ការប្រយុទ្ធគ្នា ផ្ទុះឡើងហើយ! ក្រុមឧទ្ទាមស៊ីរី ចូលដល់រដ្ឋធានីដាម៉ាស និងរំដោះអ្នកទោស 

ពេលនេះក្រុមឧទ្ទាម Hayat Tahrir al-Sham ហៅកាត់ HTS បានសម្រុកចូលដល់ទីក្រុងដាម៉ាសហើយ ខណៈការប្រយុទ្ធគ្នាជាមួយកងកម្លាំងរបស់រដ្ឋាភិបាលលោក Bashar al-Assad កំពុងផ្ទុះឡើង ហើយក្រុមនេះ ក៏បានរំដោះអ្នកទោស ចេញពីពន្ធនាគារល្បីបំផុតរបស់ប្រទេសស៊ីរីផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC នៅថ្ងៃអាទិត្យទី៨ខែធ្នូឆ្នាំ២០២៤, ក្រុមឧទ្ទាមនេះបានបង្ហោះក្នុងឆានែល Telegram របស់ខ្លួនថា «កងកម្លាំងរបស់យើង បានចូលដល់រដ្ឋធានីដាម៉ាសហើយ»។

អ្នកក្រុងដាម៉ាស បានរាយការណ៍ពីការផ្ទុះអាវុធទ្រង់ទ្រាយធំនៅសង្កាត់ Barzeh ហើយបណ្តាញអ៊ិនធឺណិតនិងចរន្តអគ្គិសនី ត្រូវកាត់ផ្តាច់។

ស្របពេលជាមួយគ្នានោះ ក្រុមឧទ្ទាម HTS ក៏បានរំដោះអ្នកទោសចេញពីពន្ធនាគារ Saydnaya ផងដែរ។ ពន្ធនាគារមានឃុំឃាំងអ្នកគាំទ្រគណបក្សប្រឆាំងរាប់ពាន់នាក់ ដោយត្រូវគេធ្វើទារុណកម្មនិងប្រហារជីវិត ហើយធ្លាប់ត្រូវបានអង្គការសហប្រជាជាតិ ចាត់ទុកថាជា «ទីពិឃាដមនុស្ស»។

សូមបញ្ជាក់ថា ក្រុម HTS បានបើកការវាយលុកកាលពីខែវិច្ឆិកា ជាមួយគោលបំណងធំ គឺផ្តួលរំលំរដ្ឋាភិបាលរបស់លោក Assad និងបង្ខំឲ្យកងកម្លាំងបរទេស ចាកចេញពីស៊ីរី។

ប្រតិបត្តិការនេះ បានបង្កជាក្តីបារម្ភអំពីការផ្ទុះចលានាបះបោរថ្មីនៅក្នុងតំបន់ ខណៈបណ្តាប្រទេសអារ៉ាប់កំពុងខ្វល់ចិត្ត ដោយខ្លាចតំបន់ធ្លាក់ចូលក្នុងអស្ថិរភាពសាជាថ្មី។

យ៉ាងណាក្តី ជុំវិញរឿងនេះ រដ្ឋមន្ត្រីការបរទេសមកពីប្រទេសរុស្ស៊ី អ៊ីរ៉ង់ និងតួកគី បានជួបប្រជុំគ្នាក្នុងទីក្រុង ដូហា នៃប្រទេសកាតា រួចហើយដើម្បីពិភាក្សាគ្នារកមធ្យោបាយដោះស្រាយជម្លោះ៕

អត្ថបទ៖ សុខ សុវណ្ណ

ចុចអាន៖ ក្រុមឧទ្ទាម វាយចូលទីក្រុងធំទី៣របស់ស៊ីរី ដណ្តើមការគ្រប់គ្រងទាំងស្រុង