យន្តហោះចម្បាំង F-16 បន្ថែមទៀត បានទៅដល់ដៃ អ៊ុយក្រែន

ប្រទេសអ៊ុយក្រែនបានទទួលយន្តហោះ F-16 បន្ថែមទៀតហើយ ដោយបើតាមការបញ្ជាក់ពីលោកប្រធានាធិបតី វ្ល៉ាឌីមៀរ ហ្សេលេនស្គី កាលពីថ្ងៃសៅរ៍ទី៧ខែធ្នូឆ្នាំ២០២៤, យន្តហោះចម្បាំងផលិតដោយអាមេរិកថ្មីនេះ គឺជាក្រុមទី២ដែលប្រគល់ឲ្យដោយប្រទេសដាណឺម៉ាក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីខែសីហា អ៊ុយក្រែន បានទទួលយន្តហោះចម្បាំងដ៏ទំនើបនេះម្តងរួចមកហើយពីដាណឺម៉ាក និងហូឡង់។ ទោះយ៉ាងណា លោកហ្សេលេនស្គី មិនបញ្ជាក់ឡើយថាតើ យន្តហោះចម្បាំងក្រុមទី២នេះមានប៉ុន្មានគ្រឿង ឬថាតើវាត្រូវបានដាក់ឲ្យប្រយុទ្ធក្នុងសមរភូមិរួចហើយឬនៅ។

ជុំវិញការផ្តល់យន្តហោះចម្បាំងថ្មីនេះ លោក ហ្សេលេនស្គី បានបង្ហោះសារក្នុងបណ្តាញសង្គម X ថា «ឥឡូវខែលការពារអាកាសរបស់យើងកាន់តែរឹងមាំហើយ។ សូមអរគុណនាយករដ្ឋមន្ត្រីដាណឺម៉ាក Mette Frederiksen សម្រាប់ការគាំទ្រជាបន្តរបស់អ្នកស្រី»។

ពីដំបូងឡើយ អ៊ុយក្រែន ចង់បាន F-16 ខ្លាំងណាស់ ព្រោះគិតថា យន្តហោះចម្បាំងប្រភេទនេះ អាចកែប្រែស្ថានការណ៍និងជួយខ្លួនបានច្រើន ក្នុងសង្គ្រាមជាមួយរុស្ស៊ី។ ទោះបីជាយ៉ាងណាក៏ដោយ មកទល់ពេលនេះ គេមើលឃើញថា F-16 មិនទាន់ជួយអ៊ុយក្រែន បានជាផ្លែផ្កាណាស់ណាទេ។

កាលពីខែសីហា អ្នកនាំពាក្យវិមានក្រឹមឡាំងលោក Dmitry Peskov ក៏បញ្ជាក់ដែរថា F-16 ដែលប្រទេសលោកខាងលិច បញ្ជូនទៅឲ្យអ៊ុយក្រែន នឹងមិនអាចជួយផ្លាស់ប្តូរស្ថានភាពនៅសមរភូមិបានឡើយ ព្រោះថា វាមិនមែនជា «ថ្នាំវេទមន្ត» ទេ។

សូមបញ្ជាក់ជាថ្មី កាលពីឆ្នាំមុន សមាជិកអង្គការណាតូមួយចំនួន ដូចជាដាណឺម៉ាក ហូឡង់ បែលហ្ស៊ិក កាណាដា លុចសំបួរ ន័រវែស ប៉ូឡូញ ព័រទុយហ្គាល់ រូម៉ានី និងស៊ុយអែត បានបង្កើតនូវអ្វីដែលគេហៅថា «សម្ព័ន្ធ F-16» ហើយក្រោយមក ក្រិក អាមេរិក ប៊ុលហ្គារី និងបារាំងក៏ចូលរួមក្រុមនេះដែរ ដើម្បីជួយយន្តហោះចម្បាំងឲ្យអ៊ុយក្រែន៕

អត្ថបទ៖ សុខ សុវណ្ណ

ចុចអាន៖ រុស្ស៊ី៖ F-16 មិនមែន «ថ្នាំវេទមន្ត» សម្រាប់ អ៊ុយក្រែន ទេ