាស្រ្តដែលឈ្នះឆ្នោតពីរអាណត្តិប៉ុន្តែមិនជាប់គ្នា បន្ទាប់ពីលោក Grover Cleveland ឈ្នះបែបនេះដែរ ក្នុងឆ្នាំ១៨៩២៕

អត្ថបទ៖ សុខ សុវណ្ណ

ចុចអាន៖ រុស្ស៊ី ថា អ៊ុយក្រែន កំពុងភ័យខ្លួន ក្រោយលោក ត្រាំ ឈ្នះឆ្នោត