រុស្ស៊ី ថា អ៊ុយក្រែន កំពុងភ័យខ្លួន ក្រោយលោក ត្រាំ ឈ្នះឆ្នោត

ជុំវិញលទ្ធផលបោះឆ្នោតសហរដ្ឋអាមេរិក, ប្រទេសរុស្ស៊ី បានប្រកាសថា ជ័យជម្នះរបស់លោក ដូណាល់ ត្រាំ គឺជាដំណឹងដ៏អាក្រក់បំផុតសម្រាប់អ៊ុយក្រែន ហើយទីក្រុងកៀវ កំពុងភ័យខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Daily Mail កាលពីថ្ងៃពុធទី៦ខែវិច្ឆិកាឆ្នាំ២០២៤, អតីតប្រធានាធិបតីរុស្ស៊ីលោក Dmitry Medvedev និយាយថា នេះជាដំណឹងអាក្រក់មួយសម្រាប់អ៊ុយក្រែន ព្រោះលោកត្រាំប្រហែលជានឹងកាត់ជំនួយរបស់ទីក្រុងវ៉ាស៊ីនតោន ទៅទីក្រុងកៀវ។ យ៉ាងណា គេនៅមិនទាន់ដឹងឡើយថាតើ បើសិនជាកាត់ជំនួយមែន តើប្រធានាធិបតីជាប់ឆ្នោតអាមេរិករូបនេះ នឹងកាត់ក្នុងកម្រិតណា។ 

លោក Medvedev បញ្ជាក់ថា អាជ្ញាធរអ៊ុយក្រែន បានជាប់ក្នុងបញ្ជីជាប្រភេទក្រុមដែលលោក ត្រាំ ទំនងជាមិនចង់ជះប្រាក់ច្រើនទៅលើរួចទៅហើយ និងធ្លាប់លើកឡើងថា ថ្នាក់ដឹកនាំអ៊ុយក្រែន គួរធ្វើអ្វីដែលខ្លួនឯងអាចធ្វើបាន។

ទោះបីជាយ៉ាងណាក៏ដោយ ប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី ក៏បានអបអរសាទរលោក ត្រាំ ផងដែរចំពោះជ័យជម្នះក្នុងការបោះឆ្នោតនេះ ហើយត្បិតតែបណ្តាសម្ព័ន្ធមិត្តអ៊ុយក្រែន កំពុងបារម្ភថា អាមេរិកនឹងកាត់ជំនួយដល់ទីក្រុងកៀវក្រោមការដឹកនាំរបស់អ្នកសាធារណរដ្ឋរូបនេះក៏ពិតមែន ក៏លោក ហ្សេលេនស្គី បានគូសបញ្ជាក់ពីការគាំទ្រដ៏រឹងមាំនៅក្នុងសហរដ្ឋអាមេរិកសម្រាប់ប្រទេសគាត់ ដើម្បីប្រយុទ្ធប្រឆាំងជាមួយរុស្ស៊ី។

ប្រធានាធិបតីអ៊ុយក្រែន លើកឡើងថា យើងកំពុងរង់ចាំឲ្យដល់យុគសម័យនៃសហរដ្ឋអាមេរិកដ៏រឹងមាំមួយ ក្រោមការដឹកនាំរបស់លោក ត្រាំ។ យើងពឹងផ្អែកលើការគាំទ្រទ្វេបក្សដ៏រឹងមាំសម្រាប់អ៊ុយក្រែននៅក្នុងសហរដ្ឋអាមេរិក ហើយយើងចាប់អារម្មណ៍លើការអភិវឌ្ឍកិច្ចសហប្រតិបត្តិការនយោបាយនិងសេដ្ឋកិច្ចដែលមានផលប្រយោជន៍ទៅវិញទៅមក ដែលនឹងផ្តល់ផលប្រយោជន៍ដល់ប្រជាជាតិយើងទាំងពីរ។

សូមបញ្ជាក់ថា លោក ដូណាល់ ត្រាំ បានក្លាយជាប្រធានាធិបតីអាមេរិកទី២ក្នុងប្រវត្តិសាស្រ្តដែលឈ្នះឆ្នោតពីរអាណត្តិប៉ុន្តែមិនជាប់គ្នា បន្ទាប់ពីលោក Grover Cleveland ឈ្នះបែបនេះដែរ ក្នុងឆ្នាំ១៨៩២។

ពិភពលោក កំពុងរង់ចាំមើលថាតើ ការដឹកនាំរបស់លោក ត្រាំ សម្រាប់អាណត្តិទី២នេះ នឹងមានអ្វីកើតឡើងខ្លះ ហើយអាចជួយសហរដ្ឋអាមេរិកបានដល់កម្រិតណា។ គេក៏កំពុងរង់ចាំមើលផងដែរថាតើលោក ត្រាំ នឹងមានវិធីសាស្រ្តអ្វី ដើម្បីកាត់បន្ថយការឡើងកម្តៅនៃជម្លោះសកលលោក ជាពិសេសលោកធ្លាប់អះអាងថា នឹងបញ្ចប់សង្គ្រាមរុស្ស៊ី-អ៊ុយក្រែន ក្នុងរយៈពេលត្រឹម២៤ម៉ោងប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ បៃដិន-ហារីស សុទ្ធតែទូរស័ព្ទទៅ ត្រាំ ដើម្បីអបអរ និងអញ្ជើញមកសេតវិមាន ដើម្បីពិភាក្សាការផ្ទេរអំណាច