លោក ហ្សេលេនស្គី៖ ពូទីន កំពុងសាកចិត្តយើងហើយ ពិភពលោកត្រូវរួមគ្នាតបត

ប៉ុន្មានម៉ោងបន្ទាប់ពីមេដឹកនាំវិមានក្រឹមឡាំង វ្ល៉ាឌីមៀរ ពូទីន ចេញបញ្ជាឲ្យបាញ់មីស៊ីលល្បឿនលឿនជាងសំឡេង វាយប្រហារទីក្រុង Dnipro នៃប្រទេសអ៊ុយក្រែន, លោក វ្ល៉ាឌីមៀរ ហ្សេលេនស្គី បានចេញមុខអំពាវនាវឲ្យពិភពលោក ត្រូវរួមកម្លាំងគ្នាតបតទៅរុស្ស៊ី ហើយនិយាយថា លោកពូទីន កំពុងសាកចិត្តយើងហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការបង្ហោះលើបណ្តាញសង្គម X កាលពីថ្ងៃព្រហស្បតិ៍ទី២១ខែវិច្ឆិកាឆ្នាំ២០២៤ លោក ហ្សេលេនស្គី និយាយថា «ពិភពលោកត្រូវតែឆ្លើយតប។ ពេលនេះ មិនមានប្រតិកម្មខ្លាំងក្លាណាមួយពីពិភពលោកទេ។ លោកពូទីន កំពុងសប្បាយអរហើយចំពោះរឿងនេះ។ គាត់​កំពុង​សាកចិត្តយើង»។

ស្របពេលជាមួយគ្នានោះ លោកហ្សេលេនស្គី អះអាងថា ការបាញ់មីស៊ីលល្បឿនលឿនជាងសំឡេងថ្មីបំផុតរបស់រុស្ស៊ីកាលពីម្សិលមិញ បានបង្ហាញយ៉ាងច្បាស់ថា សង្រ្គាមកាន់តែរីកធំនិងពុះកញ្ជ្រោលកាន់តែខ្លាំងឡើងៗហើយ។ លោកនិយាយថា ការបាញ់មីស៊ីលលើអ៊ុយក្រែនថ្មីៗនេះ គឺជាព័ស្តុតាងបន្ថែមទៀតថា រុស្ស៊ីគ្មានចំណាប់អារម្មណ៍ចំពោះសន្តិភាពទេ។

តាមការបញ្ជាក់ពីលោក ពូទីន កាលពីថ្ងៃព្រហស្បតិ៍, មីស៊ីលដែលរុស្ស៊ីបាញ់លើអ៊ុយក្រែនថ្មីៗនេះ គឺជាមីស៊ីលល្បឿនលឿនជាងសំឡេងរយៈចម្ងាយមធ្យម Oreshnik ដែលលើពិភពលោក គ្មានប្រព័ន្ធណាមួយអាចស្ទាក់ចាប់មីស៊ីលនេះបានទេ។

យោងតាមលោកពូទីន, Oreshnik គឺជាមីស៊ីលជំនាន់ថ្មីដ៏ទំនើប ធ្វើដំណើរលឿនជាងសំឡេង១០ដង ពោលគឺហោះក្នុងល្បឿន២.៥ទៅ៣គីឡូម៉ែត្រក្នុងមួយវិនាទី។

លោកអះអាងថា ការវាយប្រហារនេះ គឺដើម្បីឆ្លើយតបទៅអ៊ុយក្រែន ដែលបាញ់មីស៊ីល ATACMS និង HIMARS ផលិតដោយសហរដ្ឋអាមេរិក និងមីស៊ីល Storm Shadow របស់ចក្រភពអង់គ្លេស ទៅលើទីតាំងយោធាក្នុងទឹកដីរុស្ស៊ីដែលអន្តរជាតិទទួលស្គាល់។

ទន្ទឹមនោះ លោក ពូទីន ព្រមានថា ប្រទេសណាក៏ដោយ ឲ្យតែផ្តល់អាវុធជួយអ៊ុយក្រែនយកមកបាញ់ចូលដីរុស្ស៊ី ទីក្រុងមូស្គូនឹងសងសឹក ដោយវាយប្រហារទីតាំងយោធារបស់ប្រទេសនោះវិញ៕

អត្ថបទ៖ សុខ សុវណ្ណ

ចុចអាន៖ រុស្ស៊ី គំរាមវាយប្រហារប្រទេសជាសមាជិកអង្គការ ណាតូ