ព័ត៌មានអន្ដរជាតិ

មិនទាន់ឡើងកាន់តំណែងផង លោក ត្រាំ ឈ្លោះជាមួយប្រទេសមួយចំនួនបាត់ទៅហើយ

បានផុស

៤ ខែ មុន

នៅ

ថ្ងៃពុធ ២៧ វិច្ឆិកា ២០២៤

ដោយ

មិនទាន់ឡើងកាន់តំណែងជាផ្លូវការផង លោក ដូណាល់ ត្រាំ បានបង្កជម្លោះជាមួយប្រទេសមួយចំនួនបាត់ទៅហើយ ជាពិសេសលើវិស័យពាណិជ្ជកម្ម ដោយកាលពីពេលថ្មីៗនេះ លោកបានប្រកាសដំឡើងពន្ធថ្មីលើប្រទេសចំនួន៣ ដូចជាចិន ម៉ិកស៊ិក និងកាណាដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីជាប់ឆ្នោតអាមេរិកវ័យ៧៨ឆ្នាំរូបនេះ បាននិយាយថា ភ្លាមៗបន្ទាប់ពីឡើងកាន់តំណែងនៅថ្ងៃទី២០ខែមករា លោកនឹងចុះហត្ថលេខាលើបទបញ្ជាប្រតិបត្តិដែលដំឡើងពន្ធ ២៥% លើទំនិញទាំងអស់មកពីម៉ិកស៊ិក និងកាណាដា ហើយពន្ធបន្ថែម ១០% នឹងត្រូវដាក់លើប្រទេសចិន រហូតទាល់តែរដ្ឋាភិបាលក្រុងប៉េកាំង រារាំងការរត់ពន្ធសារធាតុញៀនហ្វេតានីល ដែលសម្លាប់ពលរដ្ឋអាមេរិកជិត ៧៥ ០០០នាក់កាលពីឆ្នាំ២០២៣។

បញ្ហានេះធ្វើឲ្យទីក្រុងប៉េកាំងមិនសប្បាយចិត្តទេ ដោយស្ថានទូតចិនប្រចាំសហរដ្ឋអាមេរិក បានលើកឡើងកាលពីថ្ងៃទី២៥ខែវិច្ឆិកាថា រវាងក្រុងប៉េកាំងឬក្រុងវ៉ាស៊ីនតោន នឹងគ្មាននរណាម្នាក់ឈ្នះសង្គ្រាមពាណិជ្ជកម្មឡើយ។

លោក Liu Pengyu អ្នកនាំពាក្យស្ថានទូតចិន បាននិយាយថា «ទាក់ទិននឹងបញ្ហាពន្ធអាមេរិកលើចិន ចិនជឿថា កិច្ចសហប្រតិបត្តិការពាណិជ្ជកម្ម និងសេដ្ឋកិច្ចរវាងចិន-អាមេរិក នៅតែផ្ដល់ផលប្រយោជន៍ឲ្យគ្នាទៅវិញទៅមកដដែល។ គ្មាននរណាម្នាក់នឹងឈ្នះសង្គ្រាមពាណិជ្ជកម្ម ឬក៏សង្គ្រាមពន្ធនោះទេ»។

ចំណែកឯប្រទេសម៉ិកស៊ិកឯណោះវិញ លោកស្រីប្រធានាធិបតី Claudia Sheinbaum បានស្តីបន្ទោសលោក ត្រាំ ខ្លាំងៗ ហើយគំរាមសងសឹក ដោយដំឡើងពន្ធលើសហរដ្ឋអាមេរិកដូចគ្នា។ លោកស្រីព្រមានថា ពន្ធគយនឹងបណ្តាលឲ្យមានអតិផរណានិងបាត់បង់ការងារធ្វើ នៅក្នុងប្រទេសទាំងពីរ។

ប្រធានាធិបតីម៉ិកស៊ិកលោកស្រី Claudia Sheinbaum (រូបថត៖ Getty)

គេដឹងថា ការដែលលោក ត្រាំ ដំឡើងពន្ធលើប្រទេសម៉ិកស៊ិក គឺដោយសារតែ មិនពេញចិត្តដែលរដ្ឋាភិបាលម៉ិកស៊ិក មិនអាចធ្វើអ្វីបានដើម្បីទប់ស្កាត់លំហូរជនអន្តោប្រវេសន៍និងគ្រឿងញៀន ចូលក្នុងទឹកដីអាមេរិក។

រីឯកាណាដា ការិយាល័យរបស់លោក Justin Trudeau បានបញ្ជាក់ថា នាយករដ្ឋមន្ត្រីបានជជែកជាមួយលោក ត្រាំ រួចហើយពាក់ព័ន្ធបញ្ហានេះ ហើយបច្ចុប្បន្នកំពុងចរចាគ្នាបន្ថែមទៀត។

សូមបញ្ជាក់ថា ក្នុងអំឡុងពេលយុទ្ធនាការបោះឆ្នោត លោក ត្រាំ ធ្លាប់សន្យាដាក់ពន្ធ ៦០% ឬច្រើនជាងនេះលើការនាំចូលទំនិញរបស់ចិន ហើយអះអាងទៀតថា លោកអាចដាក់ពន្ធ ២០០% ឬខ្ពស់ជាងនេះឯណោះលើយានយន្តដែលនាំចូលពីម៉ិកស៊ិក។

យ៉ាងណា អ្នកសេដ្ឋកិច្ចជាច្រើន ព្រមានថា សំណើរបស់លោក ត្រាំ សម្រាប់ពន្ធលើមូលដ្ឋានទូទៅនេះនឹងបង្កើនថ្លៃដើមនៃទំនិញប្រចាំថ្ងៃនៅក្នុងសហរដ្ឋអាមេរិក ហើយធ្វើឲ្យកំណើនសេដ្ឋកិច្ចពិភពលោកធ្លាក់ចុះ៕

អត្ថបទ៖ សុខ សុវណ្ណ

ចុចអាន៖ ចិន បញ្ចេញប្រតិកម្ម ក្រោយលោក ត្រាំ គំរាមដំឡើងពន្ធ