ជំងឺអាថ៌កំបាំងនៅកុងហ្គោដែលសម្លាប់មនុស្សរាប់សិបនាក់ គឺជាជំងឺគ្រុនចាញ់​កម្រិតធ្ងន់់ធ្ងរ​​

ក្រសួងសុខាភិបាលរបស់ប្រទេស​កុងហ្គោ​ បានប្រកាសថា ជំងឺដែល​ធ្លាប់​បាន​ប្រកាស​មិនស្គាល់អត្តសញ្ញាណពីមុន​នោះ​និងកំពុងរីករាលដាលនៅសាធារណរដ្ឋប្រជាធិបតេយ្យកុងហ្គោ (DRC) សម្លាប់មនុស្សរាប់សិបនាក់គឺជា«ទម្រង់ធ្ងន់ធ្ងរនៃជំងឺគ្រុនចាញ់»។

សារព័ត៌មាន Al Jazeera ផ្សាយ​​នៅថ្ងៃទី១៨ខែធ្នូ ដោយ​​ដក​ស្រង់​​ប្រភព​​ពី​​ក្រសួងសុខាភិបាល​កុងហ្គោ ​បាន​ឲ្យ​ដឹង​ថា ជំងឺនេះបានរីករាលដាលនៅក្នុងខេត្ត Kwango ភាគនិរតី ដែលមានរោគសញ្ញាដូចជា «ជំងឺផ្លូវដង្ហើម»​។ កាលពី​ដើម​ខែនេះ​ ជំងឺនេះបានសម្លាប់មនុស្ស ១៤៣​នាក់នៅក្នុងមណ្ឌលសុខភាព Panzi ខណៈដែលការភ័យខ្លាចបានកើនឡើងអំពីជំងឺ​អាថ៌កំបាំងរបស់ជំងឺនេះ។ ប៉ុន្តែ​​នៅ​ទីបំផុត អាថ៌កំបាំងត្រូវបានស្រាយដោយក្រសួងសុខាភិបាលបានប្រកាសថា«វាជាករណីនៃជំងឺគ្រុនចាញ់ធ្ងន់ធ្ងរក្នុងទម្រង់ជាជំងឺផ្លូវដង្ហើម»។

ក្រសួងក៏បានឲ្យដឹងដែរថា កង្វះអាហារូបត្ថម្ភនៅក្នុងតំបន់នេះបានធ្វើឱ្យប្រជាជនក្នុងតំបន់ចុះខ្សោយ ដោយធ្វើឱ្យពួកគេងាយនឹងកើតជំងឺនេះ។ ចាប់តាំងពីជំងឺនេះផ្ទុះមានករណីចំនួន ៥៩២ ត្រូវបានរាយការណ៍ចាប់តាំងពីខែតុលា ជាមួយនឹងអត្រាស្លាប់ ៦.២ភាគរយ។

មន្ត្រីក្រសួងសុខាភិបាល ខេត្ត Apollinaire Yumba បានប្រាប់ទីភ្នាក់ងារសារព័ត៌មាន Reuters ថា ថ្នាំប្រឆាំងជំងឺគ្រុនចាញ់ដែលផ្តល់ដោយអង្គការសុខភាពពិភពលោកកំពុងត្រូវបានចែកចាយនៅក្នុងមន្ទីរពេទ្យ និងមណ្ឌលសុខភាពសំខាន់ៗនៅក្នុងតំបន់ Panzi។ ចំណែកឧបករណ៍ពេទ្យបន្ថែមទៀតសម្រាប់ករណីកម្រិតមធ្យម និងធ្ងន់ធ្ងរនឹងត្រូវបញ្ជូនមកដល់ដូចគ្នា។

គួរបញ្ជាក់ថា រោគសញ្ញានៃជំងឺនេះគឺមានគ្រុនក្តៅ ឈឺក្បាល ក្អក ហៀរសំបោរ ឈឺសាច់​ដុំ​ និង​ ពិបាកដកដង្ហើម ខណៈភាគច្រើននៃករណីឆ្លង និងស្លាប់គឺកើតលើកុមារអាយុក្រោម ១៤ ឆ្នាំ ហើយភាគច្រើនគឺកុមារអាយុក្រោម៥ ឆ្នាំបានស្លាប់ នេះបើយោងតាមអាជ្ញាធរសុខាភិបាលជាតិ។

WHO បាននិយាយថា ការផ្ទុះឡើងនៃជំងឺនេះមានចម្ងាយប្រហែល ៧០០ គីឡូម៉ែត្រ ពីរដ្ឋធានី Kinshasa របស់ ប្រទេសកុងហ្គោ ក្នុងតំបន់ Panzi ដែលជាទីជនបទដាច់ស្រយាលដែលនាំឲ្យមានការពិបាកក្នុងការតាមដាននិងយឺតយ៉ាវ។ យោងតាមអង្គការឃ្លាំមើលជំងឺគ្រុនចាញ់ធ្ងន់ធ្ងរ នៅកុងហ្គោមានចំនួនករណីជំងឺគ្រុនចាញ់ និងស្លាប់ខ្ពស់បំផុតទីពីរនៅទូទាំងពិភពលោក។ យោងតាមក្រុមសង្កេតការណ៍បានឱ្យដឹងថា ជំងឺគ្រុនចាញ់ក៏ជាមូលហេតុនាំមុខគេនៃការស្លាប់របស់ប្រទេសនេះផងដែរ៕

អត្ថបទ៖ ប៊ុន សុភាព