ភ្នំភ្លើងនៅអ៊ីស្លង់ ផ្ទុះជា​លើកទី៧ ក្នុងមួយឆ្នាំ

ភ្នំភ្លើងមួយនៅភាគនិរតីនៃប្រទេសអ៊ីស្លង់បាន​លាន់​​សូរ​ឡើងវិញ បន្ទាប់ពីស្ងៀមស្ងាត់អស់រយៈពេល​៨សតវត្សរ៍​បានផ្ទុះឡើងជាលើកទី៧ចាប់តាំងពីខែធ្នូឆ្នាំមុនមក ដោយបានបញ្ជូនកម្អែរហូរឆ្ពោះទៅកាន់កន្លែង​ដែល​ទេសចរ​ពេញ​និយម​ដ៏សំខាន់មួយរបស់ប្រទេសនេះ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២២ខែវិច្ឆិកានេះ។

ការផ្ទុះ​ភ្នំភ្លើង​នៅលើឧបទ្វីប Reykjanes បានចាប់ផ្តើមជាមួយនឹងការព្រមានតិចតួចនៅម៉ោង ១១:១៤​យប់ថ្ងៃពុធ ហើយ​បានបង្កើតស្នាម​ប្រេះស្រាំប្រេវែងប្រហែល៣​គីឡូម៉ែត្រ។ យោងតាមការិយាល័យឧតុនិយមរបស់ប្រទេសអ៊ីស្លង់ដែល​តាមដានសកម្មភាពរញ្ជួយដី សកម្មភាពនេះត្រូវបានប៉ាន់ប្រមាណថា មានទំហំតូចជាងការផ្ទុះលើកមុនក្នុងខែសីហា ហើយ​ការផ្ទុះភាគច្រើនបានថយចុះក្នុងរយៈពេលប៉ុន្មានថ្ងៃនេះ។

លោក Magnús Tumi Guðmundsson សាស្ត្រាចារ្យផ្នែកភូគព្ភសាស្ត្រ ដែលបានហោះហើរពីលើកន្លែងកើតហេតុជាមួយទីភ្នាក់ងារការពារជនស៊ីវិល ដើម្បីតាមដានព្រឹត្តិការណ៍នេះ បានប្រាប់ឲ្យដឹងថា «នៅក្នុងរូបភាពធំ នេះគឺតូចជាងការផ្ទុះចុងក្រោយបន្តិច ដែលបានកើតឡើងនៅក្នុងខែឧសភា ទោះយ៉ាងណាក៏ត្រូវតែមានការប្រុងប្រយ័ត្ន»។

ទោះបីការផ្ទុះមិនគំរាមកំហែងដល់ការធ្វើដំណើរតាមផ្លូវអាកាស អាជ្ញាធរនៅតែព្រមានអំពីការបំភាយឧស្ម័ននៅទូទាំងផ្នែកនៃឧបទ្វីបនេះ រួមទាំងទីក្រុង Grindavík ក្បែរនោះផងដែរ ដែលត្រូវបានជម្លៀសភាគច្រើនកាលពីមួយឆ្នាំមុន ដោយសារភ្នំភ្លើងនេះបានរស់ឡើងវិញបន្ទាប់ពីបានស្ងប់ស្ងាត់អស់រយៈពេល ៨០០ឆ្នាំ។

ផ្ទះប្រជាពលរដ្ឋប្រហែល ៥០ ខ្នងត្រូវបានជម្លៀសចេញ បន្ទាប់ពីទីភ្នាក់ងារការពារជនស៊ីវិលបានចេញការជូនដំណឹងនេះ រួមជាមួយនឹងភ្ញៀវទេសចរណ៍នៅឯ Blue Lagoon ដោយសារកម្អែភ្នំភ្លើងបានរាលដាលពាសពេញចំណតរថយន្តនៃកន្លែងស្ប៉ា ជាកន្លែងទេសចរណ៍ដ៏ធំបំផុតមួយរបស់ប្រទេសអ៊ីស្លង់។

ជាមួយគ្នានេះការផ្ទុះភ្នំភ្លើងម្តងហើយម្តងទៀតនៅជិត Grindavík ដែលមានចម្ងាយប្រហែល ៥០គីឡូម៉ែត្រភាគនិរតីនៃរដ្ឋធានី Reykjavik និងមានប្រជាជនមុនពេលការផ្ទុះចំនួន ៣៨០០ នាក់បានបំផ្លាញហេដ្ឋារចនាសម្ព័ន្ធ និងទ្រព្យសម្បត្តិ ដែលបង្ខំឱ្យអ្នកស្រុកជាច្រើនត្រូវផ្លាស់ទីលំនៅដើម្បីធានាសុវត្ថិភាពរបស់ពួកគេ។

គួរបញ្ជាក់ថា ប្រទេសអ៊ីស្លង់ ដែលស្ថិតនៅពីលើចំណុចក្តៅនៃភ្នំភ្លើងនៅអាត្លង់ទិកខាងជើង ជាមធ្យមមានការផ្ទុះមួយរៀងរាល់ ៤ ទៅ ៥ឆ្នាំម្តង។ ការរំខានបំផុតក្នុងរយៈពេលថ្មីៗនេះគឺការផ្ទុះភ្នំភ្លើង Eyjafjallajokull ឆ្នាំ ២០១០ ដែលបានបញ្ចេញពពកផេះចូលទៅក្នុងបរិយាកាស និងរំខានដល់ការធ្វើដំណើរតាមផ្លូវអាកាសឆ្លងកាត់អាត្លង់ទិកអស់រយៈពេលជាច្រើនខែ៕

អត្ថបទ៖ ប៊ុន សុភាព