ព័ត៌មានអន្ដរជាតិ

លោក ត្រាំ និងលោក ណេតាន់យ៉ាហ៊ូ ពិភាក្សាគ្នាពីរឿងស៊ីរី និងការដោះលែងចំណាប់ខ្មាំងនៅហ្គាហ្សា

បានផុស

៣ ខែ មុន

នៅ

ថ្ងៃចន្ទ ១៦ ធ្នូ ២០២៤

ដោយ

Chheang

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានជជែកជាមួយប្រធានាធិបតីទើបជាប់ឆ្នោតអាមេរិក លោក ដូណាល់ ត្រាំ អំពីការវិវឌ្ឍនៅក្នុងប្រទេសស៊ីរី និងការដោះលែងចំណាប់ខ្មាំងដែលកំពុងស្ថិតក្នុងកណ្ដាប់ដៃក្រុមហាម៉ាសនៅតំបន់ហ្គាហ្សា។

លោក បេនចាមីន ណេតាន់យ៉ាហ៊ូ និងលោក ដូណាល់ ត្រាំ (រូបភាព៖ AAP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ណេតាន់យ៉ាហ៊ូ បានប្រាប់ថា លោកបានពិភាក្សាតាមទូរសព្ទជាមួយលោក ត្រាំ កាលពីយប់ថ្ងៃសៅរ៍ទី១៤ខែធ្នូឆ្នាំ២០២៤ អំពីកិច្ចខិតខំប្រឹងប្រែងដើម្បីទទួលបានការដោះលែងចំណាប់ខ្មាំង ដោយពណ៌នាការហៅទូរសព្ទនេះថា «រួសរាយរាក់ទាក់ កក់ក្តៅ និងមានសារៈសំខាន់ខ្លាំងណាស់»។

នាយករដ្ឋមន្ត្រីអ៊ីស្រាអែល បានបញ្ជាក់ថា បើដោះស្រាយបញ្ហាទាំងនេះមិនទាន់មុនពេលលោក ត្រាំ ឡើងកាន់តំណែងនៅថ្ងៃទី២០ខែមករាខាងមុខទេ នោះវានឹងក្លាយជាបញ្ហាប្រឈមនៅបរទេសដ៏សំខាន់មួយសម្រាប់ប្រធានាធិបតីថ្មីរបស់សហរដ្ឋអាមេរិក។

លោក ណេតាន់យ៉ាហ៊ូ បាននិយាយថា៖ «យើងបានពិភាក្សាពីតម្រូវការ ដើម្បីបញ្ចប់ជ័យជម្នះរបស់អ៊ីស្រាអែល ហើយយើងបាននិយាយយ៉ាងវែងអំពីកិច្ចខិតខំប្រឹងប្រែង ដែលយើងកំពុងធ្វើ ដើម្បីដោះលែងចំណាប់ខ្មាំងរបស់យើង»។

លោកបានបន្ថែមថា កិច្ចពិភាក្សានេះ ក៏បានផ្ដោតលើស្ថានភាពនៅក្នុងប្រទេសស៊ីរី បន្ទាប់ពីការផ្តួលរលំនៃរបបអតីតប្រធានាធិបតី Bashar al-Assad។

អ៊ីស្រាអែល បានធ្វើការវាយប្រហារជាច្រើនលើកលើឃ្លាំងស្តុកអាវុធយុទ្ធសាស្ត្ររបស់ប្រទេសស៊ីរី ក្នុងរយៈពេលប៉ុន្មានថ្ងៃថ្មីៗនេះ ចាប់តាំងពីការទម្លាក់លោក Assad និងបានផ្លាស់ប្តូរកងទ័ពចូលទៅក្នុងតំបន់គ្មានយោធានៅស៊ីរី។

លោក ណេតាន់យ៉ាហ៊ូ បានប្រាប់ថា អ៊ីស្រាអែលមិនមានចំណាប់អារម្មណ៍នៅក្នុងជម្លោះជាមួយស៊ីរីទេ ដោយបន្ថែមថា សកម្មភាពរបស់អ៊ីស្រាអែលគឺមានបំណង «រារាំងការគំរាមកំហែង ដែលអាចកើតមានពីប្រទេសស៊ីរី និងដើម្បីទប់ស្កាត់ការកាន់កាប់បណ្ដុំភេរវករនៅជិតព្រំដែន»៕

ដោយ៖ ឈាង